Dialuna, Februari 13, 2012
Pagina 6
Pa cuanto tempo mas partido AVP lo sigui gaña e pueblo di San Nicolas?
Despues di e tal Otmar, awor ta Mike Eman a dicidi di basha kwashi pa loco den e bario di Village
STA. CRUZ -- “Bo por gaña nos un biaha, bo por gaña nos dos biaha, pero bo no por gaña nos pa semper”, esaki ta e mensahe cu e habitantenan di San Nicolas tabata tin pa Mike Eman y henter su gabinete, na momento cu e promer mandatario – acompaña pa e Minister di Relacionnan di Reino, sra. Liesbeth Spies – a bay den e bario di Village siman pasa pa devela un borchi di e proyecto ‘Pinta Bo Bario’. Hecho ta cu na lugar cu e habitantenan di San Nicolas mira un maneho di gobierno dirigi riba un desaroyo economico positivo y creacion di cuponan di trabao duradero den e districto aki, nan por a experencia con e ministronan di Gabinete Eman - cu bleki verf y kwashi den man - un biaha mas a bay cabez pariba y p’asina nan bolbe kwasha algun cas y edificio den San Nicolas. Promer tabata e tal Otmar cu a kere cu e por desaroya San Nicolas completamente door di
tira un man di kwashi aki y tira un man di kwashi aya, pero sin ningun resultado positivo pa loke ta creacion di cuponan di trabao duradero den e districto aki. Awor nos ta haya e pintor Promer Ministro Mike Eman mes cu tambe kier tira santo den wowo di e habitantenan di Village door di haci un show na momento cu su persona y e Minister Hulandes sra. Spies a duna inicio na pintamento (verfmento!) di e casnan den e bario aki. Ta visto caba pa e habitantenan di San Nicolas cu e tiramento di santo den nan wowo ta inherente na familia Eman y partido AVP. No mester lubida con den pasado e ruman di Mike, esta exPromer Ministro Henny Eman tambe a tuma e pueblo di San Nicolas haci na momento cu den Lago Sport Park el a hiba un discurso primintiendo e pueblo aki ‘Jobs, Hope and Prosperity’. Pero kico el a haci algun luna despues? Su gobierno di AVP na Januari 1988 a firma cu West Coast y
Schotte B.V. un acuerdo pa desmantela e refineria Lago completamente y pa despues bin cu e plan macabro pa muda e planta di WEB pa e area contamina di e refineria aki. Pues ta visto cu bao di e promer gobierno di AVP nan no a crea ningun Jobs, no a crea Hope y siguramente no Prosperity y a converti San Nicolas den un ‘ghosttown’ completo. Mentira y mas mentira di AVP: Un otro prueba con familia Eman y partido AVP ta manipula cu e pueblo di San Nicolas tabata durante Gabinete Henny Eman, ora cu un barco di Marina a dicidi di mara na e waf di San Nicolas, ya cu no tabata tin lugar mas na e waf di Playa. E tempo ey ex-Premier Henny Eman no a perde pa gana, a gara e oportunidad aki cu dos man y a dicidi di bay cana dilanti hunto cu un grupo di e marineronan tur na blanco bisti door di cayanan di San Nicolas y a declara publicamente cu ta danki na e maneho y vision di su gobierno di awor en adelante e pueblo di San Nicolas lo bay conoce un desaroyo turistico sumamente positivo. Sinembargo e barco cu marineronan a bin un biaha so, no a bolbe nunca mas y San Nicolas no a conoce ningun desaroyo turistico! Pero e racha di mentiranan di familia Eman y partido AVP no a caba aki, pero a sigui ora cu na aña 2000
nan a bin cu e famoso Plan di Bario pa entre otro e districto di San Nicolas. E resultado ya tur hende ta na altura caba di dje, esta cu 52 miyon florin a desaparece for di Fondo Desaroyo Nobo San Nicolas. Pero mescos cu e borchi ‘Pinta Bo Bario’, e Plan di Bario tambe a conoce develo di un borchi door di Henny Eman, pero al final e Plan di Bario aki no a crea ningun proyecto y ta solamente borchi, cadushi, tuna, mata di kwihi y onkruid a keda atras. Pues pa di tantisimo vez e pueblo di San Nicolas a ser engaña malamente door di partido AVP! Pueblo di San Nicolas desapunta: Awe cu Gabinete Mike Eman tin 2 aña y 3 luna den gobierno, ta un berguensa pa mira con Mike Eman durante su bishita na Village siman pasa a sinta gaba e Minister Hulandes con bunita nan ta bezig ta verf e edificionan, con bunita e watertoren lo bay keda despues di restauracion, con dushi e hendenan ta fiestando den e Carrubian festival, pero cu tur e supuesto proyectonan aki no a crea ni un solo cupo di trabao duradero pa e habitantenan di e districto aki. Henter e pueblo di San Nicolas a keda hopi desapunta, ora cu nan a mira Promer Ministro ta devela e borchi ‘Pinta Bo Bario’, ya cu sinceramente nan a spera cu e lo a devela un borchi indicando
cu lo bay construi na e sitio ey un hotel, un hospital, un fabrica, un shopping center of cualkier otro proyecto grandi cu lo crea cuponan di trabao duradero pa e districto aki. Hecho ta cu Mike Eman no por a hiba e Ministro Hulandes na ningun proyecto entama pa Gabinete Eman, ya cu no tin ningun riba nan nomber y cu tur e ultimo proyectonan na San Nicolas ta herencia di Gabinete Oduber, esta entre otro Centro Medico Nobo SN, casnan social na Cura Cabay, casnan social na Palisiaweg, Centro Cuido pa nos Grandinan na Palisiaweg, edificio di SVB, Busstacion, Area Comercial di Arubus, Setar Teleshop, renovacion di 6 school, renovacion di Biblioteca Nacional, e 10 mulinanan di biento na Vader Piet etc. Poco poco e pueblo di San Nicolas mes ta mira con Gabinete Mike Eman y AVP ta convirtiendo nan districto den un ‘forgotten city’ of ‘ghosttown’, ya cu te hasta pa capricho politico e gobierno aki no kier continua cu e proyecto di un Centro di Cardiologia pa San Nicolas cu a ser laga atras pa Gabinete Oduber. Esaki ta e danki cu e votadornan di AVP ta haya for di e gobierno cu nan mes a pone ey nan, un gobierno cu mester construi, pero cu tur dia ta desgraciando e pueblo noble di San Nicolas.