Issuu on Google+

<台灣十二月天 - 台灣色水 > 作者:郭文玄


評論


米羅‧卡索 - 卡車斯基(蘇紹連)評<素素仔叨好>-    福爾卡庫以巧緻、有芳氣的「材盒仔」比喻成精美的詩作,描寫材盒仔外 表裝飾:「縳一條金色閣抹金粉/幼幼的錦緞/閣配幾蕊仔/出色的/看袂出 真假的金 花」,好比說現代詩修辭精雕細琢,寫材盒仔裡面:「掀開材盒仔/ 半透明/有雅緻圖樣的玻璃紙/包著絲仔的錦盒仔底/色紙做的幼索仔/真細 膩縛咧/手工織 的/細細的仔的袋仔」,同樣是講現代詩的做工品質,連內裡 意象亦推敲錘煉,疏忽不得,現代詩是生活用品的「材盒仔」,也是藝術品的 「材盒仔」,實用與欣賞 兼具。至此,是作者福爾卡庫完整的詩觀嗎?不是, 真正精彩的詩觀在最後五行: 幼秀的袋仔內底 一的細細塊的 材牌仔 工筆雅氣的毛筆字 寫講: <不知所云>    「材盒仔」外表的美,我們看得懂,「材盒仔」內在的功用,我們也懂, 但「懂」就是「材盒仔」的價值嗎?同樣的,詩的價值是什麼?詩真正的本質 是什麼?福 爾卡庫說:「不知所云」,是反諷,還是直指詩心,道出詩的面目? 因為「材盒仔」的作者將他的隱喻放入盒中,也因為人們太過於受材盒仔的裝 飾迷惑,所以題上 「不知所云」讓大家來思考反省,其目的達到了,而詩題 「素素仔叨好」五字將是現代詩繼續探索而能推陳出新的一種動力,台灣詩壇 這種詩的風貌有待發揚。 -節錄<台灣日日詩>2004 年 12 月份詩評 ( 2005/01/20)

林廣詩評<欲暗仔的觀音山> 「福爾卡庫<欲暗仔的觀音山>,則是以冷靜的筆觸,寫出『暮歸的漁船仔』。 觀世音的『千手,千眼』,在詩中或虛或實幻變形象。最後當『暮歸的漁船仔 / 駛過 ~ / 河裡的山稜,化做 / 算袂清的 / 千眼,千手』時,山水與人文頓時結合 為一,鋪展了一幅奇妙的畫面。」 -節錄<台灣日日詩>2005 年七月份林廣詩評<在凝練中找尋夢的微光> (2005/8/20)


李勤岸詩評<蟬的叫聲> 「、、、因此作者在淡水渡船口觀察蟬叫的景象,描摹台灣夏天的主題音樂, 清晰描繪,宛然一幅有聲的油畫。」 -節錄<鹽分地帶文學>雙月刊創刊號李勤岸台語詩導讀-2005/12 月號

賴芳伶詩評<行入去有日本厝的巷仔> 「、、、而<行入去有日本厝的巷仔>這首,光看詩題,就勾起無數初老年紀 的人,往昔的時光和記憶。適如詩中所述:『日本式的大厝 / 紅磚仔角的牆圍 仔 / 斜斜,烏瓦的厝頂 / 懸懸,掩天,青蘢蘢的大欉樹仔』,帶有一種含蓄的富 貴風情。然而,不管這掩翳的權勢象徵如何屢經風霜,對絕大多數的台灣子民 來說,還是永難企及;因為『較早,是中華民國-軍公教人員的宿舍 / 閣較早, 是日本時代-日本人的徛家厝』,至於『政權,是按怎替換 / 世事,是按怎牽 纏』,至今猶然困擾著我們。由於詩中置入真實的人名地景與時間,使許多中 老年的讀者,更家感懷良深,但對年少一代的讀者來說,恐怕就不免隔閡了。 詩的末尾切入自然看似靜肅,其實綿綿風發的生機,彷彿反襯了歷史的沉重與 哀愁。、、、、」 -節錄<台灣日日詩>2006 年四月份賴芳伶詩評<以愛和誓言祝福> (2006/5/26)

李勤岸導讀 <台灣人精神(1)曹永和> 對台灣史、台灣意識非常專注書寫的福爾.卡庫看來是開始詩寫台灣史了。第 一位書寫的對象就是台灣史史學家曹永和。曹先生未曾拿過學位,靠自學苦讀, 嚴謹治學鑽研台灣史,成為台灣唯一能參閱古荷蘭文獻的學者,中央研究院聘 為 院士,傳為學界佳話。曹永和個性溫文儒雅,詩人掌握了學者的性情、風範與 風 骨。曹院士「一支恬恬古意的筆,寫出台灣的身世,寫出台灣的面形」,我們 也 期待詩人一支恬恬古意的筆,寫出台灣島史,寫出台灣人精神。 -(<鹽分地帶文學>第 4 期-2006/6 月)


Li Siok-hong<台語現代詩植物的書寫>論文 論<台灣十月天-欒樹開花落塗籽> 「、、、福爾卡庫也描畫台灣欒樹 kap 台灣 chit 塊土地『不離不棄』的親密關 係。」 論<台灣十二月天-山茶花開紡情絲> 「、、、十二月寒冬開的茶花 kap 挽茶的男男女女,猶 koh 有跳動 ti 滿山茶園 的音符,福爾卡庫用伊的詩筆畫出一幅生動活潑的客家風情畫。」 論<蓬萊米佮在來米> 「、、、Ti 台灣,族群之間的問題常在成做社會的亂象,演變成歷史的悲劇。 詩人福爾卡庫看待族群的問題,藉著<蓬萊米佮在來米>規劃出台灣族群相處 的模式 kap 台灣的出路。 無管本土抑外來 / 佇台灣生產 / 當然 / 愛種佇台灣的土地 / 湳台灣的雨水 / 吸台灣土的肥 / 毋才會莩穎 / 會大欉 / 會飽穗 無管汝是啥物品種 / 汝攏是台灣米 / 當然 / 欲堅持內銷 / 抑是 / 想欲外銷 / 隨在汝甘願 / 是講 / 一出產 / 標頭,一定有頓 / Made in Taiwan 詩集寄望每一個台灣人,無管你是 Holo、客家、原住民抑是新住民,攏有一粒 台灣心,攏對台灣有認同感、有台灣主體意識,按呢多族群就 b 的成做國家、 社會的問題,台灣人 b 的 h 出頭天 chiah 有向望。、、、」 -節錄<2006 台語文學學術研討會論文集-詩歌 kap 土地的對話>(金安機 構-開朗雜誌出版-2006 年)Li Siok-hong 論文<台語現代詩植物的書寫>


自序 素素仔就好-我的詩觀(三) 巧緻,有芳氣 樟仔材的材盒仔 縛一條 金色閣抹金粉 幼幼的錦緞 閣配幾蕊仔 出色的 看袂出真假的金花 掀開材盒仔 半透明 有雅緻圖樣的 玻璃紙 包著 絲仔的錦盒仔 錦盒仔底 色紙做的幼索仔 真細膩縛咧 手工織的 細細的仔的袋仔 層層疊疊的包裝 厚工的設計 逐沿攏咧唌(siann5)人 幼秀的袋仔內底 一的細細塊的材牌仔 工筆雅氣的毛筆字 寫講: <不知所云>


2000/09/26 華語 2002/08/04 台譯 2004/09/27 修 北投 2004/12/25 <台灣日報-台灣副刊> 2005/01/20 米羅‧卡索-卡車斯基(蘇紹連)詩評<台灣日報-台灣副刊>


* 台灣四季


春天的花-予秀容 寒天的山 望熱天的白雲 熱天的都市 望秋天的山風 寒天的山 天濛濛,山濛濛 無葉的樹枝 思念熱天的翠青 熱天的洘旱 天愣愣,人愣愣 焦庀庀的空氣 數念寒天的雨水 佇春天,知影秋天會來 佇寒天,知影熱天會來 五彩的春花 總有蔫去的時 暗色的樹欉 明年閣莩新穎 年年過冬,年年開花 春花望露,望人疼惜 滿山的色彩,含水的日頭 清風文文,我的心 唯石縫探頭,目珠瞇瞇

註: 洘旱(ko2 huann7)-乾涸 愣愣(gang7 X)-失神,發呆 焦庀庀(ta7 phi2 X)-極乾燥 數念(siau3 liam3)-思念


蔫(len7)去-凋謝 文文-輕盈,微微 瞇瞇(bui7 X)-眼睛半開半合,未完全清醒貌

20160428 北投


熱天的海-予玉芸

行佇寒天的街仔路 心內,比厚厚的外套 閣較束縛 人的心, 比交纏的巷路 較歹應付 向望熱天 向望熱天的海 向望熱天海面頂懸的藍天 唯日頭落海的南寮西海岸 一路,頭殼的海湧聲 捒我到日頭出來的東海岸 有圖樣石頭的海砂埔 白白海湧,溢來水波 清清的天,散步的雲 無所不在,微微的風 予我浸咧無人,無我 無想欲醒來,清涼的世外之境 我看雲,雲看我 雲是雲,我是我 雲看我,我看雲 雲是我,我是雲 (芸)

20160426 北投


秋天的山-予靜華 花無千日紅 人無百日好 世事幻化,風湧起落 人心妄想,空思顛倒 前世是石,這世是山 這世是山,後世是石 五彩的春花 夏天的海湧 秋天,繁華落盡 樹枝顯伊展翅的剪影 紅葉點妝素色的山景 秋天的山 鑑春夏,知秋冬 山色換裝照甲子 鳥語來,花芳去 配色配樂合人意 秋天的山 山靜,人靜,心清靜 人間善惡,唯心所起 入世出世,利益眾生 秋天的山 一草一木,守天地戒律 花開花謝,順節氣天時

20160505 北投


冬天的樹仔-予家己 早時,山嵐過去 下晡,雺霧過去 暗時,山風吹過 少人行跤到的所在 日頭曝袂齊,雨水沃袂厚 斷崖山壁的一欉樹仔 恬靜,無話 春來秋去 葉莩芛,花結籽 寒來暑往 花落塗,待新枝 看山,看水 看山色,看水影 看鳥,看花 聽鳥聲,鼻花芳 日子,一日一日過 春夏秋冬,一年一年過 花開花落,四時交替 生老病死,世代輪迴 月圓月缺,老欉新枝 恬靜,無話 無用之用的一欉樹仔 世間,按怎變款 天地,按怎變色 寒天的彼欉樹仔 恬靜,展伊的枝骨 無話,拽伊的清風

20160503 北投


* 台灣十二月天


台灣正月天 -山櫻開花祖靈起 台灣正月天 寒天過了就春天 台灣正月天 舊年過了換新年 寒天時,冷吱吱 花蔫葉落焦樹枝 台灣山櫻正當時 寒天時,冷吱吱 山內霜降雪落時 台灣山櫻山頭啼 寒天時,冷吱吱 想起祖先起義時 鮮血掖甲紅記記 寒天時,冷吱吱 山櫻展目祖靈起 看顧山林好徛起 寒天時,冷吱吱 山跤子弟愛謹記 轉來原鄉解相思 2005/06/05 北投 2007/2 月 <海翁台語文學>第 62 期 註: 蔫(len1):枯萎 焦(ta1):乾枯 掖(ia7):灑,撒 徛起(khia7 khi2):生活,謀生


台灣二月天 -刺桐花開抾記智 台灣二月天 春節拄過冬尾時 刺桐花開紅過年 刺桐花開 平埔族群春耕時 刺桐花開 卑南族群種蕃薯 刺桐花開 達悟族群掠飛魚 台灣二月天 平埔佗去目屎滴 刺桐花開抾記智 刺桐花開 樹欉展開紅透枝 刺桐花開 紅過呂宋大洋去 刺桐花開 紅遍台員地佮天 台灣二月天 南島語族頭向天 刺桐花開啥命理 刺桐花開 國語台語南島語 刺桐花開 外省本省原住民 刺桐花開 天照甲子人義理

2005/06/03 2005/06/08 修 2006/12/08 二修 2007/04/11 三修 北投 2008/2 月 <海翁台語文學>第 74 期 註: 拄(tu2)過:剛過 掠(lia7):抓 佗(to1)去:往哪裡去


