Diahuebs April 24 2014
Pagina 16
Minister di Salud, Deporte y Cuido di Nos Grandinan ta invita tur mucha pa participa den Weganan di Rey 2014
Minister di Salud, Deporte y Cuido di Nos Grandinan, Dr. Alex Schwengle ta extende un invitacion na e comunidad henter pa bira parti di e actividadnan
cu lo tin den cuadro di Dia di Rey. Manera ta conoci, cumpleaños di Su Mahestad Rey Willem Alexander lo wordo celebra den grandi cu yen
di actividad y weganan pa nos muchanan. E dia di celebracion a wordo stipula door di e comision organizador den Reino riba diabierna 25 di
April 2014 y ta coincidi cu e siman di vacacion escolar. IBiSA, Instituto Biba Saludabel y Activo, ta e instancia encarga cu e celebracion di ‘Weganan di Rey 2014’ y esaki ta bay tuma lugar na 3 localidad cu e meta di duna oportunidad na un cantidad mas grandi di mucha pa participa y celebra e dia aki, Minister Schwengle a duna di conoce. E lugarnan caminda e actividadnan lo tuma lugar ta San Nicolas na IBiSA Sport Centrum situa na Dr. Schaepmanstraat 52. Otro localidadnan ta na Parke Curason Jaburibari y Plaza Turismo Linear Park. E actividadnan riba diabierna ta cuminsa pa 8’or di mainta y ta caba pa 12’or di merdia. E
dia aki e muchanan lo inicia nan actividad cu un desayuno saludabel sigui pa actividadnan deportivo, baile y musica. Minister di Salud, Deporte y Cuido di Nos Grandinan ta remarca cu e participacion na e actividadnan aki ta completamente gratis pa muchanan entre 6 y 12 aña di edad. Sinembargo, door cu e lugarnan ta limita kier pidi e mayornan pa inscribi e muchanan cu ta participa y tambe na cua di e localidadnan. Por inscribi atravez di ibisa. socialmedia@gmail.com of tambe personalmente na oficina di IBiSA situa na Frankrijkstraat 1 of IBiSA Sport Centrum San Nicolaas Dr. Schaepmanstraat 52.