Per isse pieve di u Cismonte - 36 -
Leone Carlu Caniccioni nascì in Aiacciu in u 1879 è morse in Courbevoie in u 1957. À chì fideghja u quatru “Sur la route, paysans corses allant à la Santa, foire aux bestiaux” capiscerà subitu chì Caniccioni hè u pittore di a valle di Golu. A so nomina franco e fruntiere di l’isula, è quatri di soiu ne truvemu in u mondu sanu. U so “Préparatifs pour la foire” (1913) hè à u museu di San Francisco. Ci hè antru quatru in Leipzig (Alimagna), è unu in New-York (“Femmes corse à la fontaine de Moltifao”, 1929)...Originarii di Moltifau, i so genitori si stabbiliscenu in Parigi in u 1880. A a Scola di l’Arte decurative, po, in u 1899, à a Scola di e Belle Arte, i so maestri Gérome è Ferrier ùn sò qualvogliasiasi pittori. In tempu di a Prima Guerra mundiale, Caniccioni participeghja à a battaglia di Verdun. Hè fattu cavaliere di e Legione d’onore in u 1927 è membru permanente di u Cumitatu di l’Artisti francesi. Dopu a Seconda Guerra mundiale, serà cunservatore di u museu Roybet Fould in Courbevoie (Hauts de Seine). Ricumpense è premii ne riceve tantu è più... Frà issi premii, dui seranu di l’Accademia di e Belle Arte. Li hè toccu à scumbatte cù e mosse artistiche di a so epica, l’impressiunisimu è u postimpressiunisimu, è à caccià si da l’accademisimu schiettu lasciatu li da i so maestri. In Moltifau, a tradizzione di i pittori di campagna si cuntinueghja cù l’opere di Gérard Dominici.
Ponte di Castirla.
U ponte di Castirla, u Ponte à a Leccia, u Ponte Novu... storie di ponte I ponti facenu a storia di a valle. Si sviluppanu e tecnulugie, si allarganu e vie terrestre, si custrisce u camminu di ferru, è uni pochi di ponti entrenu in u patrimoniu. U Ponte à a Leccia hè scrittu à l’inventariu di i munimenti storichi cù un arrestatu di u 1928. Hè un ponte genuvese, allargatu dopu quand’ellu crescì u carriaghju. U Ponte Novu, risturatu è allargatu una prima volta trà u 1770 è u 1778, l’hà fattu saltà a resistenza di settembre 1943. Ogni 8 di maghju, ci cummemureghjanu a battaglia famosa, cù una messa cantata è a participazione di ghjente travestute cù panni di l’epica. U ponte nu 1, nantu à a cumuna di Campile, hè situatu vicinu à locu chjamatu San Leunardu. Data di u XIXmu seculu è permette di francà à Golu in Barchetta per andà in Campile è in Castagniccia. Hè un ponte à quattru arcate, è u so parapettu metallicu l’anu messu ùn hè tantu. À vicinu, u ponte nu 2 nantu à u Casacconi hè dinò di u XIXmu seculu. Hà duie arcate è fù risturatu à u XXmu seculu. U camminu di ferru entre ancu ellu in u patrimoniu Sviluppatu da a seconda metà di u XIXmu seculu in quà, u camminu di ferru corsu colla longu à Golu sin’à a gara d’Omessa-Francardu.