抾(khio3):撿回 呂宋:菲律賓島 大洋:指大洋洲,泛太平洋 台員:指古台灣 刺:即刺桐 命理:命運


台灣三月天 -杜鵑素素無得比 台灣三月天 雲欲開,天欲清 日頭宓相揣的日子 台灣三月天 春風來,冷鋒去 樹椏莩芛的日子 台灣三月天 透早時,濛霧起 株株紅點露水滴 無愛盆景 無愛花瓶 杜鵑暗啼 素素情懷無得比 咱兜厝邊 過路路邊 杜鵑微微 為咱抹粉點胭脂

2005/05/30 2005/06/06 修 北投 2006/03/24 <台灣日報-台灣副刊> 2008/3 月 <海翁台語文學>第 75 期 註: 欲(beh4):快要 宓相揣(bi3 sio7 tshue7):捉迷藏 樹椏(ue1):枝幹 莩芛(pu3 inn2):發芽 花瓶(pan5)


台灣四月天 -油桐花開滿山晰 台灣四月天 入春有時百花開 台灣四月天 山城扑開的日子 青蘢蘢,白絲絲 挽面薄粉幼綿綿 山頭振動全看伊 佇鄉里,出外時 山城子弟上拚勢 親像油桐滿山晰 孤單暝,人稀微 山城子弟病相思 想起故鄉攏是伊 有當時,唌人意 濛霧遮面勿夆見 茫茫山頭嬌滴滴 大風起,梅雨滴 山城飄雪隨風去 明年春泥莩新芛

2005/05/31 2005/06/06 修 北投 2006/4 月 <海翁台語文學>第 52 期

註: 青蘢蘢(ling1 X):青翠 幼綿綿(iu3 mi1 X):細嫩


振動(tin2 tang3):指山頭開始開花 晰(si3):發亮,閃爍 唌(siann5):引誘 飄雪:指油桐花落時


台灣五月天 -台灣相思掠人意 台灣五月天 風涼天清晚春時 台灣五月天 滿天金色的相思 山頂,海邊,溪墘 台灣相思花開時 樹頂金黃罩規片 台灣相思花落時 塗跤黃金抾袂離 做兵,留學,出外 台灣相思花開時 層層疊疊的相思 台灣相思花落時 鹹酸苦澀的相思 山頂,海邊,溪墘 台灣相思花開時 顧咱心芛心花開 台灣相思花落時 護咱心芛莫傷悲

2005/05/29 2005/06/06 2006/12/08 二修 北投 2007/1 月 <台文戰線>第 5 號

註: 掠(lia7)人意:善解人意 溪墘(kinn5):溪邊 塗跤(ka1):地上 抾(khio3)袂離:撿不完 心芛(inn2):心情,內心


台灣六月天 -鳳凰花開展新意 台灣六月天 日頭清清佇看汝 台灣六月天 鳳凰花開的日子 唯熱天到寒天 唯寒天到熱天 台灣的草青青 台灣的人甜甜 台灣六月天 敢是相辭傷心的日子 敢是老葉離枝的傷悲 青蘢蘢的樹枝 紅記記的花蕊 台灣六月天 敢毋是幼葉新枝的青春 走揣新性命的天年 台灣六月天 敢毋是幼芛含蕊的妖嬌 展伊新世代的芳味

2005/05/21 2005/05/24 修 2005/05/26 二修 2005/06/06 三修 北投 2006/6 月 <海翁台語文學>第 54 期

註:


敢(kam1)是:難道是…. 青蘢蘢(lang1 X):青翠 走揣(tsau2 tshue7):尋找 幼芛(iu3 inn2):嫩芽


台灣七月天 -野薑花開塗芳味 台灣七月天 日頭赤焱無了時 台灣七月天 燒風吹來無塊宓 小暑大暑接袂離 大人囝仔熱欲死 佗位歇涼消暑氣 圳溝樹跤田岸邊 河邊沙埔菅芒裡 溪墘石坎山路邊 野野清芳引人鼻 枝葉翠青隨看見 白花幼茈清涼意 登堂入室人恰意 山林塗芳合我意 互人束縛,千金萬金無愛去 放我自由,塗入塗出上趣味

2005/06/02 2005/06/08 修 北投 2006/7 月 <海翁台語文學>第 67 期

註: 赤焱(iann7):炎熱 無了時:沒完沒了


無塊宓(bi3):無處躲 接袂離:接續著來 幼茈(iu3 tsinn2 X):稚嫩 恰(ka3)意:喜歡


台灣八月天 -夜來香輕清涼味 台灣八月天 日頭燒熱熱到暝 台灣八月天 葵扇愈拽汗愈圓 下晡時 西北雨 雨過天清蒸塗氣 欲暗時 日落西 雪文洗浴稠芳味 盈暗時 夜來香 風輕清涼芳入脾 夜來香 清涼味 日落月出芳歸暝 夜來香 清涼味 浸咧銀河看天星 夜來香 清涼味 清心自在比水晶 夜來香 思想起 少年懵懂青春期 夜來香 思想起 外島做兵說傳奇 夜來香 思想起 戀愛蜜月糖甘甜

2005/06/02 北投 2005/10/09 <台灣日報-台灣副刊> 2006/8 月 <海翁台語文學>第 56 期 2006/10/15 <台文通訊>151 期 註: 拽(iat8):搧 蒸(tshing3)塗氣:散發泥土味 雪文:香皂 稠(tiau5)芳味:殘留香味


台灣九月天 -金針花開引人意 台灣九月天 月令流轉欲秋天 台灣九月天 東西交替著轉時 東部好地理 靠山偎海海連天 山清水淨淨心脾 東部好景致 懸山縱谷大海邊 金花開甲滿滿是 金針花 金針花 外國叫伊 DayLily 金針花 金針花 一日性命獻予汝 金針花 金針花 汝愛惜伊袂針黹 金針花 金針花 顧山顧海無目睨 金針花 金針花 母親疼囝無揀時 金針花 金針花 無性無地無暗暝 金針花 金針花 日出所在上早起 金針花 金針花 人講後山啥道理 金針花 金針花 引人讚歎展目墘

2005/06/03 北投 2005/09/20 <台灣日報-台灣副刊> 2006/11/15 <台文通訊>152 期

註: 著(tio7)轉時:須轉換時令 偎(ua2)海:靠海


針黹(tsi3):女紅 無目睨(ni3):指未合眼 無揀(king2)時:不選擇時間,指無時無地 無性無地:沒脾氣 展(then2)目墘(kinn5):睜大眼睛,指刮目相看


台灣十月天 -欒樹開花落塗籽 台灣十月天 袂熱袂冷好天時 台灣欒樹戀愛伊 戀愛台灣好山水 山水會媠到底時 台灣十月天 楓葉未紅先紅伊 台灣欒樹戀愛伊 戀愛台灣人情味 人情有味到底時 台灣十月天 欒樹開花又結籽 台灣欒樹戀愛伊 戀愛台灣好花籽 原來外來攏愛伊 台灣十月天 欒樹結籽代代起 台灣欒樹戀愛伊 戀愛台灣苦難時 好過歹過攏倚伊

2005/06/05 2005/10/03 2005/10 月 <海翁台語文學>第 46 期 2011/10/05 二修 北投 註:


媠(sui2):美 底(ti3)時:何時 歹(phai2)過:指世局不好,景氣差 倚(ua2):靠近,意指同舟共濟


台灣十一月天 -菅芒花開牽情絲 台灣十一月天 山頭手面洗清氣 日照山坪金晰晰 菅芒絲 金晰晰 打扮拋荒 的 山墘 菅芒絲 金晰晰 妝點山路 的 稀微 菅芒絲 金晰晰 扑開心內 的 暗暝 台灣十一月天 山頭換裝變款去 日照山坪白微微 菅芒絲 白微微 風吹白浪波波起 菅芒絲 白微微 風吹花穗颺颺去 菅芒絲 白微微 風吹心芛芛芛開 台灣十一月天 山頭梳妝款款序 日照山坪幼綿綿 菅芒絲 幼綿綿 幔佇山頭牽情絲 菅芒絲 幼綿綿 旆佇山坪定情物 菅芒絲 幼綿綿 舒佇心頭日日記

2005/06/04 2005/06/08 修 北投 2006/12/15 <台文通訊>153 期

註: 金晰晰(sih4):閃亮,亮得發光 拋荒(pha1 hng1):荒廢 稀微:寂寥 颺颺(iann7 X):飛揚


心芛(inn2):心情,內心 款款序(khuann5 X si7):慢條斯理 幔(mua1):披,蓋 旆(phua):戴,披 定情物(mih4) 舒(tshu1):舖,舖展


台灣十二月天 -山茶花開紡情絲 台灣十二月天 日頭愈來愈攲去 台灣十二月天 一年又閣欲換時 露重風霜起 百花勼勼去 再待春風等底時 耐冬山茶先開枝 山茶花 白綿綿 青春少年紡情絲 山茶花 紅記記 嫁娶男女糖蜜甜 山嵐濛霧起 千鳥恬寂寂 再待天清等底時 挽茶姑娘先唱起 山茶花 會言語 風聲雨聲傳情意 山茶花 會歌詩 星光月光奏琴絲

2005/06/04 北投 2005/12 月 <海翁台語文學>第 48 期

註: 攲(khi1):歪斜 勼(kiu1 X):縮 底時:何時 耐冬:山茶花又稱耐冬 恬寂寂(tiam7 tsi2 X):寂靜無聲


* 台灣土地色水

趕緊欲唯天頂看台灣


為著一張空照圖 趕緊欲唯天頂看台灣 逐工 戇踅戇踅 青碰白碰 四界走闖 親像陷咧迷魂陣 趕緊欲唯天頂看台灣 看家己 到底,屈佇啥物所在 山脈 水流 海岸 城市 鄉鎮 道路 去過佗位 又閣 佗位毋捌行跤到 唯天頂看台灣 清清楚楚 熟似的地形 會想起過去 生份的,想欲 細膩來找揣 唯天頂看台灣 清清楚楚 趕緊欲唯天頂 看台灣


1999/12/30 華語 2000/1/14 修 2000/4 月 笠詩刊 216 期 2002/10/28 譯改

土地的奶水


自出世,汝的身軀 就假那一塊海綿 不時咧吸土地的奶水 哪有人 規工,干單欲鑽入去 看袂著,摸袂著 頭殼強激出來的 脫離現實,無奶水的世界 無奶水的世界 年久月深 風一下吹,日一下曝 就冇(phann3)心 冇心的世界,若糐(hu1)去 有一工 汝會踅翻頭,走揣 吸滿奶水的海綿浸著的心 自出世 綴汝看 綴汝聽 綴汝鼻 佮土地做伙 逐工 噗噗跳的心 無管汝的意志按怎 汝無才調用汝的意識 控制汝的心跳 閃避奶水的氣味

2003/05/05


2003/11/25 修 2003/12 月號 <海翁台語文學>第 24 期 2003/12/18 二修,改篇名 2008/12 月 入選海翁文庫<安平劍獅埕詩牆-台語詩 100 首>

土地的絲


聽著老歌 會浮現某一時陣的心情 看著舊像片 會回想彼當陣的生活 鼻著某種氣味 會綴咧轉去 囡仔時陣 四界樂陶的世界 這內底,咁是 有一條啥物款的線 隨時 共咱的耳仔 咱的目珠 咱的鼻仔 佮咱的性命 牽纏做伙 長長長 幼幼幼 韌韌韌 欲摸,摸袂著 欲切,嘛切袂斷 這,敢會是 唯晟養咱的土地 莩出來的絲 避,避袂開 閃,閃袂離

2001/06/28 2002/07/02 修 2002/8 月 <海翁台語文學>第 10 期 2004/02/21 二修 北投 風,微微仔吹


幾世紀進前 台灣的山 台灣的海 台灣的溪河 台灣的草埔 風,微微仔吹 17 世紀了後 荷蘭的船隊 駛過 明朝鄭成功的船隊 駛過 大清帝國的船隊 駛過 日本帝國的船隊 駛過 中國國民黨的船隊 駛來 啥時陣 風,閣微微仔吹 吹過 台灣的山 台灣的海 台灣的溪河 台灣的草埔

