APPEL BLATJANG: 1 kg groen appels 375ml bruinsuiker 125ml lemoensap 5ml gemaalde gemmer 3 knoffelhuisies, gekneus
1 groot ui, gerasper 375ml asyn 3 brandrissies, fyn gekap sout na smaak
Skil en ontkern appels. Rasper die appels. Meng al die bestanddele goed saam. Laat prut dit ongeveer 40 minute lank totdat die blatjang dik en souserig is. Skep die blatjang in warm gesteriliseerde flesse en maak seker dat daar geen lugblasies vorm nie. Verseël dit. Bewaar die blatjang op ʼn koel droë plek.
PIESANG BLATJANG: 12 geskilde piesangs, in ringe gesny 2 groot gekapte uie 15 ml kerriepoeier 15 ml sout 2 stukke pypkaneel
250 ml sultanas 250 ml suiker 500 ml wit asyn knippie rooipeper
Meng die bestanddele in 'n geskikte kastrol en prut stadig tot dik. Kook sonder 'n deksel en roer gereeld omdat dit baie maklik aanbrand. Die blatjang behoort binne sowat 35 minute dik en geurig te wees. Proe en verwyder die kaneel. Skep in gesteriliseerde flesse.. Bewaar om ryp te word.
WARM MANGO BLATJANG: 1,5kg groen mango's, geskil, gehalveer, ontpit 2 liter water 600ml asyn 'n stuk vars gemmer, geskil en fyngekap 10 ml rissiepoeier 125 g pitlose rosyne
70ml sout 500g suiker (625 ml) 125 g dadels, ontpit en gekap 6 knoffelhuisies, gekneus 1 kaneelstokkie
Kap die mango's in klein stukkies, plaas in 'n mengbak. Sprinkel sout oor en voeg water by. Bedek en laat 24 uur staan. Dreineer die mangostukkies en plaas eenkant. Plaas suiker en asyn in 'n kastrol en verhit tot kookpunt, verminder die hitte en laat prut totdat die suiker opgelos is. Roer voortdurend. Voeg die gemmer, knoffel, rissiepoeier, kaneelstokkie, rosyne, dadels en gedreineerde mango by. Verhit tot kookpunt, verlaag die hitte en laat 1 tot 2 uur onbedek prut of totdat die blatjang dik is. Roer af en toe. Verwyder die pypkaneel. Skep die blatjang in warm, gesteriliseerde bottels en verseël.
KWEPER BLATJANG: 500g kwepers in baie fyn stukkies gekap 250g pitlose rosyne 15ml fyn koljander 500ml bruin asyn 15ml fyn gemmer
2 groot uie, gekap 2 knoffelhuisies, fyngedruk 15ml growwe sout 1 skerp rooi rissie, fyn gekap 375ml bruin suiker
Meng al die bestanddele in 'n groot kastrol. Kook stadig tot mooi dik en donker van kleur -sowat 2 uur lank. Bottel in gesteriliseerde flesse. Bêre op 'n koel donker plek om ryp te word vir minstens 'n maand. Lekker eet!
17