AWEMainta.com
Local 13
Diabierna 23 di November 2012
RED ta pidi respet pa derecho di esnan cu necesidad special
“NOS ta aplaudi e iniciativa di e Plataforma Derecho di Personanan cu Limitacion Aruba, cu ta organiza un seminario na ocasion di Dia Internacional
di esnan cu Limitacion dia 3 di december proximo. Tambe nos ta aplaudi Cruz Cora cu ta organiza dia 1 di december un Paranda di Bochincha pa con-
cientiza nos comunidad riba e derecho di esnan cu limitacion”, asina Rudy Lampe a duna di conoce ayera den conferencia di prensa.
Dia 28 di october ultimo e miembrecia di partido RED a aproba e programa pa eleccion 2013 cu ta contene e siguiente
punto di accion tocante derecho di esnan cu necesidad special. N’e reunion di RED a palabra pa no usa e palabra “persona cu limitacion” sino “persona cu necesidad special”. “RED den gobernacion lo haci henter Aruba, cuminzando cu tur edificio di Gobierno, acesibel p’esnan cu necesidad special.
Otro medida cu RED den gobernacion lo tuma pa respeta nan derecho ta mas posibilidad y apoyo pa nan por huur instrumento of aparatonan, manera rolstoel; cambia nos ley di trafico pa haci posibel e uso di autonan special, manera e uso di autonan di 20 km. pa ora sin tin rijbewijs; extende carta di dokter na nan cu ta duna nan e derecho di por parkeer riba trottoir of lugarnan special; haci Playa comercial full acesibel pa nan, pensando tambe riba nos turistanan crucero; invita FCCA pa traha casnan pa nan den proyectonan nobo; pone fondonan disponibel pa por adapta casnan p’asina nan por keda biba na cas enbez di bay den un institucion; tur trottoir mester conoce facilidad pa rolstoel of ‘scootmobil’; motiva dunadornan di trabao pa tuma nan den servicio.” (www.redaruba.org) Tambe e programa di RED pa eleccion 2013 ta bin cu otro idea inovativo pa Aruba, esta pa integra muchanan cu necesidad special den e scolnan existente y no crea scol apart pa nan: “Meta di educacion ta tambe pa siña conbibi cu otro y parti di e diversidad aki t’esnan cu tin algo special of un necesidad special. No por tin scol apart p’esnan cu tin necesidad special. For di chikito tur mucha mester siña biba cu diversidad, cu tur tin derecho pa tey y pa ta feliz,” segun Rudy Lampe.