Departementsverteilung 2017-20195

LA SCOULA ED IL VIRUS DA CORONA

Chi da nus vess penso cha’l muond as po müder d’ün di a l’oter in tela maniera e cha la vita nu saro mê pü la listessa? Il chavazzin «Corona» d’eira avaunt ün an ün pled pütost incuntschaint i’l vocabulari da l’umanited. Hozindi saun percunter dafatta ils pü pitschens che cha quist pled significha e che cha’l virus es bun da chaschuner. Da prümavaira avaunt ün an staiva sper bgeras otras scoulas eir la scoula Silvaplauna-Champfèr davaunt üna granda sfida. Ella ho stuvieu serrer sias portas per duos mais causa cha’l virus da Corona vaiva piglio il suramaun in nossa prüveda Engiadina. Üna situaziun tuottafat incuntschainta. Duos eivnas ho la magistraglia gieu temp da metter ad ir l’instrucziun a distanza e d’infurmer a tuot ils pertuchos davart l’andamaint per las prosmas eivnas. La sfida d’eira enorma, già be pensand al fat cha na tuot ils iffaunts nun haun gieu a chesa ün computer druvabel. Eir il stuvair accepter la situaziun da nu pü pudair esser preschaint culs iffaunts illa staunza da scoula ho pissero per bgers impissamaints plain anguoscha. Lavuro vains in quistas duos eivnas tuots scu mez nars e que suvenz fin la bunura bod sainza durmir bger. Sistems haun gieu da gnir sviluppos, elavuros ed exercitos insü ed ingiò per guadagner almain ün miel sgürezza. A la fin es que però gratagio da creer ün sistem efficiaint chi ho pussibilto a tuots da passanter taunt inavaunt bain quist temp schnuaivel. Eir il rimbomb dals genituors davart la lavur prasteda e l’organisaziun ho do radschun cha tuot ils fastidis haun mno al böt giavüscho. Ün cordiel grazcha fich a tuot ils iffaunts ed eir als genituors chi haun sustgnieu las idejas e las metodas d’instruir in quist temp pretenzius. Insembel essans stos buns da ragiundscher fich bger e da que pudains propi esser superbis.

Cu cha tuots as saun però metter avaunt nun es la lavur be steda fatta cun s-chaffir ün sistem druvabel, dimpersè la lavur concreta ho alura pür cumanzo inandret. La lezcha d’eira gigantesca: elavurer il materiel d’instrucziun in fuorma digitela, organiser laptops pels iffaunts, elavurer plauns da l’eivna per adüna duos classas e da nu schmancher adatter quels plauns per singuls iffaunts, preparer tuot il materiel stampo in mappas e guarder scha pussibel da nu schmancher ünguotta, registrer videos d’imprender ed organiser la scumpartiziun dal materiel resguardand las imsüras da l’uffici da sandet e cumbatter culla tecnica, chi nun ho adüna vulieu uschè scu la magiurited. Sper tuot quistas lezchas vains eir gieu da pisserer per l’egen bainster e der chüra da rester saun. Quist nouv möd da viver d’eira enorm: a s’ho lavuro da bunura bod fin la saira tard e nu s’es niauncha pü ieu our in üert a fer trais pass. Il temp d’eira simplamaing memma s-chars. Da correger las lavuors dals iffaunts infra ün’eivna d’eira eir spinus. Ad es nempe gnieu cussglio da lascher poser las lavuors almain da tuot trais dis causa cha quist virus malign surviva eir sün palperi.

L’instrucziun a distanza in connex culla pagina d’internet, chi’d es gnida elavureda da la magistraglia aposta per quist temp, ho güdo ad iffaunts ed eir a genituors da rester adüna al curraint dal nouv minchadi scolastic. Da la 1. fin 6evla classa haun tuots lavuro cul program TEAMS. Uschè haun tuots gieu la pussibilted da ster in stret contact visuel culla magistra e da pudair fer dumandas. Il fat cha’ls iffaunts haun eir pudieu telefoner ün cun l’oter es sto fich bel, uschè cha vains pudieu spordscher üna plattafuorma da comunicaziun per pudair rester in stret contact culla classa ed eir culs amihs. Cun plauns da l’eivna individuels stampos sün palperi ed eir publichos in möd digitel haun tuot ils iffaunts pudieu a la fin lavurer in lur tempo vi da las lezchas