Issuu on Google+

Hiwwe wie Driwwe www.hiwwe-wie-driwwe.de

Volume 16. No. 1 - Friehyaahr / Summer 2012

sitter 1997

The Pennsylvania German Review Gegrindt un rausgewwe bei: Deutsch-Pennsylvanisches Privatarchiv (Ober-Olm, Deitschland) In Cooperation mit: Pennsylvania German Cultural Heritage Center (Kutztown, PA)

Editorial

Yunge lanne die Mudderschprooch Zwett „Grundsau Lodsch fer Yunge“ in Pennsbarick

Dihr liewe Leit, Glaabt‘s odder net, awwer fer‘s erscht mol hot en Schreiwer en Award grickt fer sei Schreiwes in die pennsylvanisch-deitsch Mudderschprooch. Wer sell iss un ferwas er sell grickt hot, kennt dihr lese in die Ausgab vun unser Zeiding. Yuscht eens: HwD hot ebbes zu duh mit sell, un‘s gebt in 2012 widder en Award fer en guud Gschicht odder Gedicht, ass gschriwwe iss warre in deitsch. Newich sell hemmer en latt anner Schtofft, ass mer drucke un zu unser Leser schicke uff 16 Bledder. En latt Kalls un Weibsleit henn en guuder Tschabb geduh un losse uns ebbes wisse vun was am aageh iss in Pennsylvanisch Deitschland im neie Land. Viel Gschpass beim Lese winscht ... Michael Werner

In der Ausgab Michael Werner: Zwett „Grundsau Lodsch fer Yunge“ in Pennsbarick (Blatt 1) Kevin Sterner: Die Mudderschprooch (Blatt 4) Ed Quinter: Es Friehyaahr (Blatt 5) Larry Gradwohl: Wie mer Meerreddich gmacht henn (Blatt 5) Peter Fritsch: Schlechte Rumleefer (Blatt 6) Richard Savidge: 'S iss Winder im Daal (Blatt 7) Richard Miller: Die Miller Brieder (Blatt 8) Daniel Riegel: Arebschaft (Blatt 9) Samuel Stoltzfus: Alt Zeit Scheier Schtelling an die Stoltzfus Heemet (Blatt 10) Guy Grube: Die deitsch Breddich (GS) Douglas Madenford: En grosse Neiigkeet (GS) Supplement fer Subscribers: 4 Bledder Gedanke Schliwwere HwD 1.12

PENNSBURG. Fer meh ass 80 Yaahr sinn pennsylvaanisch-deitsche Kalls zammekumme in Versammlinge un Grundsei Lodsche allfatt im Hanning fer en guudi Zeit minanner hawwe, en guud Iems gricke un die Grundsau, der Wedderbrofeet frooge, wann‘s Friehyaahr kummt. Sitter letscht Yaahr hot‘s Schwenkfelder Heritage Center in Pennsbarick aa en Grundsau Lodsch - awwer yuscht fer Kinner. Sell iss Grundsau Lodsch No. 19 in Pennsylvaanisch-Deitschland. Wie die Alte, so duhne aa die Yunge Lieder singe in die Mudderschprooch, lanne en wennich deitsch schwetze un gricke en deitsch Iems. David Luz un Rebecca Lawrence vum Heritage Center henn sell Grundsau Lodsch fer Yunge ans geh grickt letscht Yaahr. So es hot fer‘s zwett Mol Blatz genumme des Yaahr. Kinner, ass net debei gwesst sinn letscht Yaahr, henn en Verschpreches gewwe misse in Deitsch fer en Glied vun die Lodsch warre. Un sell sinn die Lieder, ass gsunge sinn warre: „Uff de Bauerei“ (Home on the Range), „Oh, die alt groh Grundsau“ (Oh, the old gray Groundhog) un etliche annere meh. 'S Pianna iss gschpielt warre beim Jill Kachmar, ass 12 Yaahr alt iss. Der Naame vun die Grundsau in Pennsbarick iss

Zwett Grundsau Lodsch fer Yunge hot Blatz gnumme in Pennsburg

„Ricky“, un die Kinner henn ihm gholfe, sei hatt Arewet duh. Sie henn en „Wedderraad“ geyuust fer sell duh. Sie henn aa Babierblumme gschmisse in die Luft fer abweise, ass er gsaat hot, es deet ball‘s Friehyaahr kumme. Am End vum Program henn die Kinner en pennsylvaanisch-deitsch Iems gesse un gschpielt minanner. Die Mithelfer des Yaahr waare der Carl Arner (Alburtis) vun Grundsau Lodsch No. 7 un Lucy Kern (East Greenville) vun die eenzichscht W eibsleit Grundsau Lodsch, ass es gebt.

Die Dritt Grundsau Lodsch fer Yunge nemmt Blatz neegscht Yaahr am 27. Yenner in die Bicherei vum Schwenkfelder Heritage Center in Pennsbarick. Wann ebber geindresst iss in sei Kinner odder Kinnskinner anneschicke zu sell Event fer die Mudderschprooch lanne un ebbes vun die Gebreiche vun die Pennsylvaanisch-Deitsche, sett er odder sie die Rebecca Lawrence uffrufe fer en Zeddel gricke. (mw) Rebecca Lawrence Museum Educator Schwenkfelder Heritage Center rebecca@schwenkfelder.com Ph. 215–679–3103

1


Neies vun Hiwwe un Driwwe

1,000 Bsucher Meh wie en dausend Leit henn in Virginville es Play „So geht‘s ehwe“ gsehne. Die Schpieler vum Ernest Miller un Parre Richard Miller henn sell Schtick viermol gschpielt, un die Leit henn sell abbadich gegliche. 'S Play waar gschriwwe beim Parre Merrill Q. Ressler, un der Schreiwer waar aa datt fer sell abwatche.

African Deitsch Janelle un Jasmine Newswanger sinn Twins, 17 Yaahr alt, Fuhremennischte in Cumberland Kaundi - un African American. Sie lewe zamme mit die annere vier Kinner die Newswanger Familie. Ihr Memm waar in Bressend, wie sie gebore waare, un sellerweg sinn sie in die Mennischte Familie kumme. So schwetze sie Deitsch ass ihr Mudderschprooch.

KU Bauerei Sitter Tschulei 2011 iss es Pennsylvania German Cultural Heritage Center en Deel vun Kutztown University. Der Director, Prof. Rob Reynolds, iss hallich. Er hot gsaagt: „The future is bright.“

Hoscht du gwisst ... … ass der State Rep. Mike Sturla PennsylvanischDeitsch gschwetzt hot im „House“ in Harrisbarick? Er hot gschwetzt zu ebber schunscht iwwer der verennert District, ass der Pat Meehan nau grickt. Lengeschter Kaundi iss en Deel vun sell - awwer der State Rep. iss Eirish un gedollisch. So hot der Sturla gfrogt: „Kann er Deitsch schwetze?“ Im „Reporter‘s Office“ henn sie net gewisst, wie sie sell schpelle sette, was er gsaat hot. 2

Joey Kelly hot Freindschaft im alte un neie Land RUCHHEIM. Sell iss verleicht meh en Neiigkeet zu die Leit im alte Land. En Familie mit Name “Kelly” iss alliwwer guud bekannt in Deitschland fer ihr Musick. Der Paep und die Memm henn geschtaert in die 1970s mit ihr 10 Kinner Musick schpiele middes in die Schteddel, un die Leit henn sell gegliche. Schpeeder henn sie Concerts gewwe in grosse Bletz. “Kelly” iss ferschur Eirish (un gedollisch), un die meenschte Glieder gucke wie sell. Awwer die zwett Fraa vum Paep waar vun Ohio, un sie waar en Brodestand. Nau henn Genealogists ausgfunne, ass die Kellys uff die Mudderseit Naame wie Kline, Faassnacht, FaassnachtMeentzer un Mellinger (Möllinger) in ihr Familiebaam henn. Interesting iss abbadich die Mellinger Familie. Der erscht Mellinger in die nei Welt hot gsettelt in Ephrata un gwuhnt neegscht zum Cloister zamme mit der Conrad Beissel. Er waar en Mennischt vun Ruchheim aus die Pfalz (en glee Schtettel neegscht zu Frankenthal). Die Voreldre vun seller Mellinger henn zu duh ghatt mit der Jakob Ammann. ‘S hot en grooss Dischbedutt gewwe zwischich die Men-

