Il prüm an da scoula 2020/21

preparedas cun premura. A nun ho pudieu esser memma difficil, però neir na memma simpel. Scha que ho do dumandas d’eiran las persunas d’instrucziun prontas davaunt il computer, prontas da respuonder a las dumandas e da güder inavaunt culla lavur. L’elavuraziun d’ün tema in gruppas ho sper la pussibilted da pudair comunicher cun oters eir pussibilto bgeras situaziuns divertentas. Ad ho nempe do situaziuns inua cha s’ho vis a fradgliuns e genituors chi nun haun fat quint da gnir filmos, a sun gnieus quintos stincals, las bes-chas chasaunas sun gnidas preschantedas ed üna vouta ho l’intera classa dafatta pudieu esser da la partida cur ch’ün scolar ho gieu da salver ün utschè chi d’eira melamaing svulo cunter la fnestra. Il salvamaint es però gratagio e la classa d’eira surleivgeda. La situaziun d’eira propi enorm difficila. Sper quist squitsch vaivan però tuots da cumbatter culla nouva, cha noss fich stimo e cher collega da lavur es dvanto amalo e cumbatta per sia vita. Üna situaziun fich emoziunela e pesanta causa cha nu s’ho pudieu güder ed incler la situaziun. Las temmas, ils pissers, las algordanzas, il squitsch e la bainvulientscha da la magistraglia haun però pissero cha tuots haun pruvo da sustgnair ün a l’oter e d’esser cò ün per l’oter. La pü bella novited daspö lung temp d’eira quella, cha noss collega d’eira turno darcho in val e saja a guarir. Da profuond cour giavüschains inavaunt buna sandet e guarischun. Las experienzas cull’instrucziun a distanza ans haun fat imprender üna pruna ed haun eir musso sü nouvas vias chi importan pel futur. E listess ho quist temp eir musso cler e net che rolla importanta cha la scoula ho surpiglio i’l minchadi da l’umaun e quaunt ferm cha’d es da stimer da pudair instruir ad iffaunts illa staunza da scoula. Da pudair imprender ün da l’oter e da lavurer insembel suot la survagliaunza da la persuna d’instrucziun ho üna granda valur chi’d es irrimplazzabla. Cur cha vains darcho pudieu avrir las portas da nossa banadida chesa da scoula vains propi gieu ün milli gust. Che dalet da pudair bivgnanter darcho a noss scolars e nossas scolaras in staunza da scoula e da pudair darcho lavurer insembel. Chi vess cret cha’ls iffaunts manchantessan listess üna vouta uschè ferm da pudair ir a scoula? Üna spüerta chi vain uossa dimena predscheda sainz’oter in ün möd tuottafat different. Per tuot ils pertuchos es que nempe finelmaing sto ün pass inavous in üna vita darcho ün pô pü normela. Cu vo que però inavaunt? Cu guarda our il futur? Gnaron las scoulas darcho serredas? Il fat cha’l virus da Corona es e restaro auncha per lönch temp omnipreschaint es displaschaivelmaing uschè e nu po gnir taschanto. Ad es però da fer il meglder our da la situaziun e pisserer da nu perder la spraunza. Iffaunts chi haun dad ir in quarantena u chi sun gnieus testos positivs paun listess seguir a l’instrucziun e que grazch’a cameras e microfons cha la scoula Silvaplauna ho organiso. Uschè po la magistraglia eir dis-charger a genituors e pisserer per ün ritem üsito per tuot ils iffaunts pertuchos. A resta be da sperer cha nus tuots restains sauns e cha possans uschè lönch scu pussibel lascher aviert las portas da nossa scoula e salüder ils iffaunts a bunura bod cun ün cordiel «Bun di».

A tuot ils iffaunts, genituors, magisters e magistras e collavuratuors da la scoula Silvaplauna-Champfèr giavüschains da profuond cour inavaunt buna sandet e buna spraunza. Sperains da gnir maister a temp cun quista pandemia da sgrischur.

Silvana Steiner-Vassella e Nadine Monatsberger

La scoula scu zona cun mascrina