1 8
XULLO
|
29
AGOS TO
EXPOSICIÓN: BARRIGA VERDE, DE FEIRA EN FEIRA 18 de xullo - 29 de agosto Horario: Martes a venres 12:00 a 14:00 h. / 18:00 a 20:00 h. Sábados e domingos de 12:00 a 14:00 h. Igrexa da Madalena Promotor e organizador: Museo Etnolóxico de Ribadavia (Consellería de Cultura, Educación e Ordenación Universitaria). Produción: Asociación Cultural Morreu o Demo. web: www.barrigaverde.eu A exposición mergúllanos no fantástico mundo no que naceu Barriga Verde, o último monicreque popular galego. Convídanos a percorrer o mundo no que se desenvolveu este espectáculo, o das feiras tradicionais, acontecemento festivo por excelencia en Galicia até a década de 1960. Así mesmo, condúcenos polas bambalinas da barraca para coñecer os segredos dos artistas que fixeron posíbel a maxia destes títeres até a súa desaparición, case ao mesmo tempo que aquelas feiras que aínda lembran as persoas maiores, de cando o cinema e a televisión aínda non eran as principais fábricas de soños. Producida pola Asociación Cultural Morreu o Demo, embarcada no proceso de preservación e activación do teatro de títeres popular galego, a exposición inclúe pezas orixinais de José Silvent, un dos creadores de Barriga Verde, que poden verse por primeira vez desde que a barraca “Melodías de España” deixou de percorrer as feiras do país, en 1964. Tamén se inclúen pezas orixinais da tradición europea de títeres de cachaporra e outros obxectos propios do universo das feiras tradicionais, así como elementos audiovisuais e interactivos que converten a exposición nunha experiencia sensorial para toda a familia.
Desde hai séculos, e até a década de 1960, numerosos artistas percorreron os camiños para levar os seus espectáculos polas vilas e aldeas galegas, aproveitando a celebración dunha festa ou buscando a calor dunha taberna ou unha palleira. Verdadeiras estirpes de titiriteiros que transmitían os segredos da profesión de xeración en xeración enchían de luz os rostros das xentes que agardaban todo o ano para contemplar as trasnadas dos heroes cómicos do teatro de marionetas de luva e outros números de acrobacias, equilibrismo ou funambulismo... Iso que deu en chamarse “varietés” e que esmorecería tras a chegada do cinema. O último representante desta tradición en Galicia foi Barriga Verde, boneco e marionetista a un tempo, cuxa memoria permanece aínda indelébel en moitas e moitos galegos. Esta exposición, encadrada no “Proxecto Barriga Verde” da Asociación Cultural Morreu o Demo, pretende rescatar o heroe galego de cachaporra do seu inxusto ostracismo.
Na nosa páxina web tes os contidos da exposición:
w ww. ba r r i g ave rde . e u