8
Local
Diabierna 22 di Februari 2013
AWEMainta.com
Minister Hooyboer-Winklaar:
Porfin nos conoce ley contra intimidacion sexual na pia di trabou
PARLAMENTO di Aruba a inicia
cu tratamento di e cambionan den e codigo civil di nos pais, entre cual lo bin varios cambio. Un di nan tin di haber cu e fenomeno di “sexual harassment” na pia di trabou. Minister Michelle HooyboerWinklaar a splica cu esaki lo ta un cambio importante, specialmente pa nos hende muhenan. Aunke cu e ley no ta distingui mal comportacion sexual entre hende muhe of hende homber, toch den practica hopi bes ta e ser femenino ta e victima. Claro cu e persona cu acusa un otro sexualmente ta persiguibel pa ley, pero e cambio awor ta den direccion di e doño di trabou. E ley ta bisa cu e doño di trabou mester sigura cu
e trahado no ta wordo exponi na ningun sorto di comportacion of accionnan cu ta relaciona cu nan sexo. E doño di trabou mester sigura cu e dignidad di e empleado no ta wordo viola, pio pa esaki conduci na un ambiente di trabou di intimidacion, di hostilidad, di humiyacion of te hasta ofensivo. Ta referi aki na cualkier forma di actonan verbal, no verbal of fisico, pero cu un conotacion sexual. Aunke cu no tin un guia pa con atende cu “sexual harassment” na trabou, toch ta stimula tur dunado di trabou pa instala conseheronan of pa tin un oficina di keho. Consecuencia di “Sexual Harassment” ta cu e ambiente na trabou ta daña y specialmente pa e victima. “Mi ta contento cu e cambio aki, pasobra pa nos ta importante pa evita y preveni e tipo di actonan asina mas tanto posibel”, asina Minister Michelle Hooyboer-Winklaar a duna di conoce. Trahadonan mester por sali contento for di cas pa bay trabou, y no cu ta bay forsa y pensando cu ey e su honor y dignidad lo wordo viola dor di un hefe of colega, djis pasobra e no kier perde su trabou. “Cu e cambio aki awor, e director di e compania ta obliga na evita e tipo di comportacion nan aki y mas ainda, e ta obliga pa actua asina cu e haya un keho”, asina e mandatario a splica.