2014/07/24 北投 2014/12 月 <台文罔報 149 期>

台灣中央山脈


千萬年前 台灣島嶼 唯海中央浮起來的時陣 懸懸,長長的中央山脈 自北到南 親像台灣的龍骨 叨在在,峙佇遐矣 一日,過一日 千萬年來 伊恬恬 看日頭 唯東海岸的太平洋 p 的 h4 起來 又閣 唯西海岸的台灣海峽落落去 一日,過一日 千百年來 伊恬恬 看無仝的族群 佇這塊島嶼頂懸 相觸,捙拚 一日,過一日 四百年來 伊恬恬 看掌權者的旗仔 換過來,換過去 台灣的山 猶閣青翠否 台灣的海佮溪河 猶閣會清否 佇台灣徛起的人 滯了有四序否


一日,過一日 中央山脈 逐工,在在在 峙佇台灣的土地頂懸 恬恬仔看

2002/09/04 北投 2002/10/20 <台灣文藝>第 184 期 註: 唯:從 ~ 時陣:時候 懸懸:高聳 親像:好像 叨:早就 ~ 在在(tsai7 X):沉穩,牢牢地 峙(tshai7):聳立 佇遐(ti7 hia1):在那裡 恬恬(tiam7 X):默不作聲 p 的 h4:爬,上昇 落落(lak4 loh0)去:落下去 無仝(kang5):不同 頂懸:上面 相觸(sio1 tak4):爭吵 捙(tshia7)拚:較量,拚鬥 猶閣:仍然 徛起:居住,立足 滯(tua3):居住,起居 四序(su3 si7):舒適 逐(tak4)工:每天

台灣後山內底的後山-花東縱谷


台灣 重北,輕南 閣較是 重西,輕東 日頭 p 的 h4 起來的所在 講是 台灣的後山 倒爿,是懸懸的中央山脈 正爿,是崎壁的海岸山脈 佇台灣島的正下爿 若唯人體的尻脊骿看過 花東縱谷 拄仔好,是盲腸的所在 台灣掌權者的目珠 假那,看袂著 台灣東海岸 p 的 h4 起來的日頭光 夆掩稠咧,施政的手 袂輸手術刀 一落刀 凊采,叨共這節盲腸 lio5 掉 叨是 互掌權者放棄 無人看顧 無人欲行跤到 自按呢 台灣後山內底的後山 化做 台灣淨土內底的淨土 莊嚴的淨土 自由,自在


2002/05/20 華語 2002/07/27 台語譯改 2002/09/15 <台文罔報>第 72 期 2004/02/21 修 北投 註: 閣較是:更是 p 的 h4:爬升 倒爿(to3 ping5):左邊 懸懸(kuan5 X):高聳 正爿(tsiann3 ping5):右邊 崎(kia7)壁:陡峭之山壁 正下(的 7)爿:正下方 尻脊骿(kha1 tsiah4 phiann1):後背 拄(tu2)仔好:正好 假那:好像 看袂著:看不到 夆:被 ~ 掩稠(am1 tiau5)咧:蒙蔽 袂輸(be7 su1):好像 凊采(tshin3 tshai2):隨便,不用心 共(ka7):把 ~ lio5 掉:割除 叨是 ~ 自按呢:就是 ~ 因此 行跤到(kiann5 kha1 kau3):走動,進出 內底:裏面

彼工 ~ 佮阮囝,徛佇淡水河-基隆河的交會-


社仔浮洲仔尾的沙埔仔 掀地圖 抑是 P 的 h4 起咧 大屯山系的面天山頂懸 清清,楚楚 看淡水河佮基隆河 順葫蘆島 ~ 葫蘆腰的腰身撫(hu1)過 佇浮洲仔尾 ~ 交會 史前時代 南島語族的 K 的 tagalan(凱達格蘭)人 唯淡水河口上岸徛起 17 世紀 西方霸權的紅毛仔 沿基隆河入來探北台灣 18 世紀 古中國的漢人 沿淡水河水系開墾 開墾甲揣無平埔族人的形影 彼工,佮阮囝 徛佇浮洲仔尾的沙埔仔 彼個 ~ 地圖頂懸尖尖 葫蘆島的上尾溜 看 唯大漢溪頂游 出豆干的大溪,水蜜桃的巴陵 唯新店溪頂游 出茶米的坪林,出磺水的烏來 唯基隆河頂游 出塗碳的瑞芳,金礦的九份仔 兩條河的水脈唯遮溢出去 到今,猶鼻著煙硝味的 台灣海峽 國際大都市罕有的


兩條大河 唯水清,會凍釣魚 到烏臭,紅蟲生湠 懸懸的埠岸 共人佮河閘(tsa7)起來 互人看袂著河 摸袂著水 彼工,佮阮囝 徛佇摸會著海水、河水的 浮洲仔尾 淡水河水系 唯雪山山脈佮大霸尖山 原住民祖靈聖地的源頭 敆(kap4)濟濟無仝族群徛起的 溪河大川流落來 佇開闊,茫茫 無輸大海的交會口 正爿,大屯山拺基隆河過來 倒爿,觀音山拺淡水河出去 千萬年地形的演變 千百年歷史的牽挽 攏佇遮,拺出去大海 阮徛佇 千百萬年來,塗砂積偎來的浮洲仔尾 阮囝,耍伊腳踏著的爛塗 抾螺仔殼,掔(kh 的 n1)石頭 我,袂輸徛佇大船頂的船頭 想講 台灣的族群 底時,才有法度 親像淡水河水系 彎彎,斡斡的溪河 斡過歷史的坎坎,坷坷 踅過生活的鹹酸,苦澀 做伙來會合


航向 ~ 世界的海洋

註: Peh4 起咧:爬上 頂懸:上面 撫(hu1)過 徛起:立足,生活 揣無:找不到 埠(poo3)岸:堤防 閘(tsa7):攔,擋 敆(kap4):匯合 正爿:右邊 拺(sak4):推 倒爿;左邊 牽挽(ban2):牽引 掔(khen1):丟擲 底時:何時 斡(uat4):轉彎,轉頭 踅(seh8):繞

2007/01/05 2007/01/06 2007/01/28 2007/04/02 三修 北投 2008 教育部 97 年<用咱的母語寫咱的文學用恩兜个母語寫恩兜个文學創作獎> 詩第三名

千手,千眼,觀音山


-欲暗仔的觀音山 徛咧是神,倒咧是山 峙佇河邊 河裡有山,山裡有河 千手,千眼 化做重重的山崚 參拜 西照的日頭 暮歸的漁船仔 駛過 ~ 河裡的山崚,化做 算袂清的 千眼,千手 2005/07/09 <台灣日報台灣副刊>

一個原住民,pah-tsi-luh(麵包樹)樹跤的厝


(囡仔篇) 阮兜頭前 有一欉真懸真大欉的 pah-tsi-luh 若是 pah-tsi-luh 會生 phang2 出來 爸爸,叨免逐工去討海掠魚仔 若是 pah-tsi-luh 會生 phang2 出來 媽媽,叨免共厝邊鬥種蕃薯 若是 pah-tsi-luh 會生 phang2 出來 我的便當 叨免定定紮魚脯仔佮蕃薯葉 (爸爸篇) 坐咧看太平洋 開闊的海面頂懸 日頭,勻勻仔 p 的 h4 起來 佇一大片一大片的 大片葉仔內底 閃閃,熾熾 pah-tsi-luh 會生 phang2 出來否 早叨袂閣戇想矣 面對豐派的大海 干但 掠魚仔這條路通行 大日頭下跤 pah-tsi-luh 的大片葉仔 是遮日歇涼的好所在 毋過,遮袂著 掠無著魚仔


無看著 phang2 的煩惱 (媽媽篇) 刺疫的日頭下跤 佇厝邊的田裡做穡 定定看著厝的彼欉 pah-tsi-luh 搌開開闊的樹欉 搌向厝後懸大,相連 在在的 海岸山脈 想著收工了後 一爿煮食 一爿聽候 漢草若牛的翁婿 齣頭並(phing7)濟的猴囡轉來 歸身軀汗佮目屎 早叨無看的矣 pah-tsi-luh 到底,會生 phang2 出來否 無啥要緊 干但斟酌 飯桌仔頂 大細漢食飯 的表情

2000/08/06~08/14 華語 2003/03/03 台譯 北投 2003/03/15 <Thuann 根母語文刊>第 5 期

我抾著一葉 pah-ci-luh 的葉仔


人行道歸排樹仔 有茄苳,有樟仔樹 叨伊,上大範 唯牆圍仔掩出來 懸懸,闊闊的樹仔 大葉大葉的葉仔 日頭光,佇葉仔縫 佮吹來的風 掩來,揜(iap4)去 頭瞻(tann1)懸懸才看會著的葉仔 即陣,ann3 落來叨摸會著 揀(king2)一葉卡大葉,葉 kinn5 卡完整的 若焦去,會使做葵扇 焦去的葉仔 hiau3 X 葉柄翹起來 拽起來,葉骨佮葉肉 閣不止仔會擋的 拽起來的風 有日頭跤 pah-ci-luh 樹蔭清涼的氣味 有東海岸原住民熱情的氣味 有淡水讀冊欲歇熱的時陣輕鬆的氣味 抾一葉 pah-ci-luh 的葉仔 抾轉來真濟四散的記智 焦去,輕罔罔的葉仔 拽佇我的耳空邊 拽佇我的頭殼內 風微微(bi5 X) 笑微微(bi1 X) 記:pah-ci-luh-麵包樹


2003/06/08 2003/06/22 修 北投 2005/8 月 <台文罔報>107 期

夏天的塑像


透早,像娘仔絲 蟬的叫聲 唯光焱焱的日頭光拋過規個山頭 透光的娘仔絲 穿過樹林的葉仔聲 穿過野溪的水流聲 穿過咱的囝仔時 穿過咱的青春 透光的娘仔絲 穿過日光的白 穿過夕陽的紅 穿過紅嬰仔的哭聲 穿過學生囡仔的笑聲 透光的娘仔絲 紡光,紡光的色水 紡聲,紡聲的惜情 透光的娘仔絲 共台灣的熱天 紡作一座,聲佮光的塑像

2014/07/25 北投 2014/12 月 (臺江台語文學第 12 期)

蟬的叫聲 2


-台灣熱天的標頭音樂 無看著觀音山 無看著淡水河 無看著倒轉來的渡船 才,一隻蟬 規渡船頭等船的 耳仔佮目珠 攏揤(tshi7)偎來 低低,直直 無幾枝樹枝 無啥顯目的樹箍 峙(tshai7)佇人擠人的渡船頭邊 眾人的頭瞻(tann1)起來,目珠金熾熾 佇斜斜(tshia5 X),略略仔柑仔色 西照的夕陽內底 袂輸 ~ 咧行降旗禮 蟬的叫聲 丹田有力,中氣十足 比人心跳較緊的節奏 佇遊客的心肝頭 奏起人生過往 鹹酸苦澀的樂調 唯出世到捌代誌 唯少年到老邁 唯無煩無惱到世事難料 佇遊客的頭殼內底 綴蟬的叫聲 隨人,譜隨人的調 ××× 台灣的熱天 日頭光映映


草木相爭開花 鳥蟲相爭啼叫 歇熱的學生囡仔,相爭 展現怹的青春 是講 若無 ~ 蟬的叫聲 台灣的熱天 是一曲 無標頭 無主調,斷了琴線的殘曲

2005/07/17 2005/12 月 <鹽份地帶文學>創刊號 2010/07/01 修 北投

蟬的叫聲 3


吱吱,蟬叫 蟬叫,吱吱 一波才退去 漸漸 一波又閣掩過來 掩過樹欉 掩過山頭 掩過早起的日頭 掩過欲暗仔的夕陽 掩過閒仙仙的囡仔時 掩過一遍閣一遍校園的惜別 一波掩過一波 輪迴閣再輪迴 吱吱的蟬叫 掩過 逐個日頭赤疫的熱天 今,我牽著阮囝的手 做伙瞻頭 伊走揣伊的蟬叫 我,走揣我的囡仔時 吱吱,蟬叫 蟬叫,吱吱 一波掩過一波的蟬叫 波波相連,無分節氣 催我入眠 隨我入夢 (吱吱,蟬叫)


2009/07/14 台譯改寫 2016/06/21 北投

台灣產物誌(0)米


台灣米 有 蓬萊米 佮 在萊米 蓬萊米 是日本種 經過改良 適合台灣的水土,氣候 嘛合台灣人的喟口 在萊米 台灣的土生品種 是無赫黏赫 Q 毋過 台灣人過年過節 欲作粿 無在萊煞袂使 無管蓬萊,在萊 無管本土抑外來 佇台灣生產 當然 愛種佇台灣的土地 湳台灣的雨水 吸台灣土的肥 毋才會莩穎 會大欉 會飽穗 無管汝是啥物品種 汝攏是台灣米 當然 欲堅持內銷 抑是 想欲外銷