Joey Kelly vun die „Kelly Family“ hot deitsche Watzle

nischte un den Drupp Mennischte Leit, ass mehner gegliche henn, wie der Ammann die Biewel ausglegt hot. Fer sell hot’s en Splitt gewwe zwischich die Mennischte un die Leit, ass mer schpeeder “Amish” gheesse hot. ‘S gebt es Blatt Babier, wu sell Splitt uffgschriwwe iss warre – un sell Babier waar gseint bei en Kall mit

Naame Mellinger. Der Joey Kelly, ass es meenscht geindresst waar in selli Gschicht, hot sell schier net glaawe kenne. Mer kann die ganz Gschicht vun die Kelly Freindschaft nau sehne uff „youtube.de“, wammer fer der Name „Kelly“ un „Vorfahren gesucht“ guckt. 'S iss awwer yuscht in Hochdeitsch. (mw)

Michael Werner Es globbt beim Sammy middes in die Nacht Price: US-$ 24.99 /EUR 18,75 (plus postage) Der Sam wuhnt drauss im Busch, un‘s iss Winder. En Schtarrem macht Yacht, un es iss so kalt, wie‘s nur sei kann. All uff emol globbt‘s an die Deer. Er watt wacker, macht uff un sehnt en Haas drauss schtehne. Der Haas froogt, eb er net neikumme kennt fer die Nacht schpende im Heisli. Der Sam saagt: „Guud, kumm rei.“ Net lang schpeeder globbt‘s widder an die Deer, un‘s iss en Fuchs. Der Haas watt bang un saat zum Sammy: „Loss ihn net nei, er will mich fresse.“. Was der Sam duht, un wie sell Schtori weider geht, kennt dihr lese in sell nei Kinnerbichli. Adder datt: Michael Werner, Pfannenstiel 13, 55270 Ober-Olm. HwD 1.12


Neies vun Hiwwe un Driwwe

Richard Savidge grickt HwD Award READING. Alleweil gebt‘s verleicht 50 pennsylvanischdeitsche Leit, ass Gschichte un Gedichte schreiwe. Die meenschte vun ihne drucke ihr Schtories in die Zeiding „Hiwwe wie Driwwe“. Fer sell hot der Drucker zamme mit dem Kutzeschtettel Folk Festival un em Mudderschproochschreiwer Contest in Bockenheim im alte Land der „Hiwwe wie Driwwe Award“ fer pennsyvlanisch-deitsche Gedichte un Gschichte“ ans geh grickt im Yaahr 2011. Der erscht Winner vun sell Award iss der Richard Savidge vun Hegins (Pennsylvaani) fer sei Gedicht „'S iss Winder im Daal“. Er hot sei Award Certificate un en Bichli grickt vun die Dale Schwoyer uff em Program „Die pennsylvanisch-deitsch Schtunn“ uff Berks County TV im Yenner 2012. Un sellerweg hot‘s gschafft fer der Winner finne: Der Prof. Bill Donner hot alle Yaahr en Mudderschprooch Presentation uff die „Seminar Stage“ vum Folk Festival in Kutztown. Alle Yaahr lese zwischich acht un zehn Leit. Hilf grickt er vum Ed Quinter, selwert en Mudderschprooch Schwetzer un Schreiwer, Schulmeeschter beim „Pennsylvania German Minor Program“ vun Kutztown University, un en

'S Kutzeschtettel Folk Fescht schtaert des Yaahr an Tschuun 30. Alle Daag kammer datt anne geh zwischich 9 a.m. un 6 p.m. bis zum Tschulei 8. 'S gebt guud pennsylvanischdeitsch Esse datt, Musick un deitsche Schwetzer. Geht datt mol anne.

Kinnerbicher Richard Savidge aus Hegins (PA) mit der Dale Schwoyer

Board Member bei die „Deutsch-Pennsylvanischer Arbeitskreis e.V.“ (GermanPennsylvanian Association) in Mainz im alte Land. Zamme henn sie die Schreiwer ausgsucht, ass im Tschulei 2011 ihr Schticker glese henn vor etliche Leit uff die „Seminar Stage“. Un sie henn ferschur en guuder Tschapp geduh. Die Schticker sinn zum „Hiwwe wie Driwwe“ Drucker gschickt warre mit EPoscht. Der Drucker iss alleweil Vice President vun die Deutsch-Pennsylvanischer Arbeitskreis un en Glied in die Jury vum „Palatine Mudderschprooch Schreiwer Contest“ in Bockenheim. Zamme mit nein annere Kalls un Weibsleit vun die Jury hot er die Schticker all glese, un die Jury hot am End gsaat, weller Schreiwer der Award fer‘s Yaahr 2011 gricke sett.

All die Gedichte, ass glese sinn warre uff em Stage, kammer nau aa lese in die do Ausgab vun unser glee Zeiding „Hiwwe wie Driwe“. Der Bill Donner un der Ed Quinter deete gleiche en Eilaading gewwe zu alliebber, ass noch deitsch am schreiwe un schwetze iss. So wann ebber Gschichte un Gedichte gschriwwe hot un gleiche deet, emol debei zu sei in Kutzeschtettel beim Folk Festival un sei pennsylvanisch-deitsche Schticker zu lese var en latt Leit, ass sie abhariche, sett er odder sie Mol en Briefli odder E-Poscht schreiwe zu seller Address, ass mer do am End nenne. (mw) Prof. Bill Donner Kutztown University P.O. Box Kutztown, PA 19530 Mail: donner@kutztown.edu

Was gebt‘s mit die Pastorius Home Association? GERMANSVILLE. 'S Haus vum Paep vum Franz Daniel Pastorius watt geeegent bei die PH Association un em Schtettel Bad Windsheim, wu’s schteht. Alle Yaahr henn die Glieder vun die Association es alt Land bsucht un deel aa gschafft im Heisli, so ass Schtubbe gelehnt henn kenne warre vun Leit uff Bsuch. HwD 1.12

Folk Fescht

Nau guckt’s schlecht fer sell Project. Scheint’s henn die Leit in Bad Windsheim kenn Gschpass meh, un sie browiere all, was am aageh iss, zu en End zu bringe. 'S gebt yuscht noch acht Glieder vun die Pastorius Home Association im alte Land, un sie losse kenn neie Leit meh Glieder warre. Nau was meent sell?

Die Association iss am driwwer denke, es Heisli zu verkaafe, un’s Geld zu schtecke in annere Projects wie “German-American Scholarships”. Sie froge fer Ideas. So wann ebber en guuder Advice gewwe kann, sett er en Briefli schreiwe zu: John Doe, P.O. Box 66, Germansville, PA 180530066. (mw)

Vier neie Bicher in die Mudderschprooch fer Kinner gebt’s bei Masthof Press in Morganschteddel: “Jakob’s Colonial Family History: A Pennsylvania German Tutorial and Coloring Book” (Sarajane Williams), “Die Drei Baere” (Ernest Waldo Bechtel), “Schlaf Boppli Schlaf Rhymes” (Sylvia Troyer) un “Da Volf un di Drei Piklen” (Hank Hershberger).

