НАРОДНАТА НОСИЈА ВО ОВЧЕ ПОЛЕ
Показател претставува и отсуството на вез иако и во овој регион везот се сретнува во вид на ситна везена бордура по крајните делови на долниот дел од женските кошули и на нивните ракавни завршетоци именувани со народен термин девојчиња. Причините за отсуството на вез засега останува недоволно јасен. Наместо вез украсувањето е заменето со една, секако, понова појава со украсни тантели во вид на декоративна бордура на долниот дел од ракавите, по рабовите од покривките за глава познати како сорки, цуцки и ои. Овој начин на украсување претставува дополнителна потврда за ориенталниот карактер присутен во оформувањето на оваа носија.26 Отсуството на женски горни клашнени или платнени облеки се толку карактеристични за некои делови од Западна Македонија што може да се смета како укажување за трансформациите што ги претрпела во таа смисла овчеполската носија. Може да се претпостави дека свој удел во ова имале веќе споменатите струења и доселувања што се случувале на овој терен. Потврда во прилог на ваквата претпоставка е наметнатото ориентално влијание. Наспроти отсуството на горни клашнени и платнени облеки може да се констатира дека подолго се задржал начинот на облекување кој што може да се поврзе со некои, постари облековни форми на што укажува облекувањето на двете специфични горни облеки направени од алаџа – шарено со назив елек. Како што е познато носење на два елека еден врз друг се носи во периодот на невестинството27, а при ваквото носење на горниот елек предниците, поточно полите, му се завртуваат наназад. Инаку, ваков начин на носење на горни облеки се сретнува во повеќе краишта на Македонија.28
13