隨在汝甘願 是講 一出產 標頭,一定有頓 Mad 的 in Taiwan

2002/02/17 北投 2002/06 月 <海翁台語文學>第 9 期 2008/12 月 入選<安平劍獅埕詩牆-台語詩 100 首> 2016.10.19 改篇名(原名<蓬萊米佮在來米>)

台灣產物誌(1)鹽


無日頭 無法度曝鹽 袂流汗的季節 曝袂出鹽 日頭曝鹽 嘛曝曝鹽的人 海水曝礁,是一粒一粒結晶的鹽 流汗流礁,是一蕊一蕊茫霧的目珠 鹽天鹽地,鹽水,鹽風,鹽空氣 一支一支的烏跤 佇太陽旗下跤曝到滿天藍星旗 鹽分地帶的海邊 無管日月天星按怎變化 初一十五,海水 照常伊的留戀 別戀的 是曝礁的海水變做山 毋知影鹽分地帶礁疕疕身世的囡仔 佇鹽山 p 的 h4 懸 p 的 h4 低,nng3 來 nng3 去 日頭中央 鹽山的笑聲,掩過海湧的哮聲

2008/06/20 北投 2008/10 月 台文戰線>12 號 2011/4 月 <台文戰線 2005-2010 文學選>

台灣產物誌(2)糖


甘蔗園 甜甜的風吹過 囡仔時陣 無錢買四秀仔 唅一喙烏糖 彼號黏黏的甘甜 到今,猶黏咧喙邊 上素的剉冰 是濫赤砂的糖水 甘甜透心涼的冰涼 涼到這陣 甘蔗園的風 唯荷蘭時代進前 吹到阮的囡仔時陣 南部囡仔 趡(lik4)五分仔車偷揪甘蔗 是免人教就會曉的功課 囡仔時陣 干單想欲啖(tam1)糖的甘甜 毋知影甘甜的糖 是苦澀的目屎 激出來的 日本時代 蔗農夯鋤頭佇甘蔗園抗爭 中國國民黨白色恐怖時代 濟濟有理想的青年 佇甘蔗園內底夆掠夆刣 甘蔗園,甜甜的 記智的風吹過 吹過毋捌世事的囡仔時


吹過 台灣歷史 ~ 沉沉浮浮的風湧

2008/06/22 北投 2008/10 月 台文戰線>12 號 2011/4 月 <台文戰線 2005-2010 文學選>

台灣產物誌(3)茶


濛霧的山 濛霧的茶園 濛霧,罩佇 種茶人偃身的形影 濛霧的茶山 光焱焱的茶市 茶山的芳,唯大稻埕 順淡水河芳透全世界 頂頂世紀到今 茶園,綴世間的風雲捙跋反 做茶人,守護茶身一世的清白 全發酵,半發酵,無發酵 按怎發酵,堅心家己的茶色 古中國徙來的茶栽 佇異鄉的島嶼湠種 湠種的茶欉 湠愈闊,根愈深 愈合在地的水土 壓枝入塗 茶囝,茶孫 前世是異鄉 這世,是土生土長

2016.10.16 北投

台灣產物誌(4)塗炭


烏烏的厝頂 暗暗的厝間 島嶼的東北角 基隆河頂游的炭礦 予厚雨茫霧的山區 佇清朝尾佮太陽旗時代 熾出烏金的光芒 落坑,前路略略仔的頭燈 出坑,後壁暗摸摸的坑洞 唯日光照袂著的坑底 一車一車,烏趖趖的炭工仔 捒出來烏金烏金的光芒 予怹心內,點灼一葩微微仔光 殕色的山巷 殕殕的人生 想欲用捒出來的烏炭 共囡仔序細,捒出去 有色有彩光的街市 一空一空的炭空 予畫家,畫做 親像烏炭的岩畫 烏跤,烏手,烏面 頭殼頂的聖光,顯出 烏金仔烏金的人形

2016.10.17 北投

* 台灣人文色水


台灣原住民佮國際人類學家


佇台灣地圖頂懸 上早來徛起的 南島語族 唯水青色的海邊 青色的草埔仔 一擺,閣一擺 互強勢的族群 擠(tsik4)起咧 黯塗色的所在 一批,閣一批 人類學研究者的田野調查 唯海邊,草埔仔收集到深山 互台灣南島語族 佇國際人類學的圖譜頂懸 開出一葩一葩的光 這一葩一葩的光 嘛照光 台灣南島語族 文化的價值 佮 種族的尊嚴 台灣的當權者 唯荷西時代 一直到現此時 無定是 無修人類學的學分 怹 看袂著原住民的形影 聽袂著原住民的咻喝 莫講人類學 佇台灣的藍圖頂懸 敢講 人道關懷的報告


嘛毋捌看過

2002/03/12 2002/06/15 <台文罔報>第 69 期 2002/07/27 修

唯 K 的 tagalan-凱達格蘭大道出發


無管 唯東北海岸起來 抑是 唯淡水河口上岸 K 的 tagalan-凱達格蘭 絕對毋是 干單 一條街仔路的名爾爾 唯桃園 霄裡社、龜崙社、坑仔社、南嵌社 到八里-八里坌社 淡水河對岸的小八里坌社 北投的唭哩岸社,內北投社,嗄嘮別社 淡水的外北投社,圭柔山社,大屯社 順北海岸 三芝的小雞籠社 金山,萬里的金包里社 基隆的瑪陵坑社,大雞籠社 閣往東北海岸 瑞芳、雙溪、槓仔寮的 三貂社 依基隆河徛起的,有 毛少翁社,搭搭攸社 里族社、錫口社、峰仔峙社 沿淡水河起咧 大浪泵社、圭泵社、圭母卒社 看顧新店溪和大漢溪的是 秀朗社、擺接社、武嶗灣社、雷里社 北台灣曠闊的平埔族群 為著侵略者和統治者的私心 長久夆放捨咧歷史的上底層 比北部烏天暗地 深 long3 long3 的炭空仔 閣較深,閣較暗 K 的 tagalan-凱達格蘭的正名


是台灣平埔族微微仔的光 南島民族微微仔的光 是台灣族群尊嚴 是走揣台灣歷史源頭 微微仔的光 失聲佇漢文漢語的平埔族群 噶瑪蘭族,凱達格蘭族,道卡斯族 巴宰海族,巴布拉族,貓霧拺族 洪雅族,西拉雅族,馬卡道族 請徛出來 請佇細細葩 微微仔的光內底 徛予挺 勇敢唱出 強欲啞口無聲的族群之歌 做你共咻喝 古早冒險渡海 響亮的 海洋之歌 請徛出來 予咱共微微仔的光 湠予開 照著 台灣所有的住民 予逐家族群 攏點灼家己的光

2000/05/11 2000/08/20 2002/08/03 2009/09/08

華語 台灣文藝 171 期 台譯 修 北投

原住民電視台


佇台灣猶無歷史進前 就佇台灣的土地落塗,生湠 外來的 荷蘭政權 日本政權 漢人政權 佮移民 干單要緊家己會得著外濟 無想著原先佇茲長久徛起的原住民 失去外濟 ××× 唯十七世紀 有外來政權到今 幾若百年矣 台灣的原住民 袂輸路邊的一簇草仔 無人看,無人晟 隨在人 thun2 踏 佇掌權者的政權地圖內底 無原住民的地標 佇傳播媒體的目珠內底 無原住民的形影 佇台灣住民的耳空內底 無原住民的心聲 原先佇台灣即塊頂懸 落塗,生湠的原住民 假那,唯台灣即塊頂懸 無去 ××× 若無原住民電視台 無人會去注意原住民是按怎徛家過日 無人會去注意原住民的心內是咧想啥


無人會去注意原住民有啥物傳統文化 原住民電視台 互原住民,致覺家己的形影 互原住民,致覺家己的心聲 互原住民,致覺家己的文化 原住民電視台 互無仝族群的原住民 致覺逐家猶閣活咧 致覺逐家的心 猶閣熱勃勃(phut4 X) ××× 是幸,抑不幸 新一輪的原住民文化 毋是唯祖靈地 亦毋是唯徛起地的山林 ~ 起鼓 是唯都市 都市的電視台

2005/08/13 2005/08/25 2005/10/24 <台灣教會公報>2800 期 2008/04/25 二修 北投

猶抱著我的夢


車行佇東海岸 海湧,一聲一聲湧過來 車愈落南 聲愈入耳 少年時 上北的車班 抱著我的夢 佇山海之間 微微仔笑 都市的玻璃大樓 一樓懸過一樓 看袂著海,看袂著山 看著的 是家己的目屎 都市的煙火 總會化去 後壁是山,頭前是海 山,猶是草仔芳的山 海,猶是海鹹味的海 山佮海的祖靈 猶抱著我的夢

註: 化(hua1)去-熄滅

20160401 基隆長庚(609)

台灣媽祖


佇 300 幾年前 台灣劃入去 大清帝國的版圖進前 叨互明清時期的移民 服祀 渡過烏水溝 上台灣這塊土地 雖然救渡眾生無數 毋過,台灣人 嘛用怹儉腸納肚 粒積落來的私奇錢 共阮扑金牌,安金身 當然,嘛定定 食著信徒來拜拜的 紅龜粿佮濟濟的果子 阮滯的所在嘛誠四序 規間攏是芳花 佮 淨香香煙的芳味 食果子,拜樹頭 台灣人 逐年迎媽祖來還願感恩 阮嘛是抱仝款的心情 長久以來 食台灣水米 聽台灣話語 阮,嘛是台灣人 啊!歹勢 是台灣神 是 台灣媽祖

2001/04/19 2002/12/20 <台灣文藝>第 185 期


2007/06/26 修 北投

註: 佇(ti7):在 進前:之前 叨:就 互:被 ~ 服祀(hok8 sai1):供奉 上(tsiunn7):登上 毋過(m7 koh8):不過 怹(in1):他們 儉(khiam7)腸納(n 的 h4)肚:省吃儉用 粒積(liap8 cik4)落來:積蓄下來 私奇(sai1 khia7)錢:私房錢 共(ka7)阮:給我 ~ 扑(phah4):打 安:安裝 定定(tiann7 X):常常 食著(tsiah8 tioh8):吃到 佮(ka4):和,與 濟濟(ts 的 7 x):很多 滯:住 誠(tsiann5):非常 四序(su3 si7):舒適 規間(kui1 king1):整間 芳(phang1):香 香(hiunn1)煙:香火 逐(tak8)年:每年 仝(kang7)款:同樣 歹勢(phainn2 se3):不好意思

佇歷史古蹟,共阮囝歙相


卡早,愛歙相 看著嫷的景 若無歙,誠艱苦 毋過 去蹉跎,看著歷史古蹟 攏共當做是風景區提來 夆歙相做紀念的標記爾 踮遐綴人咧歙相,真倯 唯背甲欲爛去的 大中國歷史佮地理的教科冊行出來 踅翻頭 看咱逐工徛起過日的所在 逗逗仔,生份的台灣歷史 一絲一絲 佇我的頭殼內底 勻勻仔紡 勻勻仔紡做幼絲的紗仔 互我閣卡趕緊欲來看 台灣歷史留落來的見證 無管是幾級的古蹟 攏想欲用 ka-m 的-lah 共歙落來 用我的紗仔共織起來 歷史的古蹟 互我紡的紗仔,會凍 織做一塊一塊殕白的胚布 阮囝,是我織胚布的見證 我歙的歷史古蹟 有伊的形影佇內底 赫呢久,赫呢掂斗的古蹟 赫呢幼,赫呢細漢的囡仔 等伊大漢了後 阮囝,伊會知影


佇伊猶毋捌台灣歷史的時陣 伊的老父,叨共伊 歙佇台灣的歷史內底矣

2003/03/13 北投 2005/08/15 <台灣教會公報>2790 期

家族的舊像片


佇台灣 自開始入學 就穢著刁工放的教育病毒 台灣的教科冊 讀愈熟,記愈牢 愈昏迷佇台灣歷史的「失智」 拄沐著正範的台灣歷史 洶洶,致覺家己著病 著驚,見笑 慢慢仔摸 勻勻仔軁 款款仔精神 看著歷史的記事 看著記事的像片 定定,互搝去毋捌生活過的年代 看著家族的舊像片 家族,就佇我讀過的歷史內底 看著家族的舊像片 歷史,就佇咧我的 DNA 內底