Goschenhoppen Fest Es Folk Fescht vun die Goschenhoppen Historians nemmt Blatz am 10. un 11. Augscht 2012 am Antes Haus neegscht zu Green Lane (PA). Sell iss es 45. Mol, ass sie sell Event henn, un der Topic fer des Yaahr iss „The Pennsylvania Long Rifle“

Deitsch Claess Die Schpootyaahr PG Claess vum Butch Reigart im Heritage Center vun die Lancaster Mennonite Historical Society schtaert am Dunnerschdaag, September 13, un schtoppt zwee Munet schpeeder. So wann die HwD Leser ebber wisse, wu gleiche deet, aa die Mudderschprooch lanne, sette sie sell Nummer gewwe zu seller Kall odder Weibsmensch: (717) 3939745. Mer kann awwer aa en E-Poscht schreiwe zu: manager@lmhs.org. 3


Gschichte un Gedichte

DIE MUDDERSCHPROOCH Es freet mich, heit ebbes zu schreiwe iwwer unser schee Mudderschprooch, un ferwas mir sie verschpaare misse, un was mir noch duh kenne devor. Ferwas iss Pennsylvaanisch Deitsch doch wichdich zu bhalde? Zuerscht, wammer Deitsch schwetze kennde, hedde mir en anneri Weltaaschauing. Heidesdaags heere mir viel Gebabbel iwwer "multiculturalism", un wie wunnerbaar 's iss, un immer so Sache wie "Vielfeldichkeet iss die Kraft", un so weider. Un sell iss gewiss waahr, awwer die menschte Leit, ass eich so ebbes verzehle, glaawe es selwert gaar net. 'S iss yuscht en politisch Gschwetz. Awwer denkt draa: Mir henn gewiss en anneri Weltaaschauing graad do in unser Familie un Gmee, ass niemand kann nariyets schunnscht finne! Un die iss net falsch. 'S iss waahr, un 's iss hawweswaert. Zu Zwett, gebt's en grossi Sammling vun Lidderatschur in Pennsylvaanisch Deitsch gschriwwe. Gedichde, Schtories, Gschpiele, Zeidingsartikels, Meeningsbledder ‌ denkt doch yuscht mol draa! Un viele vun so Sache sinn aarick gut gschriwwe. Wann niemand die Bicher lese kennt, deete unsere Schreiwer ihre Schtimme in Ewichkeet verlore geh. Zu Dritt, iss unseri Mudderschprooch fer Volkswissenschaft un behilfiche Middels weiderzulanne geyuust. Wann niemand die Schprooch meh verschtehe kennt, waere die

Sache ball verschwunne. Un sie sinn ya wichdich! Wann die Sache verlore sinn, kumme sie gaar nimmi zrick. Awwer sie sinn noch net verlore gange. Es gebt noch en deel Ursach fer die Hoffning. Denkt mol druff: Immer meh Leit sinn in die Mudderschprooch g'indressiert, un sie wolle es zu lanne aafange. Sie meene, ass weil Deitsch immer raarer watt, sedde sie Deitsch nimmi meh "fer graended" nemme. Yuscht so wichdich, browiert niemand heidesdaags die Mudderschprooch doot zu mache. Fer viele schlechte Ursache, un verleicht ee gudi Ursach, henn sich viele deitsche Leit im zwansichde Yaahrhunnert gschemmt, ihre Kinner Deitsch zu tietsche. Sie waare bang, ass ihre Kinner "dumm Deitsch" gheese warre waere. Un darich die aerscht un zwett Weltgriege henn die englische Leit kenn Deitsch gaern gheert. Aa so letz sinn Gsetze gschriwwe gwesst, ass Deitsch kennt nimmi meh in die Schule getietscht warre. Awwer heidesdaags sinn alle vun denne Dummheede vergesse warre. En anneres guudes Zeeche fer PennsylvaanischDeitsch iss, ass viele Urschwetzer noch am Lewe sinn. Die Gelegeheet fer Deitsch zu lanne vun denne alde Leit, iss noch net verlore. Am weenichschte kammer ihre Schtimme rekoorde, fer ihre abbadiche Wadde un Wattschtelling zu bhalde. Awwer mir misse uns ya dummele.

Zletscht kenne mir deel Hoffning hawwe, vun annere Schprooche, wu aa schunn verschpaart gwesst sinn. 150 Yaahre zrick iss die gaelische Schprooch schier gaar gschtarewe gwesst. Es hot viel wennicher Gschwetzer ghatt, ass Pennsylvaanisch-Deitsch heidesdaags hot. Awwer dieweil etliche Leit hatt gschafft henn, Gaelisch zu verschpaare, so iss es beliebt gwaxe. Heidesdaags hot die gaelische Schprooch Milliyuun vun Gschwetzer. Awwer es bescht Beischpiel fer uns iss Yiddisch. Selli Schprooch iss doch ganz ehnlich zu Deitsch. Viele Leit henn gsaat, ass kammer eeni vun denne Schprooche schwetze, kennt mer aa die anner verschtehe. Nau, denkt mol, was deel Leit iwwer Pennsylvaanisch-Deitsch gsaagt henn: Sell iss yuscht en Schprooch fer aarme, dumme Bauersleit. Sie iss net guud genunk fer gscheite Gedanke odder schee Gedichte, un sie hot nie nix wichdich zu verzehle. Awwer denkt mol widder: En hunnert Yaahr zrick, waare selle Ursache aa waahr fer Yiddisch. Ball schpeeder sinn menscht vun die yiddische Urschwetzer beim Adolf Hitler doot gemacht warre. Awwer alles dennoh, iss Yiddisch eeni vun die beschte Schprooche fer Lidderatschur im 20. Yaahrhunnert gwesst, mit en Nobel Breis fer Lidderatschur abzublose sogaar. Heidesdaags grickt sie immer meh Gschwetzer.

Mir henn doch gsehne, ass Pennsylvaanisch Deitsch iss waerdlich un aa meechlich zu bhalde. Awwer was kenne mer selwert duh auszuhelfe? Zerscht, kennt dihr Deitsch schwetze, duht sell. Dihr misst eier Kinner tietsche, un wann sie net welle, misst dihr eier Kinskinner tietsche. Viele Yaahre vun heit warre sie ihre Kinskinner tietsche. Dihr kennt gaar weider nauslange, ass dihr seilewes net glaawe kennt. Zu zwett, kennt dihr nie kenn Deitsch schwetze, misst dihr Deitsch lanne. Wann dihr en Urschwetzer kennt, noht lannt vun ihm. Schunscht gebt es en wunnerbaar Kolletsch Klaas in Pennsylvaanisch-Deitsch in Kutzeschteddel. 'S iss waahr! Der Ed Quinter tietscht sell im Ee-Schtubb Schulhaus uff em Luckenbill Weg. Zletscht, kennt dihr paar Urschwetzer, grickt en Teep Rekorder, ass ich hab eich schun gsaagt. An der Rekoording ihrm Aafang, saagt paar Wadde iwwer wann un wu die Rekoording gmacht iss, un wer der Schwetzer iss. Bringt odder schickt die Rekoording naach die schee Leit am Pennsylvania German Cultural Heritage Center do in Kutzeschteddel. Sie wisse, was zu duh mit seller. Schunscht ruft mich uff un schickt sie zu mir. Am Bescht, fer sell braucht dihr gaar kenn Watt Deitsch wisse. Kevin Sterner Gilbertsville (PA)

Impressum Hiwwe wie Driwwe iss en Non-Profit-Project un watt rausgewwe bei: Pennsylvaniadeutsches Privatarchiv, Pfannenstiel 13, 55270 Ober-Olm, Germany. In Cooperation mit: Pennsylvania German Cultural Heritage Center (Kutztown, PA). Fon: 01149-6136-814863. Internet: www.hiwwe-wiedriwwe.de. Skype Webcam: hiwwewiedriwwe. Drucker un Schriftleiter: Dr. Michael Werner (michael-werner@t-online.de). Mithelfer: Prof. C. Richard Beam, Frank Kessler, Ed Quinter, Butch Reigart, Prof. Robert Reynolds, Alice B. Spayd, Jennifer Trout. Webmaster: Melanie Langenhan. Verdeelinghilf: Marlene & Pauline Werner. Bankkonto Deitschland: Sparkasse Mainz (BLZ 550 501 20), Kontonummer 1152105100). Bank Account U.S.A.: Mid Penn Bank, 349 Union Street, Millersburg, PA 17061, Account No. 650838. Printed Copies: 2,000. Š Dr. Michael Werner

4

HwD 1.12


Gschichte un Gedichte

ES FRIEHYAAHR Es iss en scheenes Ding, un aa en bissel kariyos, wie es Friehyaahr zerick schleicht, un dann bletzlich do iss. Im Yaahr 2011 hemmer so eens erlebt. Die Oschdre waar schpoot am Kalenner. Der Winder waar lang un hot nie kenn Zeeche im Hanning gewwe wolle vun seim Rickkehr, wie es efders der Fall iss. Der Kaschebaam im vedderschte Hof blieht alle Yaahr am 5. Abril, awwer des Yaahr waar 's mindeschtens ee Woch schpeeder. Ausewennich meim Bu seim Fenschderlaad iss des alt, rinselich Gwaechs gschtanne wie en Butzemann. Alles uff eemol im Schpootmatz, wie en Pischber, iss en waarmes Liftel darichs schun lang verrigelde un nau nei geeffnede Fenschdre gzogge.

