Issuu on Google+

Burma aum Kuki Nam le Gam Kuki Nam mite Pu le Pa gam hohi, tua Burma sunga um Tuilen-gunpi chunglam gam (upper chindwin) jouse {Joujang/Map-gamkai(Naga Hills/Layshi), Homalin gamkai, Kangmang phai-gamkai (Kabaw valley), Kholkip Kholjang gamkai (Kalaywa / Kalay - Paungbyin/ Mawlaik) } le Thangkai gamkai (chin state sahlam gam jouse) chule tua India sunga um Manipur Thinglhang gam jouse, Assam gama um Karbi-Anglong, NC Hills le Nagaland gama um Ahthibung, Kanjang gamho chu ahi. Chunga kisei gam ho ah, Chamlhat Zale'n lai khanga kipan tuni chan gei ja akhang akhang a i na cheng jingu ahi. Anglo-Kuki War 1917-19 (Chamlhat na huhdoh theina dinga British le Kuki te gaal kisat) kichai jouvin gaal-lel Kuki Gam ho chu, India gam aum Assam Province leh Burma Province tin ana hom khen uvin ahi. British le Kuki te gaal ki sat to na hiche gaal pi akichai nungin British ten ama ho langa panga gaal sat peh, nam dang hochu kipa manin Kuki te gam jouse ana hoppeh soh in ahi. Burma military police hon anasat nau gam-kai hochu Molaik District vaipoh na noi, Ningthi leng tetoh anasat nau gam-kai hochu Khamthi-District noi, Chin tetoh ana sat khom nao gam-kai chu Chin-Hills vaipoh na noi, Meithei tetoh ana sat khom nau gam-kai hochu Manipur vaipoh na noi, adang dang ana pankhom piho jong, chutabang ma in ana hoppih soh uvin ahi. British colony vaipoh na nowi ah Kuki Nam mite hin kisuh genthei nale bol engset na tampi ina thoh lo uvin ahi. Hijeha chu British colony nowi a kisuh genthei naho akon sochat a malai banga chamlhat zalen thei na ding le phulah jou na ding ngaichat naho jalin, second World War ahung umchun Japan tetoh ina pang khom uvin British empeire chu ina kisat topi kit un ahi. Second World War ah Kuki te kivop pi Japan te jong gaal a lel tah jeh in Kuki te kinep na jong ana gui lhung jou tapoi. Hinla British empeire jong atha alhom lheh tah jeh in, British colony aum Nam le Gam ho chu Independent pehdoh tei ding dinmun ana um tan ahi. Burma toh Independent lah khom ding chu, Gamgi-chin (borderland) a cheng Thinglhang mite ho (Indigenous Ethnic) nop le noplou chung chang khol chen na khat 1947 in Maymyo kho ah Burma lamkai hotoh ana nei un ahi. Hiche kihou na chu 'Maymyo Enquiry Commission' tin Burma Independent Thusim ah aki he e. Hiche ki hou na ah Burma sunga um chung-lang Kuki Gam ho thalheng in Pu. Somkhothong, Pu. Namjam le Pu. Javum chule Noi-lang Kuki Gam ho thalheng in Pu. Letso, Pu. Onkhomang le Pu. Ngamkhothang ama ho chu ana jao uvin ahi. Union of Burma sunga jaolut ding Nam jouse Gam jouse jaokim na lou va, 1947 Februar chun Shan State a um Pyinlone kho ah Burma lamkai hotoh Burmese hilou Thinglhang mi Nam phabeb in Pyinlone Conference ana bol un ahi. 'Maymyo Enquiry Commission' ki hou na anei lai phat tah un Pyinlone Conference ana kibol ahi jeh in, border acheng Indigenous Ethnic lamkai ho Pyinlone Conference ah ana jao jou pove. Hinla 'Maymyo Enquiry Commission' kihou na a jao hon Pyinlone Conference chu ka phatsah nao ve ana ti un ahi. Hijeh chun, ajao ding lomtah (Kuki tele) borderland acheng Indigenous Ethnic lamkai ho jaokim lou vin 1947 Februar 12 chun Pyinlone Agreement ana bol u vin ahi. Pyinlone Agreement jeh a Burmese le Ethnic hon Independent ana lah khom thei u jong ahin, alang khat a seithei khat chu Independent nung teng mitam jo Burmese hon milhom Ethnic ho asuh genthei na dingho akon kihuh doh theina dinga kibol ki nop tona jong ahie. Hitabanga kinop tona Agreement thupi tah kibol naho ah, Kuki te anaki jaojou lou na ajeh tampi um jong le seithei