註: 穢(ue3)-傳染 沐(bak4)-接觸 正範(pan7)-正確 軁(nng3)-鑽,鑽研意 搝(kiu2)-拉去

2003/06/06 北投


2004/12 月 <海翁台語文學>第 36 期

外來政權 vs 歷史古蹟(1)安平古堡.赤崁樓 -古台江兩岸的風湧波浪


16 世紀海上霸權的西方國家 唯大西洋到印度洋到太平洋 相爭走揣新的殖民地 佇遠東的太平洋佮台灣海峽海面 西方官派的戰船佮亞洲的海賊 刀銃相見 自 16 世紀 葡萄牙人喝出「Ilha Formosa」 台灣,浮出世界地圖 入去世界海洋史 1624 年 荷蘭艦隊 佇台江西岸起 Orang 的(奧倫治)城 1627 年改名 Z 的的 landia(熱蘭遮)城 做荷蘭總督的駐地,殖民統治的軍事中心 自按呢 台灣,陷落外來政權的歷史 欲 400 年 1653 年 郭懷一事件了後 荷蘭統治者驚漢人閣起來反抗 佇台江東岸起 Provintia(普羅明遮)城 鄭成功趕走荷蘭人 普羅明遮城改做承天府 熱蘭遮城改做安平鎮 看高中畢業旅行的相片 佇安平古堡石柱仔邊佮赤崁樓頭前 30 年矣 遐的少年囡仔,毋知影這陣過了按怎 一世人,30 年真久 安平古堡佮赤崁樓欲 400 年矣 唯荷蘭政權到東寧王朝到大清帝國到日本帝國到中華民國


唯 Z 的的 landia 變王城變水師衙門變海關宿舍到安平古堡 唯 Provintia 變承天府變廟祠變日軍病院到赤崁樓 17 世紀以來 安平古堡佮赤崁樓 峙佇台江兩岸 風湧起起落落,波浪不斷 台江的地形,嘛改頭換面 台灣的歷史 ~ 風風雨雨 古蹟的身世,嘛綴咧 ~ 坎坎坷坷 佇城牆下跤 看榕仔根,根脈交纏 碇篤的老根,牽挽欲 400 年的舊磚仔 17 世紀的古城牆 生湠出 ~ 一大 bong1,一大 bong1 21 世紀 翠青的新葉枝

記: 安平古堡(台灣城殘蹟)-國家一級古蹟(1624 年) 赤崁樓-國家一級古蹟(1653 年) 註: 風湧(ing2):風浪 走揣(tsau2 tshue7):尋找 徙(sua2):遷移 欲(beh4):將近 峙(tshai7):矗立 綴(tu 的 3)咧:跟著 碇篤(ting7-tauh4):堅硬 牽挽(ban2):纏繞 生湠:繁衍 一大 bong1:指物大,茂盛意


2006/06/20 2006/12/20 2012/01/31 北投 2012/03/15 <臺江臺語文學>創刊號

外來政權 vs 歷史古蹟(2)淡水紅毛城


佇淡水讀冊的時陣 袂關心國際局勢 無斟酌島內時勢 單單純純,愣愣過日 畢業了離開淡水 才數念淡水 才重閣熟似淡水 重閣熟似 ~ 台灣 畢業了,才入去 讀冊的時,逐工 佇砲台埔 peh4 起 peh4 落 相閃身的紅毛城 徛佇淡水河口 砲台埔的崎頂 幾百年來 風吹,日曝 雨沃,霜降 紅毛城,恬恬 隨在台灣的天頂 不時咧風雲變色 不時風雲變色的台灣天 互徛佇淡水河口 看顧淡水的紅毛城 寄人養,寄人顧 佇我踮淡水讀冊的 1980 年 才轉來台灣人的身軀邊 西班牙的基地 荷蘭的城牆 清朝的城門 英國的洋樓 紅毛城,幾百年來 佮台灣人徛做伙 做伙看島上的旗仔 換來換去


到今 台灣的人民 家己選家己的執政者矣 外來政權起造的紅毛城 徛佇咱的淡水河口 無管啥物時期的事蹟 攏透濫做 一級古蹟的台灣文化 去淡水蹉跎 有通耍,有通食 會凍 入去歷史的流籠 �迌了 逐家知影轉去厝裡的路 而 入去歷史的流籠 咱敢知影 按怎,轉來

記: 淡水紅毛城-國家一級古蹟(1629 年) 註: 斟酌(tsim1 tsiok4):用心注意 愣愣(gang7 X):茫然 數(siau3)念:懷念 熟似(sai7):認識 逐(tak4)工:每天 peh4 起 peh4 落:爬上爬下 相閃身:錯身而過 徛(khia7)佇:站在 崎(kia7)頂:山崗上 雨沃(ak4):淋雨 恬恬(tiam7 X):沉默


隨在:任憑 ~ 不時:時常 透濫:混合 蹉跎(tshit4 to5):遊玩 有通耍(sng2):有得玩 流籠:可來回之索車,升降機 逐家:大家 轉去:回去 轉來:回來

2003/02/16 2006/06/16 修 2006/06/20 二修 2006/09/18 <台灣教會公報>2847 期 2006/12/19 三修 2007/03/31 四修 北投

外來政權 vs 歷史古蹟(3)-台南孔子廟


大紅的色緻 翠青的葉仔 懸大分枝的樹欉 簡筆,畫出廟牆內 台灣熱天樹蔭跤的悠哉 荷蘭人入侵進前 南島語族的原住民 佇高山,抑平埔 島上的清風微微 悠悠哉哉,過日 荷蘭人,是異族 漢人的鄭成功,嘛是 荷蘭人對平埔的原住民酷橫 出兵新港社,大武壟社,麻豆社 無歸順的,燒厝、屠殺 明鄭政權嘛無較輸 出兵大肚社,沙轆社 「誅夷不餘赤子,田疇蘆舍」廢之」 起造孔子廟 看漢文,讀漢冊 孔子,順鄭氏的大旗渡海 紲落大清帝國統治 無文字的南島語族 綴移民的漢人,漢化去 太平洋的風吹過 台灣海峽的風吹過 吹甲,賰一絲氣絲仔 佇祖靈的天頂飛 佇郭柏川的畫,回魂過來 祖靈 聲聲咻喝 喝出凱達格蘭-K 的 tagalan 大道


喝出馬卡道-Makatao 路 夜祭 唱出阿立祖的血脈 唱出阿立祖的靈魂 唱出阿立祖的囝囝孫孫 阿立祖佮孔子若相拄 公廨,拜伊的阿立祖 孔子廟,拜伊的孔子公 先來後到 頭,戴仝款的天 跤,踏仝款的地

2006/06/19 2016.06.15 北投 2016.11 月 <海翁台語文學>第 179 期

七月


若到咱人七月 假那 規台灣,規台灣的人 齊(tshiau5)振動起來 含 ~ 看袂著的好兄弟 無管汝是在地幾千年前的原住民 無管汝是上代先殖民台灣的荷蘭人 無管汝是佔北台灣的西班牙人 無管汝是欲反清復明的鄭家軍 無管汝是毋驚死渡過烏水溝的羅漢腳 無管汝是械鬥夆扑死的漳州泉州客家鄉親 無管汝是清法戰爭埋佇法軍公墓的法國人 無管汝是陣亡的抗日義勇軍抑是日本軍 無管汝是二二八互中國國民黨軍隊屠殺的無辜百姓 無管汝是白色恐怖無辜的受害者-無管本省外省 無管汝是天災受難的無嗣孤魂 咱,攏是台灣的一份子 普渡祭拜,是通台灣人的一個心意 七月 是有形無形眾生交陪的月令 薰,酒,檳榔僎(tshuan5)予便 齒膏,齒抿排落去 雪文,面巾,洗手面 嘛愛胭脂,膨粉佮捋(lua7)仔 通好梳妝閣打扮 紲落 牲禮,山珍,海味,食予飽 果子仔,糕仔餅,食喙甜 閣來 福金來 tshua7 頭 銀紙,庫錢佮元寶 更衣,甲馬佮牧草 莫夆欠用閣欠穿 七月 是一個五彩的世界


唯月初到月尾 唯台灣頭到台灣尾 各庄頭,街頭,巷尾 祭拜的民俗禮儀,祭品 大紅的,黃的,青的,粉紅仔色的 桌頂,桌跤,五花十色 天頂,人間,香(hiunn1)煙裊裊,日月爭光 陰陽兩界的禁忌 互全台灣共參共普的熱情 化做節慶的鬧熱 家家戶戶 鬧熱歡喜的心 佇台灣日頭赤焱的七月半 展做五彩的花蕊

2003/07/31 2003/08/03 2009/07/23 2010/08/10 三修 北投

行過台北 228 和平公園


台北新公園 改作 228 和平公園了後 猶閣毋捌入去過 這日下晡 唯介壽路改名 凱達格蘭大道的入口入去 一入去 就看著一棟 莊嚴的 228 紀念館 貯(te2)著受難者家屬的心酸佮尊嚴 大範(pan7)大範 坐佇公園的東南爿 嘛坐佇台灣歷史 捌缺(khih4)角去的空喙 閣行過去,一座 愛昂(tann1)頭 才看會著的 228 紀念碑尖塔 徛甲挺挺挺 嘛徛佇久年來 濟濟人 毋敢昂頭過日的心肝頭 徛佇表演台的頂懸 想著 228 佮白色恐怖的歷史 嘛想起較早毋捌世事 佇遮樂陶的少年時陣 就敢若 換過角色的人生戲齣 一幕,換過一幕 唯倚公園路的出入口出去 捷運站入口 就佇邊仔


想講 行向民主的路途 敢有捷運通坐

2000/01/19 華語 2002/02/26 台譯改寫 2002/12/25 修 2003/02/20 <台灣文藝>第 186 期 2010/02/27 二修

行入去有日本厝的巷仔


唯台北師範大學 四箍圍仔的巷仔行入去 洶洶,行入去 毋知影啥物款的年代 彭孟緝金華街的���代 ? 于右任青田街的年代 ? 臺靜農溫州街的年代 ? 日本式的大厝 紅磚仔角的牆圍仔 斜斜,烏瓦的厝頂 懸懸,掩天,青蘢蘢的大欉樹仔 較早,是中華民國-軍公教人員的宿舍 閣較早,是日本時代-日本人的徛家厝 政權,是按怎替換 世事,是按怎牽纏 牆圍仔內底 無人喢的大欉樹仔 佇厝前厝後 愈發,愈旺

2005/03/25 2006/03/10 修 北投 2006/04/25 <台灣日報台灣副刊>

註: 四箍(khoo1)圍仔:四周 行(kiann5)入去:走進去 洶洶(hiong5 X):猛然 懸懸(kuan5 X):高大 青蘢蘢(ling7 X):青翠 徛(khia7)家厝:住家


喢(tshap4):理睬

紀州庵物語


斟酌看 清朝平埔族舊社古地圖 日本時代手畫風景地圖 對照 googl 的衛星影像 城市的族譜 款款仔現形 歷史, 是土地的記事 建物, 是歷史的見證 日本時代官廳 自總督府到台北州廳 到今猶是官方公所 日本官舍徛家厝 化身茶藝民主論壇 日式家族料理店殘蹟 轉身,成做文學休閒園區 唯南城門出城的官員 軁過兒玉町,佐久間町來到川端町 佇溪邊,抑是船頂鋪排宴請 新店溪的水岸月影 過往,奢颺的台北城南 咱祖先 是得志,抑失意 是歡喜,抑傷悲 紀州庵舊址 老樹,盤根守護 無論族群世代物換 文學,求真守善 無分老少天涯海角 新店溪溪流 是星光抑月亮 一工,閣一工


轉彎踅角,牽山挽水而來 歷史, 佇天地之間流轉 人,佇歷史的流轉輪迴 造化創治人,人創造歷史 異族的軍旗輪番倒落去 人的靈魂不滅 先民的精氣神 留佇 一草,一木 一屋,一瓦