„Es is en scheenes Ding, wie es Friehyaahr zerick schleicht …“

Uff meim Aarem hawwich’s gschpiert, so wie wann ebber mich sanft aariehrt. Die Iwwerasching hawwich net erwaardt, un ich hab en katzi Zeit graad datt schteh bleiwe misse, fer die Nadur ihre gleenes Gschenklin zu eschtimiere. Selle Lifdel kenne en ganzes Haus mit geeffnede

Fenschdre die alt Luft vun Munedde ball auskehre. Des iss wahrhaftich ghaeppent, un ich hab gedenkt, mer hot en Chance, unsre eegne alde Lufde weckzudreiwe, so wie mer duht in der Kehrwoch. Mer griegt en frischer Schtaert, wammer will. Schtaab gewiss, awwer aa

es Schmutz vun Lewe, ass sich haust iwwer Winder, in Ecke, wu mer net neiguckt un sich verschteckt. En guudi Zeit zu vermaricke, wie alles blieht un des bessere Gleed aazieht. Mer findt sich geischdlich am Lischde mache: Ich sott im Gaarde rumgraawe, un ebbes saehe. Ich sott ebbes ausmache mit meine Buwe, um ebbes gemeeschaftlich zamme duh. Ich sott efders mit meim yingschde Bu Deitsch schwetze. Ich sott meh in Deitsch dichte un Deitsch lese. Ich sott mei “Vertreder” in Washington schreiwe un ihn etliche Dinger frooge. Ich sott meh Zeit finne fer die Veggel zuzuheere. Ed Quinter Allentown (PA)

WIE MER MEERREDDICH GMACHT HENN Yaahre zerick an der Grischtdaagzeit hawwich en ganz guuder Meerreddich an meim Schwaerdaadi seim Haus ghatt. Die Aage waare am Wessere, die Naas iss uffgemacht warre un der Schwitz hot uff der Schtaern in gleene Drobbe gschtanne. Ich hab ihn gfroogt, wu er es kaaft hot ghatt, un er hot geantwatt, ass seller in seim Gaarde gewaxe waar un er selwert es gemacht hot. Ich hab aa an sellre Zeit en Gaarde in meim hinnerschde Hof ghatt, un es neegscht Yaahr hot mei Schwaerdaadi en paar Watzle runnergebrocht un ich hab sie neigeschteckt in en Eck vun meim Gaarde drin. Wann’s Zeit im Schpotyaahr waar fer der Meerreddich zu duh, iss mei Schwaerdaadi runnerkumme mit seim eegne Essich HwD 1.12

un Zucker. Naachdem ass ich sie ausgeroppt un gewesche hab, sinn mir in die Kich neigange fer der Meerreddich zu mache. Ich hab kenn Meereddichreiwer ghatt, awwer mei Fraa hot eens vun selle neie essegschrodne Machine kaaft en paar Munete zerick. Ich hab der Meerreddich neigeduh un hab die Machine aagedreht. Oh Elend! Waar der Geruch awwer schtarick! Ich hab nasse Aage ghatt, un es Wasser waar an mei Gsicht am Nunnerlaafe. Mei Schwaerdaadi, wu wie ich aa ganz nasse Aage ghatt hot, hot gegrische, „Mach die Fenschdere uff; mir misse en bissel Luft hawwe dodrin.“ Es waar aarick letz, un sell hot net zu viel gholfe. Um selli Zeit rum iss mei Bu vun der Schul heemkumme. Er iss in die

Kich reigeloffe un hot gsaat, ass er am Lache waar, „Ich meen, ass des die eerschti Zeit waer, ass ich zwee uffgewaxne Mannsleit allebeed am Brille gsehne hab.“ Schpeeder, wann mehner Luft reikumme iss, hot mei Schwaerdaadi der Essich un der Zucker nei un hot’s faddich gemacht. Er hot net kenn Reseet gebraucht; er hot yuscht es gschmackt un en bissel vum Essich odder Zucker neigeduh, bis es recht waar. Un ich muss eich saage: Sell hot gut gschmackt, wann mir’s uff’s Schunkefleesch geduh henn. Es waar Druwwelwaert fer es zu mache. Es neegscht Mol, ass ich mei Mudder bsucht hab, hawwich sie die Gschicht verzehlt. Un was hot sie gsaagt? „Du Dummkopp! Weescht net, ass du der Meerreddichreiwer ausewennich am Hof yuuse

muscht?“ Ich meen, ich waer fer en bissel Mitleid am Suche gwesst, awwer ich hab ebbes schunscht grickt. Es wunnert eich verleicht, wie es gange iss es neegscht Yaahr. Nau, muss ich eich wisse losse, ass mir en Hundli ghatt henn. Eemol der neegscht Summer hawwich der Boomer, wie mir ihn gheese henn, drauss im hinnerschte Hof gsehne. Datt hot er an’s Eck vum Gaarde gschtanne, wu mir frieher der Meerreddich geblantzt ghatt henn, un er hot eens vun seine hinnerschte Beh uff in der Heh ghatt. Muss ich meh saage? Sell waar es letscht vum Meerreddich im Gaarde fer mich. Nau gehn ich yuscht zum Schtor un kaaf’s, wie all die annere Leit duhne! Larry Gradwohl Nazareth (PA) 5


Gedichte un Gschichte

SCHLECHTE RUMLEEFER Der yung Lewis Schumacher waar am heem laafe vun Henningsville, wu er gschafft hot uff der Billie Fox sei Bauerei. Er waar nau dreizeh Yaahr alt, un sei Memm hot gsaat, er kennt Arewet uffnemme drei Daag die Woch un wennich Geld heem bringe. Er waar schpoot Nammidaags, wie er zu die alt Scheier, neegscht zu Heem, kumme iss un hot gsehne, ass zwee Rumleefer uff die Scheierbrick ghockt henn un waare am Schmoke: eens en Grutzepeif un der anner hot en schtumbich Sigar ghatt. Des hot der yung Lewis wennich verschtaunt, wie er gsehne hot, ass ebber so neegscht an en Gebei am Schmoke waar, abbadich en Scheier. Wie er an die zwee verbei geloffe iss, hot er wennich genuckt un ins Vergelschdere iss er schtaricker geloffe un hot noht gschteaert schpringe fer Heem. Sei Memm, die Sarah, waar uff die Bortsch, wie er zum Hof neigschprunge kumme iss, un er hot sie graad verzehlt vun die Tramps, ass drowwe an die alt Scheier am Schmoke waare. Die Memm hot ihn graad gsaat, er sett gschwind naus an die Scheier geh un der Paep saage, was am aageh waar drowwe an die alt Scheier. Nau sett’s ausgelegt sei, ass die Schumacher Familie zwee Scheiere ghatt hot. Die grooss Heemet-Scheier hot iwwer die Schtrooss vun es Haus gschtanne, un es zwetti Scheier hot so en vaddel Meil der Weg nuff gschtanne vun die Heemetsblatz. Yaahre zerick hot aa en glee Haus datt gschtanne neegscht an die alt Scheier, awwer es Haus waar nunnergerisse warre, weil die W andbleck 6

