in dia lètt
a olten i stüdia da tacass
là al tesín oo z
Olten, canton Soletta, indúa passan i treni par Berna, Lücerna, Zürigh e Basilea. testo Pier Baron - pier@illustrazione.ch
C
hi che ha lavoràt o stüdiàt “in denta” i sann benissim che la stazion da Olten l’è un “punto nevralgico”. Al sa saveva già in di temp indré, quand che par naa “in denta” a sa metéva giò ul cüü, setàt in segunda class. Süi treni gh’eva i giugaduu di noss squadri, quii da fotball, hockey e palacanestro. E i sa trövavan, la sira dala dumeniga, al “Bahnhofbuffet” da Olten. Lì tegnéva banc ul Cenz Brenna dal FC Lügan, da spéss insema al Seo Dell’Acqua dala Federal. Che inviàvan via na quai cantada o fasévan un quai scherzett, mai catív, sa capiss. A Olten-Zofingen a gh’è anca na bèla sezion dala Pro Ticino. Inscì a scrívum da quaicoss che séntum visin, almen nüm che semm vécc “da mazzà cunt la scua” (come la diis la Ghita al Paolin, in una bèla comedia dal Sergio Maspul). E alúra, brava gént, setévas giò süla cadrega. E scultii ben. A Olten i’è adré a stüdià da tacass al Tesín, fasendo sü una specie da “extraclave”, ala manéra da Campion d’Italia rispett al Belpaés, quel sota Ciass. Ul vespee l’ann inviàt via a Basilea, cunt ul prugett (l’è mia na novità) da tacà insema Basilea Città cunt ul mezz canton dala Campagna. E alúra sa podarà mett in discüssion (effetto domino) tücc i confin di altri canton, quii lì visin. Al “Stammtisch” d’una bétola da Olten gh’è già vegnüt föra la discüssion. E la prima roba che gh’è stai dii? “Ma gnanca mòrt, nüm vörum mia nà cunt ul canton Argovia!”. Ma la fà savé un scritòr da Olten, che sa ciama Alex Capus. E che al manca mia da fan-
10
ILLUSTRAZIONE TICINESE 09-12
tasia. Adiritüra che, se gha sarà da decíd, Olten al farà da tütt par tacass là al Tesín. E parché? La risposta a pòdum trövàla in dal librett dal Capus “Der König von Olten”, indúa sa capiss che lì l’è na specie da Belinzona, faia sü anca (ma mia dumà) da quii che lavúran in ferovia. E che i binari i’è una cultüra local. E mia di tocch da fèr par fà passà i treni. La da lì a gh’è ul Aar, che pö al sa büta in dal Reno, che al finiss in dal mar. Inscì come ul noss fiümm Tesín, anca lü in dal mar, dopo che al s’è stravacaa denta in dal Pò. Gha sarà dunca i “ticinés” da Olten, cunt i sò omm politich che i vegnerà giò par i lavúr dal noss Gran Consili. I parlarann tudesch (anzi “Oltenerdütsch”) e i tirarà i marsinn, par végh un quai süsídi e mett a pòst la “città vecchia”. O par medegà un quai pont che baltíga sül fiümm. A gha n’è sett (sette) e ul Capus al ma fa savé che al s’è bütàt giò in dall’Aar da tücc quisti pont. Prima da bütass giò anca nüm dal pont che al va vers Carass (Carasso) spetemm un atimin. Ma guardii che ala Svizera, adèss cunt 8 milion da inquilin e ul federalismo che scanchígna, duvarem pöö guardàg adré da fin. Anca in dal fotball sa giüga più cunt ul “metodo” o cunt ul 4-2-4. La bandéra ticinesa sura a l’Aar? Mah! Però: al podaress anca véss un’idea, mia da bütà via, senza gnanca guardàg adré...v
«I binari i’è una cultüra local»