mga hulagway ROMAN JOHN CAING
mga pulong LIBYA MONTES
dayon sa imong kagahapon
Dayon Sa Imong Kagahapon
4
Sa pagdahili sa lainlaing pagbati, ikaw giduaw sa mga anghel Diha, tunga-tunga sa lawom nga kahimatngon ug damgo. Sa imong pagbuka ang kalibotan nausab na. Ang kanhi mabulokon, lama na lang sa kagahapon.
Roman John Caing / Libya Montes
5
Sa tungatunga sa kabalaka, nagdali ka og mata. Apan ang sulog sa lamat, mitukmod kanimo palayo Ngadto sa lawom nga lilo, hantod nga ikaw hapo nga nag-inusara, Taliwala sa kalibog ug pagkalubog may tingog nga midahunog:
Dayon Sa Imong Kagahapon
6
“Ang mga binuhiang inalisngaw sa hunghong nanagtigom diri Uban sa ulan ug mga yamog nga nataligam-an sulod sa hunahuna Nagpabilin ug andam silang mohulat sa sunod nimong pagduaw Nga sayon ra nga matultolan diha ilawom sa imong pilok.�
Roman John Caing / Libya Montes
7
Busa, higala, sultihan tika: agaka kining mga butanga. Ang kalibotan padayon sa pagsibog lulon sa kinabuhi, kamatayon ug mga napakyas ta nga tinguha. Sama sa pagkalaya, ang bagong binhi sa ilang pagturok way gipili.
Dayon Sa Imong Kagahapon
8
Busa, higala, suginlan tika: dawata kini sa imong mga abaga. Bisan pa ang kalibotan may gibug-aton sa liboan ka pangaliyupo nga nag-ungot sa hangin, padayon ang pagkamas uban sa tinguha. Kita nga lumalabay lamang, gapnod sa kawanangang pagyukbo.
Roman John Caing / Libya Montes
9
Ang duha ka tribo nga nakaplagan didto sa Andamas (Habagatang Isla sa India) gihandom pa gihapon nato sila isip ang mga kataposang nangawala. Mga nagpabiling uhot batok sa atong pagkasibilisado; dugab sa kagahapong panihapon — makusganong nagdumili sa paglangoy sa balod tabok sa bag-ong kalibotan. Wa ba kaha sila masayod nga ang ilang lawas dili kublan sa mga langyaw nga sakit? Ila ba nga nahibaw-an nga ang pag-atubang nila sa kabag-ohan mao ang halok sa hinanaling pagkapukan?
Dayon Sa Imong Kagahapon
10
Makapahimuot biya pamalandongon nga bisan pa ang kinatibuk-ang banwa usa lang ka dakong baylehan sa mga nanaglambod nga tinguha, adunay mga paraisong giisip ta nga bartolina. Ug ang pagkagumon, lain-laing sangpit lamang sa managsamang ungo.
Roman John Caing / Libya Montes
11
Sa iyang pagpamalandong, si Rilke nakaamgo nga ang tanang anghel makalilisang. Apan taliwala sa iyang pagkalisang, makanunayon ang iyang pagsangpit ug pag-awit niini. Kay dili ba diay ang mga butang nga gikahadlokan, naghatag man kanimo og igong kahagkap? Dili ba diha-diha sa imong taslak adunay sulog sa kamatngon nga mikuyanap daw kilat sa nanagsangang paglamdag?
Dayon Sa Imong Kagahapon
12
Nan, kay ang kaanyag sinugdanan man sa kahadlok diin ikaw nagbarog ug nag-atubang sa katingala, lunlon ang sumpa nga mohapos kanimo diin ang pagbuswak sa usa ka bitoon motukob sa tanang masapnang kahayag. Natak-op na ang kataposang pamalandong sa usa lang ka piyong. Diha sa imong pag-awit ang nagpabiling nota sa pagpanaw matam-is daw luha sa mga anghel nga inday-inday nga natagak sa yuta. Saad sa bag-ong kinabuhi.
Roman John Caing / Libya Montes
13
Ang mga mananap nga mihalok sa tiilan sa kilomkilom tingali mao lamang ang adunay katungod nga motulisok sa ilang sangpotanan. Kay di ba diay sa yanong meditasyon diri nasuta ang pagtahod ug pag-ila niini sa Magbubuhat? Sa ilang pagtuyok-tuyok, ang mga muslim nga Sufi didto sa Turkey, nitandi sa ilang kaugalingon sama sa mga planeta.
Dayon Sa Imong Kagahapon
14
Adunay rason ngano ang haring adlaw gihangop sa nagkadaiyang kasaysayan ug kultura sa karaang panahon isip usa ka bathala. Ug ang bugtong kahayag nga susamang makaplagan diha sa takna sa kamatayon ug sinugdanan sa uniberso mao ang kataposang kidlap nga nisugat sa lumalabayng mananap sa wa pa kini mihalok sa nagngising tapaludo.
Roman John Caing / Libya Montes
15
ang distansya sa pagpangluod sa punoang gibiyahan sa iyang mga dahon, masukod kini sa bawog sa iyang pagtikuko. ug ang tuyhakaw sa tudling sa tanom mao ang timailhan sa paglugnot niini sa yutang buot molubong niya sa kalimot.
Dayon Sa Imong Kagahapon
16
Unsang parteha sa pailob ang imong nakat-onan sa pagkakaron? Ang hitas-on ba sa hulat nga naghatag og katam-is sa kadaogan? O ang kalapad sa panganod dihang ang hangad matang sa pag-ampo? Di ba ang paghalok sa yuta usa man ka sagradong pagtamla?
Roman John Caing / Libya Montes
17
Tugob sa paghandom ang alampat ni Rabindranath Tagore. “Makapanglimbawot nga kakahoyan nga may teksturang nagdayan-dayang ribiti sa pagpiso ug wiris-wiris sa lapis, o dulom ug subo nga punoan, imaheng anino batok sa daw mutyang salumsom,� matod pa sa usa ka higala dihang gipangutana mahitungod sa usa niini ka obrang way ulohan.
Dayon Sa Imong Kagahapon
18
Bisan pa sa ka yano sa pagduwa niini sa hanoyng bulok, way lansis kining mikab-ot sa kalag sa kalinaw ug kagawasan. Ug kon akoy pangutan-on kabahin sa imahe ni Tagore, kini “ang kinatibuk-ang pagpadayag sa tim-os nga kaanyag diin ang kalikopan ug langit naggakos sa kataposang higayon sa dili pa ang mga linalang taliwala niini magkatibulaag sa paghangop sa kahuyang sa kinabuhi diin sa damgo lang matultolan ang panghupaw.
Roman John Caing / Libya Montes
19
Dinuphang langit may saming gisud-ong taknang midapit sa sepyang palis sa paghandom bughaw tin-aw kantil kisaw kayab hut-ong bugtong binuwakang kahayag sa dag-om ug kisdom
Dayon Sa Imong Kagahapon
20
Tanang awit matang sa paghimaya. Tanang himaya pagpanuktok sa ganghaan sa kagahapon
Roman John Caing / Libya Montes
21
Dayon Sa Imong Kagahapon
22
dayon ang tanan modayon sa la(s)ang sa kagahapon.