Rumleefer uff ihrm Weg

schlecht un verfault waare. Der Paep waar die Geil am fiedre, wie der Lewis ihm verzehlt hot, was er gsehne hot drowwe an die alt Scheier. Der Paep hot graad gschtoppt un hot der Lewis gsaat, er sett die Arewet faddich mache. In eem Schtick fatt hot der Paep der yingscht vun die Geil, der „Coali“, aus em Schtall gfiehrt, iss uff ihn gedschumpt un blossbucklich abgeridde der Weg nuff gehich die alt Scheier. Der Lewis hot gewisst, ass der Paep in Engscht waar un hett gegliche fer mit ihm geh, awwer wie immer hot er sei Paep gfollicht un hot es Fuder ausgedeelt zu die Geil un die Kieh. Zehe Minudde schpeeder iss der Paep widder heem kumme un zu die Familie, ass nau gsammelt waar uff

die vedderscht Bortsch. Er hot verzehlt, ass er verschtennlich gschwetzt hot zu die Rumleefer un hot sie gsaat, sie kennte datt an die Scheier ruhe, awwer sie sette net schmoke so neegscht an es Gebei wehich Feier schtaerte. Er hot weiders gsaat, sie hedde gegrummelt, ihre Bindel uffgelese un sinn uff der Weg nuff gehich Henningsville gange. En Weil naach sellem hot die Schumacher Familie ghockt, ihre Nachtiems am Esse, wie der Cousin Benjamin Pilgert gschprunge kumme iss un hot „Feier“ gegrische. Die Familie iss vun der Disch gschprunge un hot glei gsehne, ass der Benjamin der Weg nuff gehich die alt Scheier gewisse hot, wu sie sehne henn kenne, ass dicker

Schmook in die Heh waar. Sie sinn all dabber der Weg nuff gschprunge gehich die alt Scheier. Wie sie hiekumme sinn, henn sie gsehne, ass es net die alt Scheier waar, awwer die Schuttscheier (= an old word for a temporary, four poled, thatched roof structure set up to shelter surplus hay on Pennsylvania Dutch farms) newe draa hot gebrennt. Die Oxe waare aus die Scheier drunne in die Wiss un weiders waar nix, ass ebber duh hot kenne. Es Schuttscheier Hoi iss schnell verbrennt, un bei alle Glick waar kenn Luft am geh, so kenn Funke sinn gehich die grooss alt Scheier hiegeblose. Es waar yuscht die letscht Woch, ass der Paep un sei Schwoger, der John Pilgert, die Schuttscheier uffgschtellt henn, un nau waar der Paep awwer froh, ass sie’s weit genunk weg vun die grooss Scheier gebaut henn. Der Paep sei neegschte Gedanke waare vun selli zwee Rumleefer, ass frieher datt rumghanke henn. Er hot aa gewisst, ass es nix badde deet fer hinnich sie geh, weil bis die Zeit hedde sie sich guud verschluppt. Die Yunge henn Wasser gebumpt un gedraage naach em Brennblatz fer die iwwerich Ember un Funke ausmache. Do waar alles gschwind verbei, un wie sie all uff dem Weeg am heem laafe waare, hot der Paep zu die Memm gsaat: „Der Grooss Gott waar bei uns der Nammidaag!“ Peter Fritsch Alburtis (PA)

HwD 1.12


Gedichte un Gschichte

'S ISS WINDER IM DAAL

Die Bledder sinn nau hunne, Sie rapple, wammer darich laaft. Der Siesswelschkann iss nau all verkaaft.

Grick die Siessgrumbiere vum Keller. Sie sette noch guud sei. Wann net, fieder sie zu die Sei.

Der Grund iss nau gfrore, 'S duht nix meh waxe. Awwer ich heer die Hinkel noch gaxe.

Die Buwe sinn nau am Falle setze, Sie gehne fer Muschgrotte an die Grick. Sie hoffe, sie sinn mit Glick.

Die Haase sinn am huppse, Ich heer der Welschhahne graehe. Ich glaab, bis mariye frieh hemmer Rege.

'S iss Winder im Daal.

'S iss Winder im Daal.

'S iss Zeit fer die Loos schlachte, Grick es Hackmesser un fang aa hacke. Ich kann die Schunke nau schunt schmacke.

Der Daadi saagt, „'S iss zu kalt fer Rege gewwe, Guck mol yuscht zum Fenschter naus.“ Er iss recht, 's gebt nau Schnee drauss.

Die Meed welle Schtricktaffe mache. Sie schmiere die Hend mit Budder. Grick kenns uff dei Frack oder du heerscht vun dei Mudder!

Die Micke sinn net zu wiescht, Die Keffer fliege nimmi meh. Ich glaab, bis maryie frieh hemmer Schnee.

Die Memm iss bissi am Quilte. Sie macht viel Schtich uff der Deppich. En latt Weibsleit kumme, un sinn kenns leddich.

Der Ox iss nau guud un fett, 'S iss glei Zeit fer ihn schlachte. Huddel dich, 's iss naach der Achte.

'S iss Winder im Daal.

'S iss Winder im Daal.

Der Daadi hockt uff sei Schockelschtuhl. Er hockt mit die Fiess in die Heh. Der Daag iss er drin, er schafft nimmi meh.

Grick der Iwwerrock raus, Der Schnee leit uff der Hiwwel. Geh nuff uff der Schpeicher un grick die Schtiwwel.

'S iss nau glei Grischtdaag. Grick der Gaul Halt an der Zaam. Mer gehne nau fer der Grischtdaagsbaam.

Der Schnee iss nau sex Zoll dief, 'S hot alles zugedeckt. Nau sehnt mer kenn Dreck.

Alles iss schee ruhich im Haus. Der Hund leit vanne am Feierblatz. 'S iss gaar kenn Blatz fer die Katz.

Mer muss nau Brennholz reihole. Geh naus zu der Holzshopp. Vergess net dei Hut fer dei Kopp.

'S iss Winder im Daal.  

'S iss Winder im Daal. Dankdaag iss glei do. Geh naus un such der Welschhahne. Mer sette aa gucke fer der Fahne. HwD 1.12

      Richard Savidge (Hegins, PA) „Hiwwe wie Driwwe Award 2011“

7


Gedichte un Gschichte

DIE MILLER BRIEDER O, mir singe, sing ich un du. O, mir blatsche, blatsche dazu So singe mir oft. Die Miller Brieder henn g’sunge fer viele Yaahr, awwer nau, ass mir elder sinn, duhne mir widder efter singe. Des hot gschtaert, wie mir noch ganz yung waare; verleicht iewens, eb mir gebore waare, mit dem, ass die Mom naach die Karich gange iss, eb mir Licht gsehne henn. Ich hab en Notion, ass mir mitgsunge henn, wie mir noch im Mutterleib waare. Ich kann gut erinnere, wie guud, ass die Dunkels Kariche Leit gsunge henn. Die henn net yuscht “in unison“ gsunge, awwer mir henn all die Schtimme gheert: soprano, alto, tenor un basso. Die Menner un die Weibsleit sinn net minanner ghockt an sellere Zeit. Uff ee Seit waare die Weibsleit un die Bobbelis, un an selle Seit henn mir soprano un alto gheert. Un wann mir wennich elder waare, henn mir ghockt bei die Mannsleit, un datt henn mir tenor un basso glannt. Solch Singes hot gut gewachse in uns, un mir henn gute Ohre grickt fer singe. Unser Mom un Paep, die Viola un der Herb, henn gheert, ass mir guud singe kenne, un aa, ass mir Musik aarick gegliche henn. So henn sie uns gfrogt, eb mir gleiche deete fer Lessons nemme, un was fer Instruments mir spiele wellte. So hot’s Drums, Guitar, Accordian, un Trumpet gewwe. An seller Zeit hot der Paep yedi Woch uns gfahre naach Virginville Station, wu mir der Tren grickt henn fer naach Reading rutsche am Penn Street, der Charlie Richards sei Musik Schtor. Des henn mir geduh fer paar Yaahre.