pen chu, (1). Burma lamkai hon ajao ding lom ho jaokim theina ding sangin, Burma Independent mu ding jengseh ha khohsah na ana nei jeh u ahi. (Burma sunga cheng Nam jouse jaokim na a, khonung chenkhom dingdan le ki vaipoh dingdan ho achen achai ki houlhah na le ki nopto na ana um thei jou masang in Pyinlone Agreement ana um tah jeh a tuni khang chen gei ja Burma gam bowi lo ahi tai.) (2).Kuki tehi World War I / II lai yin British empeire toh ana kisat jing te ihi utoh kilhon in, British te vetda na le suh genthei na ana chang pen te jong ihi uve. Hijeha chu Kuki te kipum khat a kho nunga ahat joulou na ding deisah na jeh a, Kuki te pu le pa Gam jouse India le Burma ah ana hop khen u jong ahi e. Chu keoseh a lunglhai lou uva, Burma a kibol Pyinlone Agreement le India a kibol Sillong Accord ho jeng a jong he na sasan Kuki te jaothei lou na dinga ana bol u ahi e. ( British ten Kuki Nam mite ana suh genthei na ho, Kuki te pu le pa Gam jouse Kuki Nampi khutsung a pehlut jo sangin, India le Burma ah ana hopkhen nau chungchang a lung-gil uva ngaidam aki thum ding u angai lheh e. ) 'Indigenous Ethnic hole 1947 Constitution' tia Burma Socialist Programme Party (BSPP) in ana sodoh lekha-bu sung ah, 'Maymyo Enquiry Commission' a Kuki lamkai hon lekha apetlut naho le houlim abol naho jong kichen tahin muthei jin aum e. 'Maymyo Enquiry Commission' henga Kuki lamkai hon lekha ana pet lut nau ah het khoh ding phabep hochu, 'Nam dang ho tobanga Union of Burma sunga jao lut ding, ahung umding Burma Senate ah Naga hills sung aum eimi phung (3) lah akon thalheng khatchet lhen doha sol ding, Nam dang ho tobang a (Burma akon) potdoh theina tha (Right) nei ding' tiho chu ahi. Chule Kuki lamkai Pu. Somkhothong in 'Keiho koma sum le pai ki lhinga aum lou jehin Burma toh kivop in ka cheng khom nom uve, Burma toh kivop nom vang iti kivop khom ding dan kahe pove, dinmun lampi kicheh kanei pove' tin houlim na jong ana nei in ahi. Hiche kinop to naho akon, Upper chindwin vaipo ding minister khat lhendoh ding in kinop tona ana um in ahi. Hinla Upper chindwin minister dinga Pu. Javum chu mipin alhen doh vangin Chin ho lungthimset jal in ana ki lolhing jou tapon ahi. Burma in Independence amu nung, Kuki Nam le Gam khankho um chen: India le Burma in Independent amu nung in jong, Kuki te gam jouse hi British ten ana hoppeh bangin aum jingin, Kuki te genthei naho jong hi tuni changei jin ana-se lheh jengin ahi. Burma langa kipe lut Kuki te gam hohi, Khamthi District, Mawlyak District le Chin Hills vaipoh na chom chom a hopthang khenthang in ana umlo in ahi. Burma Independent mujou 1948 laija pan tuni changei jin Burma Government hon, Kuki te gam sung ah, Kuki te phatsah nathu umlou hel in Burmese leh nam dang tam tah ahin tol lut jing uvin ahi. Burma Government hon India Burma gam-gi khan tou na ding tohgon (Border Area Deve- lopment Program) tin tohgon tamtah ahi che pi un ahi. Hinla tahbeh a ahin toh doh hochu ahi le, Kuki te chu aPu aPa khang apan ana