DICA I ČAKAVICA U Muzeju grada Trogira održana je 16.svibnja 2012. čakavska večer ''Dica i čakavica''. Domaćin ove manifestacije bila je OŠ Petar Berislavić iz Trogira. Pod vodstvom nastavnice Ivane Ljubenkov i Marice Tadin nastupili su i učenici naše škole predstavljajući svoj mali ''teatar o'spize''.
Kako se kužinava u nas dočarali su nam učenici : Valentina Piteša, Arijan Buble, Arijana Mamić i Barbara Geić uz pratnju dva učenika s mandolinama Ante Radačića i Karla Sorića.
Vavik ćiri sa svoje pergule šjora Tone. Kurijožasto gleda – mene, suside, furešte… Ma svakog covika. Atento prati 'ko di gre 'ko koga vižitaje 'ko se jubi i 'ko se kara. Cuje van i miše na šufitu. Ka policijot! Jema i kanoćal. Da ne bi cagod propustila, bajna. Ka' je nevera ka' nima ni pasa ni maške ošervaje se livo-desno s lumbrelon u ruci.
Onod, na kantunu moje štrade stojidu dva brata – Jere i Špire. Špire je stariji i jema 63 godin, a Jere je mlaji, oko 55 godin. Svaki dan po cilo lito redu i pituraju svoj brod. Parte van, duraju zajedno kroz lita, pramalića, zime…i vavik činidu škandal. Ma, cim pocnu redit brod, pocnu se kontreštavat. To van vako gre, ka pisma… - Glup si ka patata! Ne znaš posal! - Molaj me se! - Šijunada te odnila! Cila štrada ori. Vično revu, vicu, arlecu. I mater si beštimaju, neka su braća! Špire je šempjast, žešći na parlativi, a Jere je furbast, zapocne škandal. Ma nije van uvik škandal u pitanju, jema van tu i pulitike. -Ma ca je vo doslo, Jere moj?Sve krešilo, a penžije male! Bidan narod, nima za kruv i mliko. Nidir posla, judi u kreditiman, tribadu priranit fameju. A koliki je tek dacij u ovu nasu zemju. Kažen ti ja, svi smo mi upali u kašetu brokav, valja nam se iskoprcat. Ma kako??Najboje zivedu političari, lipo pricaju, varaju, puni šoldi… -A ca se cudiš brate? Oli nije vavik tako bilo? Jedan kanun za moćnike, drugi za narod. Ko šoldi jema, vlada sviton. Ma najboje ti je, Špire moj, bit političar – obećaj, obećaj, ludo srce kuntentaj! I tako van prolazu dani u ovu moju štradu, vavik isto.. Izjutra pocne sve lipo ka 'da ništa nije bilo. Ka' u niko doba jopet sve po staron- vika, beštima, pulitika…
Vrime pasaje… A šjora Tone? Ka makako u svon motu. Lucija Ševo, 5. b
Stoji nad mojin gradon. Kampanel svetoga Lovre. Kanta, Bati, Rebatije… Gleda tisne kale, šporke kamene kuce, puknute kupe, zabotunane ponistre. Sluša smij furešti, dičju ciku, viku, ćakulu, kalmu… Prati grajski đir.
JERE I ŠPIRE KURIJOŽASTA TONE
KAMPANEL
Arijana Mamić, 7. a
Gombaje se s grajašima. Gušta u teplini sunca. Odolije buri, dažu i jacu. Fjamenat i bunbal navišćuju misu, funerale i matrimonije… Vavik je bija i bi'će cima judi i neba. Svitnjak mojega Trogira.
NAJBOJE MISTO NA SVITU Zdravi i veseli bili! Ja san van fetivo Rašpino cejade namurano u našu lipu trogirsku rivu. Znate li vi, svitu moj, da Trogirani višje živedu na njoj, zanamisto doma? Nima bojeg mista od ovega za odmorit nerve. Kad dojdeš ode, sidi ukraj obale na šentadu i s galeboviman zapivaj pismu. I slušaj… ''Dobavi Vinko cakod divojke!'' ''Oštija bruta, tija san ga udrit..'' '' A su kin se ono jubi?'' Nima kalme na rivi jerbo ćakuleta ne fermaje. Vavik se judi kombaju ko jema prav, a ko krivo. Meju palman dica arlecu, kantaju….sve rebatije. Ne moreš spavat ca o' beštimji, ca o' pivanja. Nizdol, prema Kuli Karmelengo peškaduri se dežbarkavaju s brodi. Cila arija vonja na friškinu…A judi? Gracadu se za ribu ka da će mukte dobit. Ma baš su gulozi. Izjutra zvonidu zvona sv. Dominika, naviščuju misu. Babe ćakulone su van u prvomen redu, molu Boga, a dočin izajdu iz crikve – ''To van je ta, ca ju je muz privarija s drugon, onon frižerkon iz Pašika, ca jema dite s nikin pomorcen…'' Oma tu, ukraj crikve su van lipe kamene kuce, ma divota i je vidit. Balature pune garifuli i đirani…joci mi se smijedu ka'i vidin. S tiramoli se movi na vitru molatira bjankarija… Jemaju van kuce drvena vrata i bužu kroz koju moreš ćirit u dvor. To je nama dici posebno drago. Privecer padne gradelada u šjor Bepa i cila arija vonja o' peceni škuši. Ajme, koji gušti! I tako iz dana u dan, kroz misece i godišća živi moja riva. Zato fureštu, nemoj batit đeložiju, vengo dođi, sidi, slušaj…ovi zivotni đir.
Barbara Geić, 7.a
Valentina Piteša, 7. a
PRICA SE, PRICA… Sidin usrid grada na pjaci. Judi trčidu svak za svojin poslon. Ma, o nicemu svi pričadu. Psssst…da cujemo. - Ka da nimamo dosta predmeta u školu, pa su nan izumislili jos jedan –zdrastveni odgoj. Krivi su i profešuri ca su to prihvatili – tuži se mularija ispri Lože. Onod, malo nizdol kraj Kneževa dvora kombaju se matere i ćaće. - Jema ovi predmet i dobrih strana, kontra nenasilja je, tolerira svu cejad…,ali u fameji bi se tribalo odlučit kako odgajat dite. Bilo bi boje da se svi skupa pozabavimo lošin ocjenaman, dica nan ništa ne učidu. Nasrid pjace, skupile se stare trogirske ćakulone…je, je svitu moj one ca vavik iz škura stojidu i u sve se razumidu…To su van fetive jazikuje ovega grada. - Doslo niko ludo vrime! Ca pametnoga mogu naučit ova današnja dica?Do' ce nan susvita! Dajte dite materi – lipo naš narod govori. Pone. Laganin korakon gre pop ispri' katedrale, kad ujednom javi se Vinka Jevina – Faj'n Isus! Don Pave, a ca vi mislite o ovomen novon predmetu – zdrastvenon odgoju? - Mislin da nije o' potribe objašnjavat. Molite sve Boga, znate i same… U ti čas, mane in rukon da i se otarasi i ode ca na drugu bandu. Prica se, prica, ovod, onod, onoderak… A mene je vec glava zabolila o' toliki besidi. Judi moji, a ca da van kazen vengo, dogovorite se sami sa sobon i budite spremni ka' vas niko upita –:''A ca ti misliš o zdrastvenon odgoju?''
Ana Svilan, 7.a
26
27