AWEMainta.com
Diaranson 11 di Juli 2012
Local 11
Rotaract Club of Aruba a instala board nobo pa aña 2012 – 2013 Recientemente Rotaract Club of Aruba a celebra su cambio di directiva. Durante un anochi ameno cu a tuma luga na La Bodega a despedi di e directiva 20112012 y a celebra e exitonan alcansa durante e periodo menciona. Ademas a yama bon bini na e directiva nobo pa e periodo 2012-2013. Palabranan di exito ta bay na tur e miembronan di e directiva 2012-2013 cu ta consisti di Presidente Mr. Marc Ponson, Vice-Presidente Ms. Emilie Arends, Secretaria Ms. Jessica Wolter, Tesorero Ms. Diza Diaz y Director Club Service Ms. Thais Lopez. E directiva saliente ta consisti di Presidente Ms. Carolina Lopez Paz, Vice Presidente Mr. Marc Ponson, Secretaria Ms. Emilie Arends, Tesorero Ms. Mireille de Miranda. Dr. Arthur Vallejo a presenta durante e anochi un resumen di e proyectonan y actividadnan realisa durante e periodo cu a culmina. Tambe e Presidente saliente a elogia y gradici e directiva saliente pa e gran aña. Alabes ariba e anochi aki Ms. Carolina Lopez Paz a ser scogi como e persona cu a conduci e miho proyecto pa aña 2011-2012 cu tabata e proyecto Un P’ami Un P’e durante luna di December y tambe Ms. Jessica Wolter a wordo scogi como miembro di aña 2011-2012.
Rotaract Club of Aruba ta un organisacion pa hoben profesionalnan y studiantenan di estudionan avansa. Rotaract Club of Aruba hunto cu e clubnan di Bonaire, Curaçao y parti oost di Venezuela ta forma parti di e districto 4370 di Rotary International. E club di Aruba a destaca su mes inmensamente ariba nivel distrital ricibiendo no solamente e premio pa e miho avenida di Servicio na Comunidad pero tambe e premio pa e miho proyecto realisa conhuntamente cu un otro club di e districto. Durante e temporada aki e club lo ta promoviendo un biaha mas miembresia nobo. Tur hoben profesional of hoben studiante di estudio avansa entre 18 pa 30 aña di edad cu ta interesa na traha pa nos comunidad tanto local como internacional, desaroya nan cualidadnan personal y profesional y comparti momentonan di amistad y compañerismo na un manera special, ta keda cordialmente invita pa bishita nos Facebook page: Rotaract Club of Aruba pa mas informacion tocante nos actividadnan y eventualmente pa informacion di contacto. Rotaract Club of Aruba kier a gradici un y tur cu a forma parti di e anochi aki, y ta desea e directiva nobo hopi exito.