Per ragione diverse, quella di Casamozza è quella di u Ponte à a Leccia apprufittanu di a so pusizione in crucivia. Pè ciò chì tocca à l’opere d’ingegneria, ci vole à mintuvà u ponte di u Vergaghju, nantu à I Prunelli di Casacconi, vicinu à un ponte genuvese inruvina. Hè un viadottu purtatu da dui pilastri maestri, alti 24 metri. Nantu à e sponde, s’arremba à sustegni fatti à arcata. Per andà da Francardu à Capuralinu, à l’ingegneri li hè toccu à fà accunciamenti di quelli : un tunellu longu 221 è un ponte longu 523 m. U cutidianu : campà è travaglià in paese I paesi ch’è no cunniscimu oghje sò furmati di case di parechji epiche. Une belle poche sò di u XIXmu seculu, in tempu di a crescita demugraffica. S’è no pigliemu à Campile, ci avvidimu chì parechje case anu ancu un grataghju è un fornu. Per u più, u locu di vita cerca d’ùn esse troppu luntanu da i lochi di travagliu. Ma certe culture imponenu di custruì for di paesi. Hè u casu di parechji pagliaghji è casette chì testimunieghjanu di a leia trà i paese è e so campagne luntane. Lochi mitichi : e legende danu un significatu à e forme di u rilevu In Niolu, legende da spiecà a forma di u Capu Tafunatu ci n’hè o mancu duie. Una vene da Albertacce. I pastori avianu dumandatu à Ghjuberga, un signore di u lucale, di custruì un ponte sopra à Golu. Quellu firmò un pattu cù Satanassu : s’ellu era fattu ind’una nuttata u ponte, u signore derebbe in pegnu à u Diavule l’anima di a prima persona chì francherebbe u ponte. A figliola di Ghjuberga, impenserita, chjamò à San Martinu à a riscossa. U santu pensò à una fisica : fece cantà un ghjallu prima ch’ellu si pisessi u ghjornu, è Satanassu, ùn avendu finitu u ponte, sfrumbulò u so martellu chì tufunò a muntagna... Lochi di devuzione À quattru chilometri da Mariana, sottu à u Borgu, nantu una costa chì supraneghja a piaghja, ci hè à u locu chjamatu Nepitaccia una grotta dedicata à Santa Divota. Tempi fà, ci andavanu in pellegrinagiu u 27 di ghjennaghju. E donne ci facianu i “Patenostri di Santa Divota”, chì ghjeranu piccule cullane in perle di vetru. A ghjente dice ch’ella ricullerebbe issa traduzione à i primi cristiani, quand’elli si piattavanu ind’issa grotta per celebrà u so cultu.
U Borgu.