8

Bill, Bob, Russ, Dick and Lester Miller - die Miller Brieder

Awwer iwwerdem henn mir ausgfunne, ass mir spiele kenne “by ear“. So henn drei vun die Brieder oft gschpielt fer Hochziche: Guitar, Banjo un Accordian. Die menschte Leit henn Hochzicher Parties ghatt, wu sie Hoe Downs ghadde henn. Fer sell henn mir gut schpiele kenne darich „the 50’s“. Es waar yuscht paar Woche zurick, ass en Fraa zu mir kumme iss un hot gsaat: „Ihr Brieder henn g’spielt fer mei Hochzich in 1954.“ Ich hab sie nett erinnert, awwer sell war doch spassich zu heere viel Yaahre speeder. Mir henn net yuscht Instruments gschpielt; mir henn aa gsunge. Verleicht es erscht Schtick, ass mir fer annere Leit gsunge henn, waar: Found a Peanut. Awwer katzlich henn mir’s iwwergsetzt, un noh henn mir gsunge Find en Grundniss. Unser Eldre henn alsemol mit d’Wunnernaas (er hot sellemols en Radio Show ghatt) gschwetzt un henn ihm gsaat, ass ihre Kinner deete guud singe. D’Wunnernaas hot uns paarmol eigelade fer singe in sei Show, an Picnics, un mir henn fer ihn Find en Grundniss gsunge, un aa paar annere Schticker. Es gebt zwee Schticker, ass mir gsunge henn, seitdem ass mir noch ganz yung waare, un duhne die Schticker als noch singe allemol, ass mir en Show henn. Die zwee sinn Datt’s vatt I learnt in da Schul (so halwer Deitsch un

halwer English), un One Finger One Thumb Keep Moving (des henn mir aa iwwergsetzt zu Ee Finger, Ee Daume Bleibt am Geh). Die Beed henn aa Motions, un sell macht sie bissel spassich. In die 1950’s henn mir gsunge an Intermissions fer en PA Deitsch Show: So Geht’s Evva, en Play, ass der Parre Merril Ressler gschriwwe hot. Var sellem henn mir yuscht in PA Deitsch gsunge fer‘s Muddersprooch gut uffheewe. Awwer dann henn unsere Leewes sich viel verennert. Mei Brieder henn ihre Familiye gschtaert un henn ihre Tschabbs ghadde, un ich bin naach der Ludderische Seminary gange in Philadelphia, un naachdem bin ich am Breddiche gange, fer deel Yaahre in PA, un dann in 1969 bin ich un mei Familie naach Brooklyn, NY, gezoge. Datt hawwich gebreddicht fer baut 35 Yaahre, bis ich geretired hab. Darich selle Yaahre henn die Miller Brieder yuscht gsunge, wann die Familie zamme kumme iss. Awwer nau hawwich un die annere Brieder bissel meh Zeit fer zamme kumme fer Singe un bissel Dummheete mache. Oft sinn mir an Grundsei Lodsches, wu mir alles in Deitsch duh kenne, un in seller Weg kenne mir helfe, die Muddersprooch bissel lenger gebhalde. In die letschte paar Yaahre waare mir aa an der Kutztown Pennsylvania German

Festival. Datt duhne mir deel Schticker in Deitsch singe, so ass die Leit heere kenne, wie es laut, un mir verzehle aa deel Witze, un schwetze iwwer, wie‘s waar, wann mir yunge Buwe waare uff der Bauerei, un wie mir Deitsch gheert henn im Schtor, an der Grange, in der Karich, beim Balwierer, bei die Nochbere, schiergaar alliwwer, wu mir gange sinn, henn mir Deitsch gheert. 'S iss nimmi, wie’s waar, un sell duht mir leed, awwer mir kenne heit helfe fer annere Leit weise yuscht en bissel, wie’s als waar bei die Pennsylvanisch-Deitsche in Baricks Kaundi. Un so duhne mir als noch singe: O, mir singe, sing ich un du. Mir gehne an die Grundsei Lodsches, an die Kariche, un datt anne, wu die Leit uns eilaade. Der Eldscht vun die Brieder iss yetzt 75 Yaahr alt. Alsemol saage mir, ass mir singe duhne, so lang, ass mir uffschteh kenne un uns widder hiehocke fer sell Schtick singe Ee Finger, ee Daame, wu aa die Wadde sinn, Schteh uff, hock hie. Alsemol mache mir Spass mit die Idea, ass wann mir nimmi uffschteh un widder hiehocke kenne, misse mir solche electric Schtiehle kaafe. Weescht, die wu die ganz Sitz in die Heh geht fer die, ass die Grefte net henn fer selwert uffschteh. Mir meene, mir misste ganz langsam singe dann, bis die Schtiehl nuff un nunner geh kenne. Ya, mir sinn froh un schtolz, ass mir deitsche Leit sinn. Unser Mom un Pop henn viel gholfe fer des Kutztown Festival ans geh griehe. Sie henn hatt gschafft mit der Dr. Alfred Shoemaker un viel annere Leit, so ass es en Fescht als noch gebt, wu unser deitsch Schproch un Kultur uffheebt. Richard Miller Brooklyn (NY)

HwD 1.12


Gedichte un Gschichte

AREBSCHAFT Uff Owetschtunn Laaf ich rum Darich Wald un Feldre Ich verdenk mich iwwer alles Es Lewe Vun meine Voreldre Uff Owetschtunn, Laaf ich rum Un heer ich mein Hatz Un was ich finn, so dief drin Bleibt noch En groosser Schatz Yeder Daag, drauss im Welt Ich kann net Mich selwer helfe Alles wiescht, Unrein un bees Alliwwer zu sehne Der Himmel iss bloh, Der Barick griehn Naduur iss immer doch schee Awwer yeder Daag, Die Landschaaft vum Mensch Duht meiner Seel weh Uff Owetschtunn Laaf ich rum Darich Wald un Feldre Kumm ich zu En aldi Scheier Gebaut bei meine Voreldre Es schteht noch schtarick Darich Summer Un Winderschnee Frisch gemolt Sinn die Schilde Es gibt nix so schee. Yeder Daag, Drauss im Welt Die Landschaft, wu mir lewe Verennert daaglich schnell Sie baue, Nemme un verdeele Weil ihre Gedder Geld sinn Geld-narrische Menner, Ass es Land rumeniere Ihre Begierichkeit Watt die Welt fresse Uff Owetschtunn, Denk ich devun Die Weisheit vun HwD 1.12

Die Vergangenheit In der Dunkelheit Vun Middernacht Im meim Hatz Sei Gelassenheit

Grick en Subscription vun "Hiwwe wie Driwwe" ...

Gesegnet iss Em Mensch sei Hand Wie schafft er Freindschaft, Lewe un Land Ass liebt die Erde Un alles, ass waxt Ehrlicherweis grickt iss alles, Ass er hot Gesegnet sinn die Leit, Ass schtehe defor Ebbes bessers im Lewe, Ass kumme iss lang bevor Der Daag, wann Mensche ihre Zukunft verkaafe Fer weltlich Schtofft ihre Seele versaafe Uff Owetsschtunn Laaf ich rum Die Landschaft, Wu mir lewe Die Feldre, Wald, Grick un Schwamm Wu die Hollerbiere waxe

... un du grickscht vier Bledder “Gedanke Schliwwere” dezu! Please send me the next 4 issues of “Hiwwe wie Driwwe” and “Gedanke Schliwwere”. I know that the newspaper is a non-profit project. I donate: US-$ 12,00 / CAN-$ 20,00 (ken Cheques) / EUR 10,00 Name, Address

Es gebt en Botschaft Gschriwwe datt In die Beem un Blanse. In die Schtehfense Un die Scheier Duh ich Schtimme heere Sie saage Faricht net die Zukunft Du kannscht es besser mache Mir henn En groosi Arebschaft Ass waart, Widder mol zu waxe Leb fer‘s Land, fer Volk, fer Lewe Vun die Erde zu Hand, Vun Hand zu Seel Un alles, ass haeppent Watt zu Voll-Zaerkle Kumme. Daniel Riegel Mertztown (PA) 1985-2011 (in memoriam)

I would like to give the gift of “Hiwwe wie Driwwe” (4 issues) to a friend: Name/Address

Money or cheque is enclosed in the letter. I send a cheque or money order to your account in America: Account No. 650838, Mid Penn Bank, Millersburg, 349 Union Street, PA 17061, U.S.A. Ich überweise den Betrag auf Ihr Konto in Deutschland: Kontonummer 1152105100, Sparkasse Mainz (BLZ 550 501 20), Deitschland. Please send this form to: Dr. Michael Werner, Pfannenstiel 13, 55270 Ober-Olm, Germany.