2015/8/30 北投 註: 兒玉町(こだまちょう)-今南門出口南昌路至福州路,寧波西街,南海路一帶 佐久間町(さくまちょう)-今牯嶺街,福州路,廈門街,寧波西街,重慶南路2             段一帶 川端町(かわばたちょう)-今近新店溪之汀州路2段,廈門街,同安街,金門街             一帶 記: 1917 年至 1928 年 ,日本平松家族在新店溪畔興建「紀州庵支店」,包括本館、 離屋與別館。此處於日治時代時,曾有料理屋八家,如今為碩果僅存的一家。 由於見證當年(台北)螢橋(中正橋)一帶的風貌,故頗具有歷史價值。 1934 年,日本詩人北原白秋訪台時,曾在紀州庵接受台北的鄉土歌謠研究會 「若草會」招待晚餐。 戰後中華民國政府接收日本總督府財產後,紀州庵整編為省政府合作事業管理 處與社會處的員工眷屬的「第一宿舍」,依職等分配於不同的建築(小說家王文 興成長的住所)。 1996 年一場大火,將原紀州庵「本館」的三層樓建築完全燒毀,當時住在三層 樓建築的居民紛紛搬移到原住戶已搬走騰空的「離屋」;1998 年,東側的「別 館」也慘遭祝融,近乎全毀,當時的住戶便直接拆除殘骸重建。紀州庵主要的 三個部分,僅剩下屋頂漏水問題嚴重、樑柱有腐蝕情形的「離屋」,紀州庵所 幸還留著這塊最後的拼圖,讓後來的人們得以摸索它曲折的命運。 紀州庵古蹟經臺北市政府文化局歷經 2 年整修後,於 2014 年 5 月 25 日正式啟


用。(資料摘自維基百科與「紀州庵文學森林」官網)

迪化街


一種 透濫日本時代 「巴洛克」建築風格 直欲失傳 人佮人中間 惜情的 人情味 佇 魚脯仔 佮 蝦米仔 臭鹹芳的芳氣內底 氣味原在 市仔的 喝賣聲 佮 相借問的招呼內底 自自然然 親切的笑面 古早式的行禮 有買無買,無要緊 袂講 歹面相看

2000/07/28 華語 2006/03/26 台譯 2010/04/06 2010/08/31 二修 北投

北投,農禪寺的外口


大陸性的冷氣團 一陣,一陣揤倚來 冷甲 空氣嘛變做白殕白殕 透早 徛佇農禪寺頭前的巷仔口 唯直直直的路看出去 雙爿邊仔的草埔仔佮樹欉 用怹猶閣青翠的色彩 迎請來參禪的信眾 冰冷的空氣內底 微微仔的日頭光 照佇 虔誠,素素仔的面容面頂 猶袂入去寺裡 就看著怹內心 莊嚴的毫光 一陣,一陣 規心咧趕時間的信眾 趕欲入去一個 心頭會當定落來的所在 一步,一步 怹趕走 予人寒甲走無路的冷氣團 嘛趕走 心內,一直走袂出去的 寒天

2003/01/11 2003/01/23 2010/08/31 修 北投 彼下晡,淡水


彼下晡 毋是假日 學校猶袂放學 街仔路,無啥人 光映映的日頭跤 淡水河邊 恬靜,恬靜 淡水河的水流 恬靜,恬靜 對岸的觀音山 恬靜,恬靜 觀音山面頂的白雲 恬靜,恬靜 有當時仔 閒仙仙的阿伯仔 幌咧幌咧行過 有當時仔 無欲歇晝的海鳥 翊咧翊咧飛過 車內 Mozart 的協奏曲 輕聲輕聲,轉踅 我 han-too-luh 紡咧,紡咧 規个心 恬靜,恬靜

2004/03/11 2004/04/28 <台灣日報台灣副刊>


2004/04/28 修

淡水河口的歌聲 -予「淡水走唱團」


樂團那咧撨位,調音 日頭,唯海面 落落去 徛佇河口,踅翻頭看淡水河 規個天 是粉粉的水青色 對面,是深綠色的觀音山 遠遠,是淡水八里束依去 紅色的關渡大橋 等欲聽歌的遊客 恬恬 浸咧欲暗仔 柔柔的暮色內底 嘛浸咧 攢(tshuan5)欲予歌聲感動的 心情內底 四爿邊仔的人 愈來愈濟 猶閣咧調音的樂手 無定是 趕緊欲撨好勢 規面攏是汗 又閣閉思閉思 干但,微微仔笑 怹 無閒,嘛無福氣 無通仔越頭 看即陣 淡水河的景致 怹,看袂著 毋過 怹,是歡喜的


淡水走唱團 記: 「淡水走唱團」-陳明章領軍:團員是一群熱愛音樂的視障音樂人 2002/7/21 2002/09/30 <島鄉台語文學>第 28 號 2007/05/11 2016/10/19 北投

囡仔時陣,無愛坐火車(一)


霎霎仔, 落袂煞 遙遙無期 白茫茫的 毛毛仔雨 罩佇 基隆古早時的火車站 生冷的鐵銑味 月台頂 雨亭仔 材柱仔 椅仔 火車的 車廂 器具 鐵枝路邊的 欄杆 碎石仔 澹澹,濕濕 生冷的鐵銑味 殕殕的殕青色

2000/08/15 華語 2008/05/20 台譯改寫 2009/10/31 修 北投

夜市仔的歌聲


鬧熱的夜市仔 一陣一陣 哀怨的歌聲 溢過來 彼是賣錄音帶的擔仔 2 粒大喇叭 大聲唱出 咱的心內話 毋是飯店的 Piano Bar 毋是有冷氣的 KTV 是上倚土地 上倚咱生活的夜市仔 倯閣有力 唱出做穡人的心聲 唱出做工仔人的心聲 唱出艱苦趁食人的心聲 倯倯的形 倯倯的穿插 倯倯的價值觀 倯倯的人生 夜市仔倯倯的歌聲 唯這個鄉鎮 軁(nng3)過 彼个城市

2001/12/24 2009/10/27 修 北投

台灣人色水


台灣人精神(1)曹永和 * 老老實實,定調「台灣島史」


一世人,恬恬的好性地 恬恬仔過日,恬恬仔讀冊 為著走揣家己內心的世界 伊的翅股 佇台灣的地圖頂懸,翩咧翩咧 伊的心 唯台灣島茫茫的出身,淪入去 唯士林,到台大,到南港 伊的翅股,愈翩愈勇 伊的心,愈淪愈清 台灣,是自古以來 佇茲落塗生湠,徛起過日住民的台灣 台灣,是世界地圖頂懸 經緯定位清楚,世界自由交通的台灣 叨是,愛讀冊爾 曠闊的世界海洋 挺挺的台灣島嶼 一支恬恬,古意的筆 寫出 ~ 台灣的身世 畫出 ~ 台灣的面形

2006/04/30 2006/05/28 修 北投 2006/6 月 <鹽份地帶文學>第四期

註: 恬恬(tiam7 X):安靜 性地:性情 走揣(tsau2 tshue7):尋找


翅股(sit8 koo2):翅膀 頂懸(ting2 kuan5):上面,上空 翩(phiat4):搖曳 淪(nng3):鑽入 士林:1940 年,文化團體「士林協志會」 台大:1947 年,台大圖書館 南港:1984 年,中央研究院兼任研究員 1998 年,中央研究院院士 落塗生湠:落地生根,繁衍 徛(khia7)起:立足 爾(nia5):而已

台灣人精神(2)夏曼.藍波安 * 伊轉去蘭嶼,tao 族人的海洋文化內底


伊轉去蘭嶼 轉去 tao 族人的生活內底 轉去 tao 族人的海洋文化內底 伊轉去蘭嶼 轉去走揣祖靈對土地的敬愛 轉去走揣祖靈對海洋的迷戀 伊轉去蘭嶼 稀微一人,佇半暝仔的海面 孤單一人,佇暗摸摸的海底 佇海底禁氣禁愈久 愈表示伊,對 tao 族生活的認同 愈表示伊,對 tao 族文化的堅持 唯蘭嶼的海潛入去 浮出來的 是 tao 族人對海的倚靠 是 tao 族人對大海的愛 是 tao 族人 對海洋,對宇宙大自然的信仰

註: 轉去:回去 走揣(tshue7):尋找 稀微:寂寥 半暝仔:半夜 暗摸摸:黑暗 禁氣(khui3):憋氣 倚(ua2)靠:依靠

2003/06/30 2005/10/04 修 北投


2006/01/09 <台灣教會公報>2811 期 2014/12/30 <民報 – 論壇>

台灣人精神(3)陳玉峰 * 佮土地血脈牽挽的自然平權主義者


欲 400 年的台灣史 台灣人的心酸有人訴悲情 千萬年的自然史 啥人,抱不平 台灣的住民 漢人進前,有南島語族的原住民 南島語族進前,有原生動植物的物種 百年建築列古蹟人保護好好 千百年老樹夆剉,揣誰討 台灣好地理 唯平地到高山,通人知 台灣寶貴生態 物種密度驚人,通人知 伊煞講,伊是台灣土地生界的驗屍官 久久長長生生不滅,千百萬年的土地 一生一世,不過短短百年的人類 天文、地文、人文、生文 天賦萬物,一支草一點露 袂使逆天公伯仔的造化而行 袂使逆土地倫理的演化而行 唯生態文化,看台灣人文文化 唯草木命運,看台灣住民命運 山神,土地,草木之靈 ~ 金金看 看台灣的住民,猶有同理心否 台灣草木的悲情 台灣住民的無情 扑袂 hua1,伊對萬物生靈佮人的熱情 伊的心,伊的血脈 佮台灣土地的生界 佮台灣土地的心脈


做夥起,做夥落

2006/05/03 北投 2007/4 月 <海翁台語文學>第 64 期

註: 欲(beh4):將近 進前:之前 夆剉:被砍伐 揣(tshue7):找 袂使:不能 金金看:睜大眼睛看 扑袂 hua1:打不熄,滅不掉 做夥:一起

台灣人精神(4)蕭泰然 * 譜台灣音樂史詩,共台灣人安魂定魄


斯斯,文文 恬恬,靜靜 規心 ~ 浸佇音樂的世界內底 伊佇海外 譜樂作曲,奏出台灣的存在 不義的政權 煞共擋咧伊音樂的故鄉外口 台灣民謠做肥底 台灣土地做靈魂 予台灣音樂,牽引世界人的耳孔 「台灣拉赫曼尼諾夫(Sergey Rachmaninov) -最後的浪漫主義鋼琴詩人」 有才情的台灣作曲家 是世界音樂的資產 是台灣音樂的金礦 伊破病的時陣,煞橐袋仔貯磅子 靠海外台灣的同鄉募款 救伊一命 天佑蕭泰然 用寫遺囑的心情,寫完台灣頭一篇小提琴協奏曲 無去斷線,相紲完成「1947 序曲」台灣音樂史詩 天佑台灣 無去予台灣的音樂史去角 伊強忍家己的身苦病疼 閣譜「啊!福爾摩沙-為殉難者鎮魂曲」 共亡者佮台灣人,安魂定魄 不義的政權倒落下矣 蕭泰然,猶閣勇健健 不義的政權仆落去矣 蕭泰然的音樂 猶閣佇台灣的天頂


台灣人的心肝蘡仔 勻勻仔 ~ 轉踅

2006/05/05 北投 2007/6 月 <海翁台語文學>第 66 期 2015/03/02 <民報-論壇> 註: 恬(tiam7)靜:沉默 規心:專心 共(ka7):把 ~,將 ~ 外口:外面 肥底:豐富之基礎 橐(lak4)袋仔:口袋 貯(te2)磅子:指口袋空空 相紲(suah4):相繼 去角:缺角 仆(phak4)落去:趴下,倒下 心肝蘡仔:內心深處 轉踅(seh8):盤旋

台灣人精神(5)亞榮隆.撒可努 * 信仰排灣族的排灣族獵人


山,是族群的學校 林,是生活的老師 風,是規世人的朋友 雲,是夢想的遊樂園 山林的智慧 毋是唯冊看來的 祖先的祖先 祖先的囝孫 規的族群 唯山林出世,唯山林入土 樹石草木,山嵐雲霧 伴怹一生 人,是山林大自然的家族 動植物,嘛是 山林,是獵人的性命源頭 動植物,嘛是 祈求山神保庇扑獵順序 嘛感謝互扑著的動物佮祖靈 小米飽穗的時陣 嘛歡喜鳥仔鼻芳來食 山林的萬物,共生共存 大自然的獵人學校 看重萬物的生生不滅 有形無形眾生,攏平大 毋過 若落山 山腳的眾生,是按怎 山腳的生態,是按怎 敢會像山頂罩來的濛霧