chen nao, Kuki gam apan melse tah le daan dihlou taha ana del doh nau toh gon ngen ahung hi jing in ahi. 1967 kum KhaDawMi Operation (KiNoNi) a, Chin-pa, Col.Vankul in sign ana bolin Gam nei Kuki te chu Kuki gam akon ana del doh ahi jong vannoi thusim hoah kichen tah a muthei jin aum e. Kuki te Kho le Inn-nom tam tah ho jong Meijin ana hal lha uvin, kho tamtah jong ana suhset mang un, Kho tamtah min jong Burmese le adang dang pao vin ana chon doh pih un ahi. Adeh a lainat umtah chu ahi leh, Kuki te Inn le lou, Bong le Loi, Gencha ho, nei le gou manlu ho ana lah


doh pih un, Kuki te jong eina nodoh uvin ahi . Kuki ten a dalhah u, In le Lou Bong le Loi, Gencha hole nei le gou ho lo ding, chang dingin Burmese ho le namdang tin hochu Kuki te gam sunga ahin pui lut un ahi. Hijeh chun, Kuki te gam sung jouse hi, nam dang jat dang ho a hung cheng dim soh tau vin ahi. Kuki te nei le gou, muding neh ding hochu, lahpih ding a, hung chenglut ahi jeh in Kuki te dingin, Inn-chen Kho-sah na ho ahah lheh jeng in ahi. Kuki te ding a Inn-chen Kho-sah ho a hah sat jehin, agam-nei aki hi vang in a vaicha, a genthei pen in ana ki umlo tan ahi. Hitia nam dang ho Igam sung uva ahung chen dim jeh in; vaichat, genthei, lungneo tah le kisong lal tahin Kuki te aum lo tai. Burma Government hon Kuki te gam sunga cheng jing, thanei jing na ding doi le tup in, Kuki te thusim, chon le khan, daan-thu ho ana sumang jing un ahi. Kuki kiti min jeng jong ki sah ngam lou na ding in bol engset na tamtah Ina toh uvin ahi. Hijeh chun, Kuki chaten, mi Nam khat pilhing set ahi nao thusim ho hepha talou vin, genthei hahsat tin, ana thoh tah jeh uvin lungneo na le ki sonlal na lungthim ho ahin neilo tai. Kuki tehi gam-nei joh ahi vang ngin gam-sung jouse ah nam danng ho achendim chu 'eima ho gam ahi tapoi' ti gei jin, lung chavai lung neo phabep ahung um lo tai. Hiche hi Kuki te dinga kichat umtah le tijat umtah dinmun ahung hi tai. Burma vaipo hon Kuki te Pu le Pa gam hohi anop nop adei dei in apei chavai jing un, Kum le lha ahung che in hiche gam hohi tun Khamthi-District, Laysi-Township, Phongpyin-Township, Homalin-Township, Molaik-District, Tamu-District, Kalay-District, Kalaywa-District, TonzangTownship (Chin state) tin, vaipoh na chomchom cheh noi jah ahom khen u vin ahi. Hitia vaipoh na gam-kai ho kikhen thang peh jehin, Kuki te le achen nau gam-kai hohi, achuh alhun na gam-beh, gam-lhang ho ah, alhom aneo te dinmun in aum lo uvin ahi. Hijeh chun Kuki te thanei nading kiti aum thei jipon, khan tou machal naho jousea nam dang ho sangin anu khah lo jing in ahi. Burma ki vaipoh nale Kuki te dinmun Burma ah General. AungSan lamkai na aki sem 1947 Constitution, General.NayWin lamkai na a kisem 1974 Constitution le tua Senior General.ThanShwe lamkai na akisem 2008 Constitution tin Constitution (3) aum in ahi. Burma Independence agang pen a muthei nading bou ana ki khoh sah na jeh in, 1947 Constitution hin lhah sam na tam pi ana nei jin ahi. 1974 Constitution vang Gen. NayWin le Burmese ho hat le let thei na ding doi le tup a ana kisem jo jong ahi e. Senior General.ThanShwe lamkai na a hung kisem 2008 Constitution vang, 1974 Constitution sanga mipi ho ding a khohse cheh jeng in ahi. Burma Senate, State le Division Senate ho jeng ah jong 25% hi Military