9


Gschichte un Gedichte

ALT ZEIT SCHEIER SCHTELLING AN DIE STOLTZFUS HEEMET 'S

waar en scheener Mittwoch Maryie, Tschulei 27, 2011. In Sudd Baricks Kaundi waar es 70 degrees am Wedderglaas, en scheener Daag fer en Scheier Schtelling. Um 7 Uhr iss die Arewet aagfange uff die Nicholas Stoltzfus Heemet an Tulpehocken Road. Sell waar die Heemet gwesst vum Nicholas, ass gsettelt hot datt in 1771. Die Bauerei hot en nei Scheier gebraucht fer Artifacts un en Appartment fer die „ground keepers“. Die Riehle ihr siwwe Mann Schreinerleit henn aagfange schaffe. Der Newswanger 15-Donn-Graan iss uffgschtellt warre un hot die Freembalke annegschtellt. 'S iss nimmi, ass mer die Balke nei draage muss, wie des waar in die alte Zeite. Die Greizbendle waar gemacht, un der Zwischebalke waar anne geduh. Die Schreiner waare fleissich ihr leichte Hemmer am globbe. Draus an der Fuhrvorhof waare zwee Menner am schaffe. Der Graan Mann waar en guudi Arewet am duh. Yeder Schpann waar anne geduh mit grooss Achtung. Was fer Handwaricke nemmt‘s fer en Scheier baue? Die alte Deitsche henn als verzehlt, es nemmt en eewene Kopp, en Winkeleise un Yaahre vun Erfaahring. Un wann du en Balke darich saegscht, loss der Marick schteh. Die Riehle Schreiner sinn am Scheier mache fer iwwer 40 Yaahr. Scheier baue nemmt viel Handwarick. Die Balke sinn grooss, 8x8 Poschde, 8x8 Schpanne, 6x6 Schteiber. Alles muss zamme gehe in 1/16“ Maass.

Nicholas Stoltzfus Haus in Wyomissing (PA)

Des nemmt net en hunnert Mann fer die groosse Scheierbleck uffschtelle, wie es hot in die alte Daage. An 20 Minudde verbei nein Uhr waare die erschte Schpanne anne gelegt, noht waare die 8x8 Poschde im Blatz geduh. Der Zappe waar in der Zappeloch geduh, der Holzpin waar in des Loch gegloppt. Es waare en Dutzend Mann uff der Scheierbodde. Alle Mann henn ihr Blatz ghatt. Der Schreinerboss hot en scharf Aag uff alle Mann un an der Bohlescheier Babier. Er hot der Graan Mann die Hand gewwe, un der grooss Scheier Spann und Poschte iss nuff gange. Een Mann waar an yeder Poscht un hot der Zappe ins Loch geh mache. Der Noah sei Ark un Solomon sei Temple waar gebaut der Weg. Der Weg iss net verennert. Die neegschte drei Freems sinn noht nuff gange wie die erschte. Drauss uff der Hof waare die Schperrbalke ausgelegt, un der Graan hot sie nuff ghowe in ihre Addning. Der Vormann Hans hot die rechte Balke zamme

June 30 2012 10

geduh fer nuff ziehge in die recht Addning. Noht waar der Owwerhaus Balke anne geduh. Darich des, ass der Graan do waar, iss die Arewet leicht gange. Die Scheier hot drei Denne: en Dreschdenn, en Hoidenn un en Schtrohdenn. Die Hoidenn hot en zwett Bodde. In die alte Daage waar des der „Granary“. Die Balke waare anne geduh, un die Boddebords waare anne geduh. An zwelf Uhr waar Middaag. Des nemmt some Zeit fer all die Leit zamme gricke. Des waare baut 50 Leit, 15 Schaffleit un annere Guckers. Die Sheryl Klinnica un ihre Kochs henn en guud Esse gerischt ghatt. Glei dernoh waar es Zeit fer widder schaffe. Der Graan Mann hot der Graan gehe gemacht un hot die katze Schparre fer‘s Owwerhaus nuff geduh. Noht sinn die Suddschparre nuff gange, zwee uff emol, dann sinn die Natt Schparre nuff geduh warre. Alles hot wunnerbaaar guud gschafft. En National Geographic Bildmacher waar kumme

frieh der Maryie fer en Schreiwes mache vun der Scheier Uffschtelling. En anner Kall vun die Zeiding hot Scheier baue glannt ghatt un hot en Nagelsack un Hammer aageduh un waar am helfe, die Schparre fescht naggle. Er hot guud deheem geguckt, 25 Fuuss in die Heh sei Hammer schlenkere. An halwer drei waar der Graan faddich, un‘s waar Zeit fer der „120 Daaler der Schtunn Graan“ fatt schicke. Der 70 Fuuss Baam waar zamme geduh - un fatt iss er gange. So lang, ass es Scheiere gebt, gebt‘s aa schunt Scheier Uffschtellinge, un des waar en grooss Ding in alle die Amish Heemete. In ihre yunge Yaahre sinn die Amishe gleene Buwe mit ihr Daed gange un henn gholfe, wu sie henn kenne. Wann en Bu 16 Yaahr alt waar, hot er en Mann sei Arewet duh kenne an der Scheier uffschelle. In die alte Daage sinn 200 odder 300 Mann kumme vun weit rum fer helfe. Bis drei Uhr henn die Schreiner aagfange es Dach faddich gricke. Noht henn sie es Dach gedeckt. So wie die Sunn nunner gange iss, waar die Scheier faddich - en neie Sach an der Nicholas Stoltzfus Bauerei. So geht die Schtori vun sell Stoltzfus Heemet an … Sam Stoltzfus Gordonville (PA)

Address: Nicholas Stoltzfus Homestead 1700 Tulpehocken Road Wyomissing, PA 19610 USA

July 8 2012 HwD 1.12


'S English Eck

A RELIABLE SONGBOOK Some Wenger Mennonites noticed that their much loved German hymns were slowly but surely slipping away, as even some of their ministers have a struggle to read in the German language. In the words of Earl B. Martin, when he assessed their plight; “Es macht nix aus, wie Deutsch ass ebber meent, ass er iss, er iss doch noch Englisch, weil alles schunscht, ass er lest, iss Englisch!” About five years ago a group of various background Mennonites began to discuss the value of those old German Hymns every Monday night on a conference call instigated by Gary Blosser of Illinois. In the course of time Earl B. Martin learned that two skilled linguists of Illinois from the Amish Mennonites were involved in a word for word interlinear translation, in an effort to keep on teaching German in their fellowship. First they put out their 1632 confession of faith in the dual interlinear edition. Then their own hymnal „Sammlung von Schöne Lieder“ and the „Lieder Sammlung“ in both the Baer and the Güngerich versions. These linguists were Earl Shrock and Laurence

Kropf who also participated in the above mentioned conference talks. In the course of time Earl B. Martin, Panyan, New York, mentioned that he would be willing to have such a book made out of the Unpartheyisches Gesangbuch (if he had an advisory board to help him stay on track). This committee in addition to Earl was comprised of: John B. Shirk of MO, Paul H. Rissler of PA, Mervin N. Martin of PA and Phares Z. Horst of KY, and presto Earl Shrock and Laurence Kropf were commissioned to proceed with the translation. Carlisle Printing of Sugar Creek, Ohio, undertook the printing job and after several

years of work this book came out. They were delivered to Earl B. Martin’s home on June 14, 2011. They are now on sale below cost. They published 7.000 copies at a cost of over $110,000 dollars or about $15.30 per copy, but Earl is selling them for $10.50 per copy. The books are well received, as many people like to sing from them. Even the German is larger and much clearer because of having been re-typeset. Then the fact that a dictionary does not have to be located is quite an advantage. If these books will totally replace the old format is a question, but probably not. Today, July 24, they were first used in public worship in the Rushville