茫茫,渺渺

2006/05/06 2006/05/28 2006/12/20 二修 北投 2007/5 月 <海翁台語文學>第 65 期

註: 規世人:一輩子 毋(m7)是:不是 扑(phah4)獵:打獵 順序(si7):順利 鼻芳(phang1):聞香 攏:都 平大:一樣大,平等 落山:下山 敢會:會是 ~ 嗎

台灣人精神(6)葉石濤 * 紡出台灣文學史綱-土地的文學史觀


伊講,佇台灣 文學創作者是受天譴 毋過,伊哪會頭淪入去 毋知影通出來 文學的夢 唯少年,夢到年老 唯日本殖民政權夢到 中國國民黨威權時代 有夢,有熱情的智識分子 為著探討社會主義的理想 關心台灣的前途 煞探討到落威權者的監 戰後的台灣風雲變色 飄翩的文藝少年兄 嘛轉入去暗淡的中年 孤孤單單,獨伊一人 暗淡的中年 暗淡的台灣文學 撐渡伊過的 是土地的意識 是土地的文學史觀 無土地,哪有文學 台灣土地的意識 紡車出台灣文學史綱 替台灣文學掠總根頭 共台灣文學創作者的心頭 掠互定 台灣文學史綱 看顧台灣文學的心


看顧台灣土地頂懸的性命 嘛斡頭看家己 看家己,一世人的 鹹,酸,苦,澀

2006/05/09 2006/12/20 修 北投 2007/1 月 <海翁台語文學>第 61 期

註: 佇(ti7):在 毋(m)過:不過 淪(nng3)入去:鑽入 通:要 ~ 落監(kann1):入監 飄翩(phiat4):瀟灑 撐(thenn1)渡:支撐,度過 紡(phang2)車:紡轉出,創出 掠(liah8):抓,掌控 共(ka7):把 ~ 頂懸(kuan5):上面 斡(uat8)頭:轉頭,回顧

台灣人精神(7)鍾肇政 * 一世人,鍾情台灣文學的硬頸鬥士


白色恐怖的年代 伊,開 1 扇窗仔 互自由思想的頭殼 會凍喘氣 全民反共的年代 伊,開 1 扇窗仔 互實實在在 生活過日的筆尖 會凍敨放 規陣人做夥食飯 抑是開講,讀冊 是禁忌 揭筆 寫出歷史的事實 現實的政治環境 閣較是禁忌 唯<文友通訊>到<台灣文藝>到<民眾日報> 唯<本省籍作家作品選集>到<台灣作家全集> 唯<魯冰花>到<台灣人三部曲>到<怒濤> 又閣<高山組曲><卑南平原> 掩掩揜揜, 唯茫霧的鄉土感情 驚驚惶惶,莩出清明的台灣人意識 揭筆,嫌無夠 為著客家的文化佮生存 為著南島語族的文化佮生存 為著台灣文學的正名佮生存 為著台灣主體意識的政權愛生湠 老來,閣行上街頭 比少年家仔,閣較操 素直的個性


天真的赤子之心 啥物坎站,做啥物代誌 只要有氣力,就綿精去做 無張無持,一步一步 煞行上三角點 斡頭 看家己行過的路 看咱徛家過日的島嶼 看咱牽根挽藤的歷史 伊仝款 純然疼惜的心 徛咧山頭 疼惜,咱的土地 看顧,當咧 p 的 h 4 山的後輩

2006/05/12 2006/05/27 2006/12/20 二修 北投

註: 會凍:可以 敨(thau2)放:舒解 規陣人:一群人 做夥:一起 食(tsiah8)飯:吃飯 揭(gia5)筆:提筆 掩(ng1)掩揜(iap4)揜:遮遮掩掩 驚驚惶惶(hiann5):惶惶不安 莩(puh4)出:發芽 操:操練,操勞 坎站:階段 綿精(tsinn1):認真 無張無持:無意中 斡(uat8)頭:轉頭 徛(khia7)家:生活


牽根挽藤:糾葛,錯綜複雜 仝(kang5)款:相同 p 的 h 4 山:爬山

台灣人精神(9)高俊明 * 信仰基督精神,疼痛徛起的土地


阿公,娶平埔族的某 老父,佇多種族的埔里出世 袂輸是身軀的血脈 引�伊 為山區的原住民奉獻 15 年 佇東海岸山區流浪 11 年 栽培原住民傳道的玉山神學院 1959 年佇花蓮鯉魚潭邊 靠逐家的雙手佮���仰 佇荒郊,起造傳道人的花園 徛佇基督的精神佮人民的立場 生成,會佮威權的統治者衝突 為著台灣國家的發展 為著宗教佮講母語的自由 為著台灣全體住民的人權 無插利誘,毋驚威脅 自 1971 到 1977 年 台灣基督長老教會,冒險 發表三遍<聲明> 做總幹事的伊 早就寫好遺囑 1977 年 8 月 16 的遺囑寫講 遺體捐予彰化基督教病院 一半財產,捐予台灣基督長老教會總會 另外一半,捐予玉山神學院佮山地教會 為著追求真理入神學院 伊一世人,實現真理 1989 年 唯服務 19 年的教會總會退休 伊又閣行上街頭抗爭,絕食


領受基督的愛疼痛的伊 用伊的愛,疼痛台灣 伊的疼痛,無退休

2006/05/16 2012/04/23 修 北投 2012/08/05 <臺江臺語文學>第 3 期

註: 徛(khia7)起:生活,居住 袂輸:好像 引 tshhoa7:帶領 佇(ti7):在 ~ 徛(khia7)佇:站在 ~ 生成:自然而然

台灣人精神(12)楊南郡 * 用閣「踏查」的腳跡佮譯註的筆,反出台灣人類學文獻的璇石


自少年 就行入台灣的高山 欲探台灣山林的奧妙 自少年 就行入日本時代人類學的文獻 欲探台灣山林人文的奧妙 揹沉重的登山裝備上山 走揣台灣山林奧妙的祕密 嘛揹著沉重的日文文獻 走揣台灣山林人文奧妙的祕密 伊用腳,行出 先民毋捌行過的新路線 伊用筆,譯出 現代人揣袂著的舊路線 無數稀罕的動植物生態,是寶 無數南島語族的原住民,是寶 無數自然生態佮人類學的文獻 是寶 伊,知影寶 伊替毋捌寶的台灣人緊張 伊用濟年來雙腳行過的腳跡 印證百年前日本研究者的腳跡 佮怹做夥行,做夥流汗 做夥讚歎 翻譯,是上深入的讀冊 譯註,是上深入的翻譯 愈讀,愈著急 愈譯,愈趕緊 腳,愈行愈勇 筆,愈磨愈掂斗


伊,用閣「踏查」的腳跡佮譯註的筆 反出予人撣咧壁角 台灣人類學文獻的璇石 而,璇石的光芒 敢會像半空中的花火 熾一下,就 ~ 無去 伊,煩惱

註: 璇(suan7)石:鑽石 反(ping2)出:翻找出 走揣(tsau2 tshue7):尋找 毋捌(m bat4):未曾 揣袂著:找不到 毋捌寶:不識貨,不知珍惜 濟(tse7):多 做夥:一起 掂(tim3)斗:份量重 敢會:豈會,難道 花火(hana-bi 日文-はなび):煙火 熾(sih4):閃爍 無去:消失無蹤 2006/05/20 2006/05/27 修 2006/06/03 二修 北投 <台灣教會公報> 2015/01/06 <民報 – 論壇>

台灣人精神(14)謝里法 * 掘台灣文藝的靈,探台灣文化的魂


自台灣出走 斡頭看台灣,望中國 伊,踅一箍輾轉 才覈清楚 台灣島,佇世界地圖的位置 唯塗裡挖寶 是予人知影遮的土地底蒂好 好徛起,有向望 唯台灣的文藝入去 挖台灣文化的寶 探台灣心,揣台灣情 取枝葉旺盛,台灣主體意識的根欉 破怹吊咧半空中,古中國文化的人造花 為著探台灣人久年的心病 伊予人禁聲咧他鄉異國 遠離故鄉的土地,愈鼻著塗芳味 愈共禁,伊頭殼愈清醒 愈禁伊的身軀,查禁伊的冊 伊的心,愈活動 台灣風雲,風雲台灣 風雲中 茫茫的台灣島嶼 茫茫不安的台灣心 伊 ~ 掘台灣文藝的靈,探台灣文化的魂 台灣海島,海島台灣 台灣歷史 是台灣海島住民的歷史 台灣文化 是台灣海島頂懸,落塗生湠到今 生活過日住民的文化


筆愈利 筆尖,愈有台灣心 筆尾,愈有台灣情 毋過 台灣人,若無志氣 彼支筆鏤(lio5)落下 是真疼

2006/05/26 2006/12/21 2010/12 月 <海翁>第 108 期 2012/01/20 二修 北投 註: 斡(uat8)頭:轉頭 踅(seh8)一箍輾轉:繞一大圈 覈(hut4)清楚:弄清楚 底蒂(ti3):根基 徛(khia1)起:生活,過日子 向(ng3)望:希望 塗芳:泥土香 頂懸(kuan5):上面 鏤(lio5):一刀劃下

台灣人精神(21)瓦歷斯.諾幹 * 踅翻頭,熟似家己族群的文化勇士


威權時代的教育 予台灣住民 袂輸孤兒 毋知影 ~ 家己的身世 毋知影 ~ 家族的歷史 特別是,落塗生湠幾若千年的原住民 文學青年的伊 踅翻頭 熟似家己的族群 走揣原住民文化的根 才致覺 無管外來政權按怎轉換 弱勢的原住民,毋捌翻身過 知影仝沿的族人 唯山林的部落出走 佇都市的紅毛塗林內底做粗工 唯光映映的部落出走 佇都市的暗間仔內底做趁食查某 伊,心疼 知影頂沿的族人 做過「高砂義勇隊」的日籍台灣兵 做過「國共內戰」台籍的中國國民黨國軍 做過「抗美援朝」中華人民共和國的中國兵 伊,滴血 知影古早的族人 唯有文字記載開始 外來政權入侵的 17 世紀 就相紲失去土地 土地無去,部落就無去 土地無去,文化就無去 伊愈想,愈掠狂


伊,用腳行入去原住民的社會運動 伊,用筆行入去原住民的歷史現場 伊,用評論代替「番刀」 一出鞘,刜向幾百年來外來勢力的不公不義 共當權者抗議,討原住民族人的生存權 伊,用歌詩代替「番刀」 一出鞘,指向原住民族人的心 共出外族人的鹹酸苦澀,牽轉去 Gaga 信仰的部落 伊,用散文代替「番刀」 一出鞘,劃出幾千年來原住民族人徛起的土地 用原住民祖居地台灣的愛,看顧所有住民的多元台灣 伊 唯東海岸,轉去西海岸 唯西海岸,轉去部落的山裡 轉去 ~ Atayal 的出世地 轉去 ~ 有「彩虹橋」的祖靈地

2006/07/04 2006/12/20 修 北投 2009/02/16 <台灣教會公報>2973 期 2014/12/23 台灣民報 註: 袂輸:好像 毋知影:不知道 落塗生湠:落地生根、繁衍 踅(seh8)翻頭:回過頭來 熟似(sai7):認識 仝(kang5)沿:同輩 紅毛塗林:水泥叢林 光映映(iann3 X):陽光亮麗 暗間仔:指風化區


趁食查某:風塵女郎 頂沿:上一輩 相紲(sua3):相繼 刜(phut4):砍 轉去:回去 掠(lia7)狂:抓狂,忿怒至極

台灣人精神(22)張良澤 * 台灣文學的路 ~ 是入土進前,欲直直行落去的路


佇台灣徛起 早就落塗生湠的台灣住民 講著台灣,會予人掠 寫著台灣,會予人刣 這是啥物時代 少年時 大中國思想的教育 閃避台灣本土的文化 互伊的頭殼 佇中國的古文化踅 毋過 自細漢 食番薯簽 睏塌塌米 軁甘蔗園 跳圳溝 逐工看著的 是草地的景致 隨時鼻著的 是草地的塗味 土地的氣味 無意識形態 一世人,稠佇咱的血脈內底 條直的個性 好抱不平 浪漫的熱情 見義勇為 倔強的意志 拍死袂退 為著寶惜台灣文學先輩的才情 為著寶惜戰前台灣文化的文獻