Senater ho jao na le tha nei na hi sah tei dinga kisem ahi e. Adang aphad mo lheh na le aset na ho jong adim set in ahi. Burmese le Nam dang chomchom ho Gam jouse ki gomkhom a Union of Burma hung ki sem doh ahi e. Hinla tahbeh a hung ki vaipoh naho hi, Union dinmun tithei ding dinmun jong ana um kha poi. Mi tampen Burmese hon aphad chom pipen in, aban a State nei nam (7) bou vin them khat aphad chom pi in, State nei nailou nam ho dingvang phadchom malah a lhahsam na ngen ahi jing e. 1974/2008 Constitution ah, Burmese hilou Nam dang ho dingin State (7) asem peh utoh ki din tet thei ding Burmese Division (7) jong ahin sem u ahi.Burma ah State (7) le Division (7) dinga Vote 17 aum le Burmese hochun akeh khat vote 7 anei sa ahi tah jeha ima jouse ama ho thuthu ahi e. State (10) aum le State hotoh din mun kibang Division jong (10) um ding tina ahi. Burma sung aum Division (7) Burmese ho min to bang in aum in, State (7) hochu Kachin, Kayaa, Karen, Chin, Mon, Arakan, Shan kiti ho min bou in aum e.


Burmese Division (7) le Ethnic State (7) ho ah, State mu nai lou Nam dang chomchom ho Gam ho jong ajao in ahi. Burmese Division (7) ah Gam le Mihem atam jo alen johi Burmese ho ahi jeh in thanei nahi Burmese hoa ngen ahi jeng e. Alang khat a State ho jong a sunga cheng nam pha bep le gam phabep ho agop khom uva State a asempeh u ahin, alah uva atam jep abol thei jep ho Nam min chu State min dinga amin vou ahi e. (Tekah nan kisei le Shan State). Hiche sanga khoh selheh jochu ahi le; Gam, thusim, chon le khan, pao le ham chom cheh nei Nam tampi chu agaop khom uva Nam khat dana asempeh ji uchu ahi e. (Tekahnan ki seile; Kuki, Naga, Mizo, Chin, Zomi le adang kibah na neilou hochu Chin sunga aban gopkhom jeng uho ahi e.) Mi hem khatbou thol dinga kisem sangkhol khatchu mihem tampi veikhat ah a kiah sah tobang ahi jeh in, ki tomo nale khan tou ma chal mona ngen ahung hi doh jing e. Burma ah State nei nailou Nam ho dinga State tunding semding aki tile, Burmese ho Division (7) le Ethnic ho State (7) chu suhkeh tetei ngai ahi e. Hijeh a Burma ah State thah aum be ding chu ana phel lou u jong ahi e. State mu nailou hon State tunding thu asei pou pou ule, ama ho chengou ahin ama hon adeidei jin kibol jeng tahen ti sanga, amin cheh uva umsa State/Division ho ki sukeh ding joha agel jingu ahi. Hito banga thil bol hohi, Nam dang ho chengou val lhum gobou seh ahi pon ami a nam jeng jong val-lhum ahi uve. Hijeh a mihem jat atam pem Burmese, State nei jousa Nam ho chule Nampi lhingsel ahivang State nei nailou ho tin Burma sunga Nam chomchom um ho hi groups (3) a hop khen in aum e. Union of Burma akiti vang, achesa kum(60) val sungin Burmese hon ama ho hat jing thei na dingin Burmenization chu achepi un kho nunga ichen geija ahin chebe piu jong seithei nai lou ahi e. State neisa Nam (7) hon la Federal Union of Burma sunga Nam jouse Gam jouse alen aneo ki khen louva dinmun ki lengkhat chetding ati vang un, tahbeh in vang State nei nailou ho khankho gellou helin Burmese State pum a State (8) bou chu a ngeh jing u vin ahi. Hijeh a Nampi lhingsel dinmun anei vanga State nei nailou Nam ho mailam khankho dingchu kichen tah a gelkhoh cheh angai lheh e. Burmese ho tamchen napen gamho suhtup a Burmese State tunding, Nam tin chenkhom na gambeh