Congregation in New York used by the Wenger Mennonites when 160 new books were added. This was the first day of worship since their expansion. Earl B. Martin reported today that nearly half have been already distributed of the initial 7,000. I personally was not on the committee, but contributed some encouragement. I was asked to obtain permission from the Amish book committee to “work around” their 1995 copyright, which I succeeded in doing. Then also Earl asked me to write the introduction, which I endeavored to do. Also, was it right or wrong, I gave the new name to it: „A Reliable Hymnbook.“ My argument was that impartial does not say anything. Is it impartial as to who uses it, or is it unselective to the kind of hymns used? I concluded that „Unpartheyisches“ sounds as a negative word, but has been used for so many centuries that it has a positive meaning, meaning reliable or dependable. Shrock reluctantly accepted „Reliable“, but turned down the word „Hymnbook“ in favor of „Songbook.“ Amos B. Hoover Ephrata (PA)

Die Schreiwer Fritsch, Peter: 1945, wuhnt in Alburtis. Er waar en Schulmeeschter. Der „Peeder“ iss en Schreiwer un en Moler vun pennsylvanisch-deitsche Fraktur. Sei Text waar glese beim Kutzeschtettel Folk Fescht 2011. Gradwohl, Larry: wuhnt in Nazareth (PA). Sei Gschicht hot er glese beim Kutzeschtettel Folk Fescht 2011. Grube, Guy R.: Sei deitsch Breddich in „Gedanke Schliwwere“, es Supplement zu „HwD“, waar ghalde in die Zoar Lutheran Church an April 10, 2011, un erscht gedruckt im „Journal of the Center for PG Studies, Vol. 17, No. 4 (Fall 2011). HwD 1.12

Hoover, Amos B.: erscht gedruckt in Ephrata Shopping News (‘S Pennsylvanisch Deitsch Eck), July 24, 2011. 1980 in Madenford, Douglas: Reading, wuhnt in Howard (PA). Er iss en Schulmeeschter fer Hochdeitsch un zamme mit der Josh Brown en Buch „Schwetz mol Deitsch“ gschriwwe. Er hot en deitsch Blog uff „pennsylvaniagerman.de“. Miller, Richard: 1937 in Virginville (PA), wuhnt alleweil in Brooklyn (NY). Er waar en Parre un hot sei Lewe lang gsunge in die deitsch Mudderschprooch mit sei Brieder. Alleweil iss er am gucke fer en Heemet in Baricks Kaundi.

Riegel, Daniel: 1985, gschtarewe in 2011. Er waar en Musigant un hot in Mertztown gwuhnt. Sei deitsch Schtick hot er glese beim Kutzeschtettel Folk Fescht 2011. Quinter, Edward: 1950, wuhnt in Allentown (PA) un iss en Schulmeeschter - an en High School fer Hochdeitsch un beim Pennsylvania German Minor Program an Kutztown University fer Pennsylvanisch-Deitsch. Sei deitsch Gschicht hot er glese beim Kutzeschtettel Folk Fescht 2011 Savidge, Richard: 1937, wuhnt in Hegins (PA). Sei Gedicht hot er glese beim Kutzeschtettel Folk Fescht 2011. Fer sell hot er der „Hiwwe wie Driwwe Award for

Pennsylvania German Literature“ grickt schpeeder im Yaahr. 1965 in BethleSterner, Kevin: hem, wuhnt in Gilbertsville. Sell Text hot er gschriwwe fer‘s Kutzeschtettel Folk Fescht 2011. Stoltzfus, Samuel: 1943, wuhnt in Gordonville (PA) un iss en Amischer vun die Alt Addning. Er schreibt ebbes iwwer die Scheier Schtelling an die Stoltzfus Heemet abbadich fer HwD. 1965, iss der Werner, Michael: Drucker vun „Hiwwe wie Driwwe“ un Co-Founder vun die German-Pennsylvanian Association. Er wuhnt mit sei Familie in OberOlm im alte Land.

11


Aus‘m alte Land

Ferwas mer in Deitschland noch Elbedritsche am yaage iss heit noch guud bekannt (aa der Esel un Elefant fer Demokrate un Republicans).

Glaabt‘s odder net, awwer aa im alte Land browiere deel Leit, en Elbedritsch zu fange. In die Pfalz heesse sie „Elwedritsche“. HwD hot der President gfrogt vun die Association „Elwedritsche Verein 1982 e.V.“ im Schtettel Landau (Pfalz), ferwas sie sell duhne. Do sinn die Antwadde vum Wilhelm Hauth.

HwD: Henn dihr aa Glieder in Pennsylvaani, wu sie aa Elbedritschlicher yaage? Hauth: Nee, mer henn net, awwer mer deete gleiche in Contact kumme mit Leit datt driwwe im neie Land. Mer kann ferschur en Glied warre bei uns, un die „membership fee“ iss net meh wie 15 Euros im Yaahr. 'S iss wolfel.

HwD: Wann waarscht du es erscht mol en Elbedritsch am yaage – un henn dihr eens grickt?

HwD: Was henn dihr noch geduh in die letschte 30 Yaahr?

Hauth: Sell waar 1992 in en glee Schtettel neegscht zu Landau. Selli Nacht hawwich aa mei „Jagdschein“ (hunting permission) grickt. Un, glaabt‘s odder net, ich hab aa en Elwedritsch gfange awwer‘s iss mer fatt gschprunge am Blatz, wu ich es grickt `hab. HwD: Iss selli Elbedritsch Yacht noch en grooss Wese im alte Land? Wilhelm Hauth mit Sack un Ladann

selli zamme an en Essblatz fer en guudi Zeit hawwe un schwetze iwwer Elwedritsche. Ich weess net, eb die Leit driwwe in Pennsylvaani wisse, ass sell Gedier unser „national bird“ iss in die Pfalz. Newich sell browiere mer die paelzisch Mudderschprooch am geh halde un duhne Leit ehre, ass en latt geduh henn fer der „paelzisch Dialekt“. Mir henke aa „information boards“ uff fer Leit, ass mer net vergesse sett in die HwD: Wieviel Glieder henn dihr, un Pfalz. Eens waar fer der Thomas Nast, wu im Schtettel Landau gebor iss warre was sinn sie am duh es ganz Yaahr? un schpeeder gezogge iss naach AmeriHauth: Alleweil hemmer baut 120 Glie- ca. Datt hot er Pickters gemolt fer under. Eemol der Munet kumme deel vun nerschiddliche Zeidinge, un selli sinn Hauth: Wie der zwett Grieg verbei waar, hot neegscht kenn Kall odder Weibsmensch meh an die Elwedritsche gedenkt. Erscht der August Espenschied (1925-1986) hot in die 1960er Yaahre widder gschtaert mit sell. Schpeeder hot unser Association mitgholfe, sell Wese widder ans geh gricke. Alleweil gehne mer sex bis zehe Mol im Yaahr Elwedritsche yaage.

Hauth: Mir henn en Buch gschriwwe iwwer wie mer Elwedritsche fangt (es nemmt en Sack un en Ladann, en latt Dreiwer un een Sackheewer). Im Zoo in Landau gebt‘s een Blatz fer Elbedritsche. Mer kann sie datt begucke, awwer sie sinn en wennich bleed. Mer sehnt sie neegscht nie. Un mer henn in Museum im Schtettel Bad Dürkheim en Eck, wu mer die Bsucher weise, wie mer Elwedritsche fangt. 'S gebt en Elwedritsche-Schnaps, Elwedritsche Stickers, CDs un anner Schtufft meh. HwD: Wu sett mer en Brief anne schicke, wammer meh Information gricke will odder verleicht aa en Glied warre. Hauth: Mer kann mir en Briefli schreiwe: Wilhelm Hauth, Moltkestrasse 46, D-76829 Landau/Pfalz. Sell Interview waar gewwe in Hochdeitsch. HwD hot sell iwwergsetzt in Penna. Deitsch.

PRIVATARCHIV PENNSYLVANIADEUTSCHER LITERATUR PRIVATE ARCHIVE OF PENNSYLVANIA GERMAN LITERATURE DR. MICHAEL WERNER PFANNENSTIEL 13 55270 OBER-OLM DEUTSCHLAND

Nur Leit mit en Subscription gricke alle Issues vun "Hiwwe wie Driwwe" un unser Supplement “Gedanke Schliwwere”.

12

HwD 1.12


HwD 2012/1