為著寶惜台灣寶貴的一草一木 伊,捧心施財拚性命 佇古中國文化的意識內底軁縫 共實實在在過日的台灣文學拺出去 共實實在在存在的台灣歷史拺出去 共實實在在傳種的台灣文化拺出去 先輩的惜情 互伊閣較惜人的情 先輩的精神 互伊覺悟,清醒 先輩的人格 互伊堅心台灣人的骨格 唯文學熟似土地 唯土地深入文學 Tshua7 學生親近 鍾理和的笠山山跤 原住民的山地部落 吳新榮的鹽分地帶 去拜見互台灣社會放袂記 濟濟捌替台灣社會喝聲的文學先輩 台灣,是逐工徛起過日的土地 文學,是逐工徛起過日的土地文學 台灣文學的路 是伊入土進前,欲直直行落去的路

2006/07/07 2007/04/26 2009/05/07 北投 2009/07/27 <台灣教會公報>2996 期 2010/09 月 <海翁>第 105 期


註: 徛(khia7)起:立足,生活 踅(se7):繞 軁(nng3):鑽 逐(tak4)工:每天 草地:鄉下 鼻著的:聞到 稠(tiau5):根深柢固 條直:耿直 軁縫:夾縫中鑽營 拺(sak4):推展 熟似:認識 tshua7:帶領 濟濟:眾多 捌(bat4):曾經 喝(hua3)聲:挺身而出 行(kiann5)落去:走下去

台灣人精神(23)劉益昌


* 搶救台灣史前文化的救兵 有文字記載的歷史 叫「信史」 無文字記載的 伊講,是埋佇塗腳的無字天書 無文字的天書 干單有 先民生活的用具 先民種作的種籽 先民食偆的飯菜 先民埋屍的墓穴 咱知影怹 捌祭拜 誰統治者,誰被統治者 咱毋知 咱知影怹 捌戰爭 誰侵略者,誰被害者 咱毋知 唯舊石器時代 到新石器時代 到金屬器時代 塗腳底一沿一沿的塗層 毋是隨疊就有的 毋是電腦虛擬出來的 一沿一沿先民的生活 一沿一沿文化的累積 唯古早到這陣 嘛唯這陣到後代 八里十三行遺址 台東東河橋遺址


宜蘭冬山丸山遺址 斗六番仔溝遺址 強欲予人破壞的遺址 伊,搶救有著 伊,是台灣史前文化的救兵 伊欲救的 毋是無性命的荒地 是現此時,佇台灣即塊土地 落塗生湠,徛起過日 所有住民的身世 伊欲互咱知影 仝一塊土地頂懸 古早的先民 是按怎 ~ 徛起過日 是按怎 ~ 落塗生湠 到今 2006/07/08 2006/12/20 修 北投 2011/01 月 <海翁>第 109 期 註: 塗腳:地下 偆(tshun1):剩下 捌(bat4):曾經 塗層:土層 隨疊:馬上堆積 這陣:目前 強欲:將要

台灣人精神(24)史明


* 堅心台灣獨立革命,為台灣民族主義喝聲的孤星 為著追求大時代的新思想 唯日本殖民的台灣去日本留學 抱著馬列社會理想主義的伊 閣學業放咧,走去中國抗日 看清中國共產黨的真面目了後 走轉來戰後,中華民國佔領的台灣 佔領台灣的中國國民黨政權 比殖民台灣的日本政權閣較酷橫 伊組織「台灣獨立革命武裝隊」 革蔣政權的命無成,閣走去日本 一世人,堅心台灣獨立的武裝革命 海外的獨立運動 唯日本到美洲 唯美洲到歐洲 為著故鄉前途,講出台灣愛獨立 綿精台獨團體的活動 哪知經海外情治人員佮職業學生的手 入去烏名單 中華民國護照的台灣主人,變做無國之民 無國之民 為著未來的理想之國 付出時間,付出金錢 嘛毋驚付出性命 伊,用伊的血佮汗 喝醒島內 ~ 予人洗腦的頭殼 自古早 台灣這塊土地的住民 毋捌產生家己的政權 幾千年來無文字,無國家組織的原住民 倚 400 年來,古中國移民來的漢人 無國家認同的致覺 戰後,綴中國國民黨政權走路來的移民


無仝一個國家認同的共識 大自然寶島的台灣 到今,猶原是 精神分裂的台灣 伊,用「台灣民族主義」 治療 ~ 台灣住民的精神病 伊,用「台灣獨立革命」 解放 ~ 台灣殖民地的性格 徛佇人民立場的人道主義 反帝國主義佮反殖民主義 伊,是革命的行動者 佇台灣獨立的路途 一世人 ~ 無讓步,無失志 無管政權按怎換,人事按怎變 伊,親像 ~ 天頂的孤星 行伊的路 照(tshio7)伊的光

註: 酷橫(hing5):霸道 綿精:努力,投入 倚(ua1):靠近,將近 綴(tue3):跟隨 徛 (khia7) 佇:站在

2006/08/02 2006/12/21 2009/09/21 <台灣教會公報>3004 期 2009/09/25 二修 北投 2014/12/26 <民報-民意論壇>


藝術篇


生翅的色彩-寫廖繼春 天地看袂著的線條


世間看袂著的色彩 伊寬寬仔悟,勻勻仔畫 淡水河,毋是淡水河 觀音山,毋是觀音山 撐開深藍色鬱悶的天 西班牙光焱焱 白色的古城,唌人毋甘用色 水青色,人人恰意的 V 的 nic 的水景 化做撐渡人唱船歌都唱袂現形 海天,滿滿粉粉的粉紅仔色 大紅,大黃,天降落來的色彩 煞手,配佇日月天星的輪迴內底 玉山山色 野柳漁港 東港船隻 調色盤袂赴調色 生翅的色彩,飛佇故鄉的山海港墘 有形無形 溫色冷色 色譜相激 伊,恭請 威嚴的烏 看顧愛跳舞的五彩 恬靜的喙 起飛的心 堅心的畫筆 伊,沃水 生湠花園的油彩 2016.10.27 2016.10.28 修 北投 苦修的畫筆-寫陳德旺 規心,畫畫


像信仰 像修行 修煉畫筆 肉體清心 靈魂清心 坐佇 畫架仔頭前,逐工 揣伊的靈魂 畫伊的心 用畫筆予咱看 咱看袂著的, 日頭佮空氣的色緻 層層,疊疊的色調 層層,疊疊的靈光 修煉的定著 一針一線,慢工幼路 青春的色彩 繡伊繡袂盡的,山色海景 悟性,一日一日深 色彩,一年一年厚 少年的夢,夢景現前 苦修的畫筆,猶佇揣夢 佇畫架仔頭前 自觀,自在 戒定的坐姿,成做 一尊如如不動的雕像

2016.10.27 北投

火煉的劍筆-寫張義雄 強骨的 DNA


行伊,強骨的筋路 畫伊,強骨的線條 粗粗的烏線條 共看上目的景網牢咧 共生活的現實閘起來 攑筆的手像石頭 畫筆是劍,向天宣戰 飄浪海外,煉劍不斷 毋認輸的不平之氣 像煉劍的爐火 捒伊,行向比劍的擂台 東征西討為討一碗飯 討一杯,聖壇的聖杯 聖杯內,聖人的血 狡怪的頭殼 狡怪的路途 風吹過的景,入心入畫 坎坷,像礦石 無平順的浮沈 磨出,寶石的彩光 單純的桌面 簡單的靜物 烏線條,轉入一大片白 一世紀的溜籠 溜入去窗仔外 光焱焱的日光 行落擂台 伊毋知影,家己 行上聖壇

註:


強骨(khiunn7 kut4):倔強

2016.10.30 北投

炭灰的油彩-寫洪瑞麟 唯峙石膏像


透明的大玻璃窗內 行入無見光的坑底 光線,改變伊的畫室 畫室,改變伊的人生 落坑, 日光照袂著 親人看袂著 出坑,伊的畫筆 予炭工身影 烏暗的靈魂 有見光的尊嚴 炭工的畫家 畫家的炭工 汗敆炭灰 是伊的油彩 炭空空內的微光 彩畫莊嚴的聖光 遠古人類, 日頭跤的勞動 掩佇無見光的岩畫 炭工仔人, 無見光的屈勢 一空一空的岩畫 刻佇金熠熠, 燙金的炭灰內底

2016.11.02 北投

筆素,情厚-寫李梅樹 素素的妝扮


素素的背景 素素的厝間 共時間空間定影 你我,隨意出入 畫中人的生活現場 淺色的山景 淺色的溪流 淺色的街巷 素樸,直心 寫真四常所看 素妝山光水影 拋過歷史風湧 釘根故鄉田園 厚厚的,古廟香煙 厚厚的,老樹盤根 伊,厚厚的慈心 畫厚厚的生活倫常 看日落月出 看世事浮沈 一世人,護三角湧聖靈 一世人,行家己的畫路 筆畫,庶民的野花芳 筆畫,人間的天倫情

註: 拋(pha1)過-越過 三角湧-三峽舊名 2016.11.01 刻出台灣金丹-寫林智信 純然的烏線條


利,閣有力 木刻才有的刀痕 刻出早年 草地,素素仔的氣味 以刀代筆 刻出草地的耐操耐翸 刻出草地日常的心適 刻出台灣的風土人情 刻出,伊草根的感情 用 20 年的氣力 盤坐雕刻 像坐禪修煉 煉出 408 尺 台灣獨門的金丹 伊的媽祖 是台灣人徛家過日 依靠的媽祖 早就落塗生湠 台灣在地的 ~ 台灣媽祖 20 年,猶無夠 70 歲的伊 欲閣下 5 年的功夫 彩畫伊,徛起一世人 「芬芳」的寶島 這遍,是 600 尺

2006/06/09 2006/12/21 修 北投 2010/07 月 <海翁>第 103 期 2016.11.08. 改篇名(原<台灣人精神(19)林智信>) 註:


草地:鄉下 做穡(sit8):農事 耐操耐翸(phun2):耐勞,耐蹧踏 心適(sik4):趣事 徛(khia7)家:居住,生活 落塗生湠:落地生根,繁衍 徛起:生活

火灼的苦戀-寫陳博文 無落雨的山景


有落雨的濕度 雨的厚度 是山的闊度 雨的濕度 是山的大肚 濕濕的山巷 生苔的壁牆 入景,入畫 時代的舊跡 街頭巷尾留痕 性命的油彩 厝邊頭尾留影 著急所看所想 畫寫無暝無日 綴生冷的東北風 吹遍,山崖海角 冷靜的畫筆 火灼的靈魂 時時,神秘的烏色 佇天清抑暗暝 入伊油彩,安魂定魄 彼个烏 彼个暗 透微微仔光 畫山海的面腔 寫畫家的惜情 惜勞苦,惜真情 惜夢中所見 伊苦戀,山城海巷 山海,留戀伊深情的畫筆 2016.11.03 北投


烏佮白 -十五年後,閣看李安成的水墨畫


一筆一筆的烏 有時緊 有時慢 佇一大片的白色面頂 反來,反去 四界走闖 一絲一絲的白 有時濟 有時少 佇一大片的烏色內底 軁來,軁去 不時發光 少年的烏 佮 中年的白 交纏 相偃 對拺 苦澀的烏 生湠 甘尾的白 看徹 墨醬醬紙上雲煙 的白 紡出 莊嚴的烏

2002/04/26 2002/12/03 修 2005/10/31 二修 北投 2006/02/25 台灣日報台灣副刊


註: 緊(kin2):快 佇(ti7):在 反(ping2):翻來覆去 四界走闖(tsong5):四處奔波 濟:多 軁(nng3):鑽 相偃:在地上扭打 對拺(sak4):相互推擠 生湠:繁衍 徹:透徹 墨醬醬:黑亂一團

Piano 的琴聲佮老畫家 靜靜


聽 Piano 的琴聲 老畫家 手停佇畫布頭前 Piano 的琴聲 輕輕起落 清氣,猶袂落筆的畫布面頂 浮現老畫家 一生的色彩 少年時陣 東洋透濫西洋文明的啟蒙 到今,猶捏佇伊夯筆的屈勢 琴聲伴著回想 伊,恬靜落筆 一世人的尊嚴 一世人的起落 攏落佇伊少年 向望的線條佮油彩內底

2009/04/23 2009/04/26 2009/05/25 北投


台灣十二月天 台灣色水 電子書 20161201