hochu acheng laha atam jo jepho minput sah ding, atam jopen aum hih ule minkhat pohsah a State a semding tia lung gel phabep jong aum in ahi. Achesa kum (60) val sunga Burma Gov. hon gamnei Kuki te adel manga namtin jattin Kuki gam sunga ahin chenlut sahu thusim ho suh mang ngil peh a, Chin MP hon Kuki te gam Upper chindwin jong chu gamnei umlou banga Upper chindwin Patkoin State tia ama ho chin ho puma namtin gam dinga ahin semnop u ahi tai. Hiche hi State neisa hon, a changou u aki chanjou nunga jong michen goulah akon chengou thah aki chudoh nop jeh u ahi e. Khang kikhel teng Burma sung aum Kuki te dinmun ding Federal Union of Burma sunga um, ipu ipa khanga kipan ina chen jing nao Kuki gam jouse chu suhtup khoma Kuki State tundoh ding doi le tup lentah inei uvin ahi. Chutoh kilhon a KSDF in Revolution ihin bol u jong kum (20) nai ahi tai. Lungtup Kuki State sungah Kuki chate jousen lungmong sel lung nom sel le det tah a Inn chen Khosah iki suhtup theina ding uva, tua iki petdoh dingu angai tai. Hiche dinga Kuki chaten lungki toh tah le kipum khat tah apan ilah khom cheh dingu angai je. Chule lunggel neitah, hangsen tah, gunchu tah a imano jing dingu angai tai.


Ahung lhung ding Democracy khang, Federal Union of Burma ki vaipoh na sung ah Kuki Nam le Gam jong Nam dang ho toh ki lengkhat na dinmum i nei theina dingu doile tup lentah aki nei jin ahi. Nam dang hotoh ki lengkhat na dinmun ti chu, Nam dang hon State le selfDetermination anei thei ule Kuki ten jong nei teitei ding tina ahi. Kuki State inei ule Kuki State ki vaipoh na ding Constitution ( Daan-pi) jong inei dingu ahi. Chutoh kilhon in, Daan-pi toh kitoh a vaipo vaihom ding Kuki Government, Daan-pi toh kitoh a Daan le Law semtup thei na thanei (Legislative power) Kuki State Assembly, Daan-pi toh kitoh a Thuten vaihom na thanei (judicial power ) Kuki State Judiciary tiho jong Kuki Nam miten atum a inei dingu ahi. Kuki State le Self- Determination inei u le itabang loupi na le bolthei na tha inei dingu ham ti ho chu FCDCC (Federal Constitution Drafting and Coordinating Committee) hon 2008 a ahin sem Constitution sunga umchen dan phabep toh tekah nan kisei le, Assembly of Federal Union ah (A) Chamber of Nationalities (B) Chamber of People’s Representatives kiti aum in ahi. Chamber of Nationalities dinga state khat in thalheng ding members (6) alhen a asol thei le Kuki ten jong ama ho tabanga bol theina tha nei teitei ding tina ahi. Federal Union of Burma President hi Federal Union of Burma Luboh luchang ahin, chule Manchah Hem le Thel choi jouse chunga thunei thanei pen lamkai ahi. Hiche President dinmun ding lhenna ah jong State jousen thalhenga mi (1) cheh asol a, hiche lah akon President le Vice-President chu ki lheng doh ding ahi. Hiti jeha, Kuki ten jong state inei pou le Kuki chapa chanu ho jong Federal Unio of Burma President dinmun ihin muthei teitei dingu ahi . Federal Defense and Security Services ding jong chu, state jouse akon jat kibang chet a sol khom ding ahi jeh in, Kuki te sanga mihem jat tam jo Burmese le Nam dang ho akon Kuki Gam le Nam dinga kiven bit theina dinmun ihin nei thei dingu ahi. Hinla Kuki chate kilung to kipum khat tah a pan ilah jou hih ule vang, achunga hung ki sei phatchom naho leh loupi na dinmun tampi ho jouse