10 UN
KOMPAS TURISTIKO
Bon dia i bon biní awe na nos edishon #3 di Kompas Turístiko. Awe ya kasi drentando fin di siman, ta bon pa bo sa kuantu aktividat leuk tin pa bo por disfrutá huntu ku bo famia, amigunan òf bo pareha aki na nos dushi Kòrsou. Tin ora nos ta pensa unda pa bai òf kiko pa hasi den nos tempu liber, i ta p’esei e espasio aki tei, pa asina nos bira un punto di referensha pa bo sa unda i kon bo por disfrutá di tur lo ke nos dushi Kòrsou tin pa ofresé.
Nos aki na Parke Avestrus Awe mi ke hasi referensha na algun di aktividatnan ku nos tur por gosa di dje, tin ku ta parti di nos kustumbernan i otronan ku ta bon pa nos sa i gosa di nan di un manera sano i dibertido: Djabièrnè Happy Hour: Konosiendo nos kustumbernan, normalmente riba djabièrnè atardi, despues di trabou, ta ora pa relax i drenta den e ambiente di fin di siman, nada mihó pa esaki ku e tradishonal “happy hours” nan, un djabièrnè sin happy hour ta manera un fin di aña sin pagara, es decir no por, al ménos no aki na Kòrsou. E ritual aki ta un sorto di klousura di siman, kaminda kolega i/òf amigunan ta topa i evaluá tur lo ke a sosodé den e siman laboral ku a kaba di será i tambe hasi un resúmen, di e akontesimentunan polítiko, hudisial i sosialnan di mas relevansia, pero sin duda e meta prinsipal di esaki ta pa rilèks i pasa un ratu kontentu. Ta
p’esei mayoria di komersialnan lokal ta pone nan mes kla pa ofresé e mihó opshon i ambiente pa e klientenan, ken ora di skohe lo tene kuenta ku e mihó oferta, servisio, komfort i ambiente musikal adekuá, komo e rekisitonan básiko di un bon Happy hour, sobrá kos ta wèlkòm. Ami ta pensa ku kada grupo, na kada mesa di kada bar i/ òf restorant di Kòrsou, riba tur djabièrnè prinsipalmente entre 5or pa 7or di atardi tin e solushon pa kualke problema lokal òf mundial ku ta pasando, tantu asina ku si nos por a graba òf skibi kada tópiko di kada mesa i pone nan huntu, nos lo ripará ku e pais posibel, e pais exitoso, e pais ku nos tur ta deseá i sa ku por ta mas mihó, ta simplemente den kada un di nos su pensamentu i akshon. Ora e happy hour kaba, e opshon ta sea bai kas òf prolongá e anochi ku un dinner afó i si e ambiente di baile tei pues tambe ta hasi nèt un bon
Djaweps 13 Yüni 2013
kombinashon pa será e siman ku broche di oro. Wikènt na Banda ariba: Despues di a pasa un agradabel djabièrnè anochi, ta bon pa nos sa ku sobrá dos dianan di fin di siman tin diferente atrakshonnan bunita ku nos por bai bishitá i ku hopi di nos sigur no a tuma tempu pa hasi esaki, sea pasombra nos tin e pensamentu ku e kosnan tei i kualke ora asina lo saka tempu pa bai bishitá nan òf pasombra nos ta pensa ku probablemente nan mester ta muchu karu pasombra ta atrakshonnan pa turista, i ta resultá ku mayoria, si no tur e lugánan aki, tin preisnan kumbiniente pa nos komunidat. Hopi di nos ta anhelá pa bishitá parkenan i atrakshonnan den eksterior sin sikiera mustra kuriosidat pa lo ke ta di nos mes. Djis pa menshoná algun di e atrakshonnan lokal nos tin entre otro: Sea Aquarium, ku tur e shownan bunita kaminda henter famia por kompartí i siña di tur variedat di espesie marinonan i interaktua ku nan. Tambe nos tin e parke di abestrus, kaminda bo por hasi un tour riba un jeep safari yen di emoshon i aventura; djis pega bo tin e Aloe farm, kaminda bo por mira e plantashon di sentebibu i kon nan ta produsí diferente produkto medisinal i estétiko a base di e planta milagroso aki, kual bo por kumpra einan mes. Algu sigur ku no mester faya ta e parke Amazonia, esaki ta algu úniko den Caribe, e parke aki ta un sorto di Magic Kingdom, ku ta hiba nos den un biahe den tempu, kaminda nos por pasa dor di diferente stashon den kual kada un di nan ta rekreá un pueblo ansestral di Amérika i Caribe, un kombinashon di piramide, kueba, jungle, i tambe paranan exo-
Seaquarium tiko, rèptilnan i makakunan entre otro, ku ta forma un ambiente úniko, difísil pa splika pero ku sigur boso no por fayé. Finalmente tin e hardin botániko Dinnah Veeris, unda plantanan medisinal ta wòrdu prosesá pa hasi diferente sorto di remedi natural, trahá einan mes. Si esaki no ta sufisiente, bo por tuma un buggy tour i bai kore den e diferente rutanan rústiko den nos bunita naturalesa i finalmente boso por bai gosa di kualke un di e bunita playanan for di Caracasbaai, Janthiel, Mambo beach entre otro. Ta ora pa bo sali i konosé bo Isla, si bo hasi turismo lokal, no solamente lo bo haña bo mes ku un agradabel sorpresa, pero tambe lo bo bira un persona aktivo den nos turismo, lo bo bai stima, kuida lo ke ta dibo i kontribuí pa desaroyo di nos produkto turístiko. Tin yen kos pa bo hasi, i tur lo ke tin aki na Kòrsou ta trahá pa nos
tur gosa di dje. Bo por pasa dushi, sin tin mester di muchu sèn. Pone di akuerdo ku famia i amigunan i boso sali huntu, kompartí ku otro. Esaki pues ta e lo ke e kompas di awe a mustra nos, ban hasi di nos komunidat unu mas konsiente di lo kual nos tin, ban kuida i protehá nos bienesnan natural i nos infrastruktura, no tira sushi riba kaya, kòrda ku manera nos trata naturalesa asina e lo trata nos bèk. I kòrda tambe ku turismo ta un dje pilarnan di nos ekonomia, pues bo sosten lo ta semper importante i abo mes apresiabel lektor lo tin semper benefisio di dje. Tur komentario òf sugerensha ta bon biní. Den próksimo edishonnan nos lo bai amplia mas aserka di kada un di e aktividatnan ku nos a menshoná i hopi mas. Ami ta Juvira i nos ta topa otro siman ku Dios ke. Email: juvira@ yahoo.com / @juvira