hi imu jou lou dingu ahi je. 1948 Burma Independence jou a ki pan, akhang akhang a vaipo hon Kuki Gam sung ah Burmese le Namtin Jattin ahin chen lut sah jing jeh un, gam nei Kuki chate hi mi lhom in akium doh tai. Gam neite sanga ahung cheng lut ho atam jeh a gam kimu jou ding hinam tia lungneo phabep jong ium taove. Ei hon Kuki state idal u hi mitam milhom kison pi najal a kidal ahi poi. Hiche gam hi eiho gam hija gamnei ihi jeh uva gam kidal ahi. Mihel Lak. Khat titah lou Sangsom jong kipha hih jongle igam uchu eiho khut sunga ahin pet lut dingu chu daan dih le thutah ahi pen e. Hiche gam hi eiho gam ahi dan chu thusima jong kichen tah a um ahi. Burma gam sunga igam leh inam u ajao jeh a, Eiho kitam hen lang kilhom jeng jong leh Igam u ahi jeha Burma a Kuki State imu tei dingu ngai ahi. Federal Union of Burma sunga milhom mitam, gamlet gamneo jeh a kikhen na um louva minam jouse gam jouse kileng khat ding ahi tai. Achuti le Burma sunga Kuki state kiti aum lou na ding lampi aum poi. Thudih thutah le thudih daan dih aum thei pou le Kuki state um tei ngai ahi e. Tua kum 60 val sunga vaipo hon anop nop a abol chu, adihtah a sutoh lou va tudin mun a kuki gam sunga cheng lut ho chu hita koiden ding ahi le iti dandih thudih hi thei ding ham? Ajeh chu ama ho aki sim tha le Kuki state iti hi thei tading ham? Tu mitmu khang um chenseh avet u va na atoh u le iti thudih daan dih um thei ding ham. Kum 60 lang anopnop abol jeh u va tu dinmu um ahi e. Ama ho tu mitmu khang umchen avet uva Kuki state um thei pon te ati le ibol thei u chu, 1947-8 , ahilou le 1917-19 masang a ana cheng lut lou jouse poddoh un ti ding ahi e. Hiti le Democracy Human Right ahin ti u le eiho ki suh gen thei ho chu hoi ja na suh mang ngeil u ham ti thei hi lou ha? Aphai hile hiche ho ahin sei le anu khah pen na sei thei chu na chen


thei u ahi nai hinla Kuki state mi a kisimlou ding meljin hi ding ahi in, Vote peh thei na tha jong na neilou hel dingu ahi ti ding ahi tai. Anglo-Kuki War kichai Burma Independent anga jou nung tunichan a dandih lou taha gamnei te eidal doh uva jattin namtin igamsung uva ahin chen lutsah uhi eihon imoh khutsan theilou ding ahi. Gamnei te phatsah louva hung cheng lutho hi, eihon hetpihna ineilou hel ding ahi. vannoi leiset a koigam koigam hi jong leh agam nei te phalpeh na umlou va kumsom kum jakhat cheng jong leh dan dungjui in het peh thei na anei poi ve. Gamkhat a agam nei te sang zatdang atam joh le, 40% hi jong le gammu thei na, vaipoh na jouse asuh noh phah gamu ahi tai. Anglo-Kuki War 1917-19 ah Kuki te changseh gam ahi dan vannoi heta um ahi jong ihet soh u ahi tai. 1947 Burma sunga jaolut na ding ki houna hoa, eimi lamkai hon igam u chu ' Jat dang ho to bang a Burma a kon a pot doh na ( Independence) din mun ' jeng jong ana seiu ahi chu Burma le Kuki te thusim ah jong aum sa ahi e. Lungneo na dingle ki sonlel na ding ima aum poi je. UN daanpi in aphad sah (1).Thusim kicheh taha nei, (2).Pao le ham, Lekha, Chon dan khan dan ho achom beha nei, (3). Gamnei hina Thusim kicheh nei, (4). Population, Economice chule Gam phabepa len nei hohi Nampi lhingsel khata kisim a hetpeh na um ahie. Hitabang dinmun ho jouse chu Kuki ten jong inei uahi toh kilhon a Kuki gam chu um tetei ding ahie.


Burma aum Kuki Nam le Gam